შინაგან საქმეთა მინისტრის მოადგილის შალვა ხუციშვილის განცხადებით, გელა ხვედელიძის ცემის საქმეში, პირველადი მონაცემებით, ცეცხლსასროლი იარაღი არ ფიგურირებს.
როგორც ხუციშვილმა ჟურნალისტებთან საუბრისას აღნიშნა, საქმეზე რეაგირება, სამართალდამცველი ორგანოების მხრიდან, სწრაფად მოხდა.
მისივე თქმით, ამ ეტაპზე, მომხდარის მოტივზე საუბარი ნაადრევია.
„საქმეზე გამოძიება სისხლის სამართლის კოდექსის 117-ე მუხლით არის დაწყებული. ძალიან სწრაფად მოხდა რეაგირება ამ საკითხზე, პირველადი მონაცემები რაც გვაქვს არის ის, რომ ცეცხლსასროლი იარაღი არ ფიგურირებს. დანარჩენს გვეტყვის გამოძიება, რომელიც ინტენსიურად მიმდინარეობს.
ვიდრე გამოძიების შედეგები არ იქნება ცნობილი, რაიმე მოტივზე საუბარი ნაადრევია“,_ განაცხადა ხუციშვილმა.
საქართველოს შს მინისტრის ყოფილ მოადგილეს, გელა ხვედელიძეს თავს დღეს საკუთარ სახლთან, თარხნიშვილის ქუჩაზე დაესხნენ.
ის საავადმყოფოში, კერძოდ „ნიუჰოსპიტალშია“ მოთავსებული.
ხვედელიძეს ყბა-სახის მოტეხილობა აქვს და გამოკვლევები უტარდება.
საავადმყოფოში გელა ხვედელიძის ოჯახის წევრები, ახლობლები და გამომძიებლები იმყოფებიან.
ამავე თემაზე:
