გუშინ, სერბეთის ქალაქ ნოვი სადში თავისუფალ ჭიდაობაში ევროპის პირველობა დასრულდა. ქართველმა მძიმეწონოსანმა გენო პეტრიაშვილმა ბრინჯაოს მედალი მოიპოვა.
ჩვენმა ფალავანმა თავდაპირველად რუს ალან ხუგაევს მოუგო, მაგრამ მეოთხედფინალში ოლიმპიურ, მსოფლიოს ორგზის და ევროპის სამგზის ჩემპიონთან, თურქ ტაჰა აკგულთან დამარცხდა. ქართველმა სანუგეშო ტურნირში გადაინაცვლა. ჯერ უკრაინელ დანილო კარტავის სძლია, შემდეგ კი ბრინჯაოს მედლისთვის გადამწყვეტ შეხვედრაში უნგრელი დანიელ ლიგეტი დაამარცხა.
გუშინ ასპარეზობდა დავით ტლაშაძეც, მაგრამ წარუმატებლად. ჩვენი მოჭიდავე სასტარტო შეხვედრაშივე დამარცხდა თურქ იაკუპ გორთან.
საბოლოოდ, ნოვი სადში ქართველმა თავისუფალი სტილით მოჭიდავეებმა ერთი ოქროსა და სამი ბრინჯაოს მედალი მოიპოვეს.
დღეს, ასპარეზობაში ბერძნულ-რომაული სტილის ფალავნები ჩაებმებიან.
დღესვე, ევროპის კონტინენტზე სხვადასხვა ქვეყნების ეროვნული საფეხბურთო პირველობების მორიგი ტურები გაიმართება. ცნობილი გახდა, რომ იტალიურ „ემპოლიში“ მოასპარეზე ლევან მჭედლიძემ ორი კვირის წინ, „მილანთან“ მიღებული ტრავმა ვერ მოიშუშა და ხვალ თავის გუნდს „ბოლონიასთან“ მატჩში ვერ დაეხმარება. მიმდინარე სეზონში 27 წლის ქართველის ანგარიშზე „ემპოლის“ რიგებში 15 მატჩი და 6 გოლია.
მიმდინარე სეზონის დასრულების შემდეგ კატალონიური „ბარსელონას“ ამჟამინდელი მთავარი მწვრთნელი ლუის ენრიკე თანამდედობას დატოვებს. რამდენიმე დღის წინ ესპანურ მასმედიაში გავრცელდა ცნობა, რომ „ბარსელონას“ ცნობილი ფრანგი ფეხბურთის სპეციალისტი ლორან ბლანი ჩაიბარებდა.
გუშინ, ცნობილი გახდა, რომ „ბარსას“ ხელმძღვანელობას ამ გუნდის ბრაზილიელმა ლეგიონერმა ნეიმარმა მიმართა და ახალი სავარაუდო მწვრთნელის საკუთარი კანდიდატურა შესთავაზა. ბრაზილიის ეროვნული გუნდის თავდამსხმელის მტკიცებით, „ბარსელონას“ მოთამაშეების უმრავლესობას გუნდის მესაჭედ ხუან კარლოს უნსუეს ხილვა სურთ. უნსუე ამჟამად ლუის ენრიკეს თანაშემწედ მუშაობს.
ახალ მწვრთნელს ეძებს იტალიური „ინტერიც“. გუშინ საინტერესო განცხადება გააკეთა „მანჩესტერ იუნაიტედის“ პორტუგალიელმა თავკაცმა ჟოზე მოურინიომ. საინტერესოა, რომ მოურინიო „ინტერს“ სათავეში ერთხელ უკვე ედგა და ამ გუნდს, თავის დროზე, ჩემპიომთა ლიგა მოაგებინა. „განსაკუთრებულის“ მტკიცებით, ის დიდი ალბათობით, „ინტერს“ აუცილებლად დაუბრუნდება, ოღონდ ამის გაკეთებას მხოლოდ რამდენიმე წლის შემდეგ აპირებს.
გუშინვე ესპანურმა გამოცემამ „Marca“ გაავრცელა ინფორმაცია, რომ მიმდინარე საფეხბურთო სეზონის ერთ-ერთი უმთავრესი აღმოჩენა, კლუბი „მონაკოს“ 18 წლის თავდამსხმელი კილიან მბაპე კარიერას მადრიდის „რეალში“ გააგრძელებს.
მბაპეს მთხოვნელები არ აკლია, მაგრამ თავად ფეხბურთელის სურვილია რომ ზინედინ ზიდანის ხელმძღვანელობის ქვეშ ითამაშოს.
„Marca“-ს მტკიცებით, მბაპემ “სამეფო გუნდს“ საკუთარი თანხმობა უკვე განუცხდა.
თუ უახლოეს მომავალში მბაპე „რეალის“ მაისურს მოიზომავს, ესპანეთის ეროვნული გუნდის 24 წლის თავდამსხმელი ალვარო მორატა მადრიდული კლუბის დატოვებას აპირებს.
გუშინ გამოცემამ „AS” გაავრცელა ცნობა, რომ მიმდინარე სეზონის დასრულების შემდეგ ალვარო მორატა „რეალს“ აუცილებლად დატოვებს და კარიერას დიდ ბრიტანეთში გააგრძელებს. გაზეთის მტკიცებით მორატა „მანჩესტერ იუნაიტედსა“ ან ლონდონის „ჩელსიში“ ითამაშებს. ახალგაზრდა შემტევი თავისი მადრიდული კარიერით უკმაყოფილოა, რადგან მინდორზე გამოსვლის შესაძლებლობა ხშირად არ ეძლევა.
