ივნისში სხვადასხვა ჩითილების ღია გრუნტში გატანა, ძირითადად დამთავრებულია. ამ პერიოდში ხშირია წვიმიანი ამინდები და ძირითადად აგრარულ კულტურებს ფიტოფტოროზი (შავლაქიანობა) აზიანებს. ეს დაავადება განსაკუთრებით ემართება პომიდვრისა და კარტოფილის ფოთლებს, ღეროებს, ნაყოფს. ხშირად გვესმის საკმაოდ წარმატებული მეურნეებისგანაც, რომ შავლაქიანობას მაინც არაფერი შველის. საქმე იმაშია, რომ წამლობის ვადები როცა ირღვევა, მერე ადვილად იქმნება იმის წინაპირობა, რომ მცენარის როგორც ღერო, ისე ფოთლები გაშავდეს და მართლაც არაფერი შველის.
საქმე იმაშია, რომ პირველი წამლობა მცენარეს, ჩითილის გადარგვამდე ან გადარგვისთანავე უნდა ჩაუტარდეს. მშრალ ამინდში, საღამოს უნდა შევასხუროთ 0,5%-იანი ბორდოს ან კუპროზანის ხსნარი. შეწამვლის პროცესი უნდა გაგრძელდეს ყოველ ორ კვირაში ერთხელ, ხოლო თუ წვიმიანი ამინდებია, ყოველი წვიმის შემდეგ.
სასურველია, გამოვიყენოთ ხალხური მეთოდები: შეშის ნაცარი გავცრათ და დილას, ნამის შეშრობამდე, თხლად მოვაპნიოთ ჩითილებს. ასევე, კარგია ხახვის ფურცლების, თვით პომიდვრის ღეროების ნახარშის შესხურება.
განსაკუთრებით უნდა დავიხსომოთ _ გაცილებით უკეთესი შედეგის მომტანია მცენარის შესანარჩუნებლად, ჩითილობის პერიოდში წამლობის დაწყება. ნუ მიუდგებით საქმეს ისე, რომ ჩითილისთვის ეს ნაადრევია, განსაკუთრებით გურიაში. ზრდასრულ ასაკში, თუნდაც გამუდმებით ზრუნვა, დაგვიანებულია. ფიტოფტოროზი, განსაკუთრებით ტენიან გარემოში _ გურიაში პოულობს გასაქანს. შესაწამლი საშუალებები კი ადვილად ხელმისაწვდომი და საკმაოდ იაფია.
