ხმაურიანი აუქციონი მოვაჭრეების სასარგებლოდ დასრულდა. ქალაქ ოზურგეთის რაიონულმა სასამართლომ, დღეს, ოზურგეთელი 15 ინდმეწარმის მიერ ქალაქ ოზურგეთის მერიის წინააღმდეგ შეტანილი სარჩელი განიხილა და მათი შუამდგომლობა დააკმაყოფილა. მხარეებს შორის დავა მორიგებით დასრულდა. საქმე ეხება 28 თებერვალს ქალაქ ოზურგეთის მუნიციპალიტეტის მერიის მიერ ჩატარებულ საჯარო აუქციონს _ ქალაქ ოზურგეთში, დავით აღმაშენებლის ქუჩაზე მდებარე 188 კვადრატული არასასოფლო სამეურნეო მიწის ნაკვეთის და მასზე განლაგებული შენობა-ნაგებობების გაყიდვას. აუქციონის საწყისი საპრივატიზაციო ფასი _ 47 937 ლარი, “ბიჯი“ კი 4 7 93 , 7 იყო. აუქციონში გაიმარჯვა ოზურგეთში მცხოვრებმა ჯემალ დარჩიამ, რომელმაც აღნიშნული ქონება 57 524 ლარი და 40 თეთრად შეიძინა. აღნიშნული ფაქტის შემდეგ მოვაჭრეებსა და მერიის თანამდებობის პირებს შორის სიტყვიერ შეურაცხყოფას არაერთხელ ჰქონდა ადგილი. მოვაჭრეები რამდენჯერმე მივიდნენ მერიის შენობასთან და მერსა და საკრებულოს თავმჯდომარეს აუქციონის გაუქმება მოსთხოვეს. ამის შენდეგ ისინი მიმართავენ ოზურგეთის რაიონულ სასამართლოს საჩივრით ქალაქ ოზურგეთის მერიის წინააღმდეგ და 28 თებერვალს ჩატარებული აუქციონის გაუქმებას მოითხოვდნენ.
დღეს გაიმართა მოსამზადებელი სხდომა, სადაც მხარეებს შორის დაიდო მორიგების აქტი, რითაც აუქციონში გამარჯვებულმა პირმა ჯემალ დარჩიამ თანხის სანაცვლოდ ქონება დათმო. სარჩელს ხელს 15 ინდმეწარმე აწერს, სასამართლო პროცესს კი ესწრებოდა 7 პირი: ზურაბ ქარჩავა, ნუნუ ნაკაიძე, რამაზ ანდღულაძე, ქეთევან მარგალიტაძე, შოთა მელუა, ზაზა დარჩია, თამთა კორინთელი, მათ უფლებებს ადვოკატი კახა ჩავლეშვილი იცავს. მოპასუხე მხარედ ქალაქ ოზურგეთის მერიის ინფრასტრუქტურის სამსახურის უფროსი მერაბ წივწივაძე და მესამე პირი, ჯემალ დარჩია. მოსამართლე მარინა კიკნაძემ მოვაჭრეებისა და ჯემალ დარჩიას მიერ წარდგენილი მორიგების აქტის შუამდგომლობა დააკმაყოფილა და დაამტკიცა. მხარეებს შორის დავა მორიგებით დასრულდა. ქონება, ე.წ. გმირთა მოედანზე მდებარე ჯიხურების მეპატრონებს დაუბრუნდათ.
თუ რატომ დათმო ქონება და გაურიგდა მოვაჭრეებს აუქციონში გამარჯვებული პირი, ჯემალ დარჩიამ ამაზე კომენტარი “გურია ნიუსთან“ არ გააკეთა.
“თქვენ იცით, ვინ მოიყვანა ეგ პიროვნება აქ. არ დავამთავრებთ ამ ამბავს ასე, გამოიძახეთ პატრული და დაგვაპატიმრეთ. ვიცით, ვინც მოაგზავნა, ვინც დგას ამ პიროვნების ზურგს უკან, ამას ერთი თეთრი არ გააჩნია, სად აქვს ამხელა ფული? ამოგალპობთ ციხეში, ნახავთ 18 ოჯახის გამწარება ასე თუ დაგიმთავრდეთ, არაკაცებო, მალე დატოვებთ ოზურგეთს“, _ ამ სიტყვებით მიმართავდნენ ჯიხურების უკვე ყოფილი მეპატრონეები აუქციონზე მერიის თანამდებობის პირები.
