სამშაბათს, ჩოხატაურის მუნიციპალიტეტის საკრებულოს სხდომაზე ბახმაროს სარეკრეაციო ტერიტორიის მიწათსარგებლობის გენერალური გეგმის გეგმარებითი დავალების დოკუმენტი დაამტკიცეს.
ჩოხატაურის მუნიციპალიტეტის საკრებულოს თავმჯდომარის ზაალ მამალაძის განმარტებით, დოკუმენტი ეკონომიკისა და მდგრადი განვითარების სამინისტროს დაკვეთით, მომზადებულია შპს "არტსტუდიო პროექტის" მიერ, კვლევების საფუძველზე:
_ დავალება მიეცა კომპანიას, რომ განისაზღვროს ჯანსაღი, უსაფრთხო და მოხერხებული ტურისტულ-სარეკრეაციო გარემოს და პირობების შექმნა; მდგრადი განვითარების მიზნით ფიზიკური და იურიდიული პირების, ადგილობრივი თვითმმართველობის და სახელმწიფო ინტერესების ურთიერთშეთანხმება ტერიტორიის გამოყენებისა და განვითარების საკითხებში; ტერიტორიების გამოყენების (მიწათსარგებლობის) და განაშენიანების განვითარების პრიორიოტეტის დადგენა; მიწათსარგებლობის ზონების და ქვეზონების დადგენა; ტერიტორიის გამოყენების (მიწათსარგებლობის) და განაშენიანების პარამეტრების განსაზღვრა; მდგრადი განვითარების წინაპირობის შექმნა; უპირატესად სივრცითი განვითარების ინტენსიური მოდელის გამოყენება; ინვესტიციების მოზიდვის, მოსახლეობის დასაქმებისა და კომპლექსის კონკურენტუნარიანობის გაზრდის მიზნით საერთაშორისო პრაქტიკაში დანერგილი თანამედროვე ქალაქგეგმარების, სატრანსპორტო, საინჟინრო და გარემოსდაცვითი მიდგომების და გადაწყვეტების გამოყენება და სივრცით-ტერიტორიული დაგეგმვის პროცესში საჯაროობის, ჩართულობის და თანამონაწილეობის უზრუნველყოფა, _ აღნიშნა ზაალ მამალაძემ.
დოკუმენტში მუხლობრივად არის გაწერილი, რის დამუშავებაა საჭირო.
ჩოხატაურელი დეპუტატები კომპანიისგან ელოდებიან ელექტრომომარაგების, კავშირგაბმულობის, სასმელი წყლის, ბუნებრივი აირის, სანიაღვრე, მყარი ნარჩენების მოცილებისთვის საჭირო ქსელის მოწყობის გეგმას:
_ თავდაპირველ ვერსიაში ეწერა მხოლოდ თხევადი ნარჩენების ქსელის მოწყობის გეგმის შექმნა. არ იყო დაკონკრეტებული, რა იგულისხმებოდა თხევად ნარჩენში, რომელსაც ბევრი განმარტება შეიძლება მოვუძებნოთ. ამიტომ, საკრებულოს გადაწყვეტილებით ჩაემატა უფრო მკაფიო განმარტება _ საკანალიზაციო სისტემის ქსელის მოწყობის გეგმა, _ აღნიშნა ზაალ მამალაძემ.
საკრებულოს თავმჯდომარის მოადგილემ ვლადიმერ სიხარულიძემ განმარტა, რომ ერთ-ერთი მნიშვნელოვანი პრობლემა ბახმაროს სტატუსის არარსებობაა:
_ ბახმაროს კურორტს ჩვენ ვუწოდებთ, თუმცა, იურიდიულად ასე არაა. შესაბამისად, ჩვენი მიზანია ბახმარომ ეს მნიშვნელოვანი სტატუსი მიიღოს, _ თქვა სიხარულიძემ.
საკრებულოს თავმჯდომარის თქმით, მიწათსარგებლობის გენერალური გეგმის დოკუმენტის დამტკიცება ბახმაროსთვის სტატუსის მინიჭების საფუძველი უნდა გახდეს:
_ დოკუმენტის მეორე ეტაპით უნდა განისაზღვროს ბახმაროს საზღვრები, სარეკრეაციო ტერიტორიის ადგილის მნიშვნელობა, მიწის გამოყენების გეგმა და სავარაუდო მმართველობის სისტემის ფორმა, რაც თავისთავად გულისხმობს სტატუსის მინიჭებას, _ თქვა ზაალ მამალაძემ.
საკრებულოს მიერ დამტკიცებული გეგმა, ასევე, ითვალისწინებს საცხოვრებელი სახლების სავარაუდო პროექტების დამუშავებას:
_ სულ მცირე 5 ტიპის საცხოვრებელი შენობის სახასიათო პროექტი დამუშავდება, რაც იმას ნიშნავს, რომ სამომავლოდ, როცა გენერალური გეგმა ძალაში შევა, თვითმმართველობას ექნება საშუალება, აირჩიოს ამ ხუთიდან ერთ-ერთი, რომლის მიხედვითაც გახორციელდება ბახმაროში სახლების მშენებლობა, _ აღნიშნა საკრებულოს თავმჯდომარემ.
მისივე თქმით, გეგმის თანახმად უნდა განისაზღვროს, როგორც მისასვლელის, ასევე შიდა გზების ქსელი, ავტოსადგომები, რომელიც აუცილებელი იქნება კურორტისთვის, საფეხმავლო ბილიკები და ზაფხულისთვის ველო და მოტობილიკების მოწყობის დეტალები:
_ რაც შეეხება ზამთარს _ კვლევის თანახმად, პირველ ეტაპზე შესაძლებელია 36 ადვილად მოსაწყობი, ნაკლებად ხარჯიანი სათხილამურო ტრასის მოწყობა. ესაა ძირითადად ჩრდილოეთი ფერდობები, რომლის საერთო ფართობი 75 ჰექტარია. ეს იქნება 35-დან 60 მეტრამდე სიგანის სათხილამურო ტრასა.
დოკუმენტში ასევე განსაზღვრულია რამდენიმე საბაზო სადგურის გაკეთება, საიდანაც საბაგირო გზა უნდა წავიდეს. იგი სამ კატეგორიად დაიყოფა _ დამწყებებისთვის, საშუალო დონისთვის და პროფესიონალი მოთხილამურეებისთვის. კიდევ ერთხელ განვმარტავ, რომ ეს არის საკრებულოს მიერ დამტკიცებული გეგმა, რომელიც გადაეგზავნება ტენდერში გამარჯვებულ კომპანიას. მეორე ეტაპზე უკვე ველოდებით ამ დავალებების შესრულებას _ უკვე პროექტებს, _ თქვა ზაალ მამალაძემ.
ჩოხატაურის საკრებულოს თავმჯდომარე იმედოვნებს, რომ ორივე ეტაპის დასრულების შემდეგ, როგორც ცენტრალურ ხელისუფლებას, ისე კერძო ბიზნესს ექნება კანონიერი საშუალება, დაიწყონ ბახმაროს განვითარება.
