საქართველოს პრემიერ-მინისტრმა გიორგი კვირიკაშვილმა, რომელიც წაღვერში ხანძრის სალიკვიდაციო საგანგებო შტაბს ხელმძღვანელობს, განაცხადა, რომ საღამოსთვის სტიქიის ზონაში უკეთესი ვითარება იქნება, თუმცა, აღნიშნა, ხანძრის გავრცელების საშიშროება, ამ ეტაპისთვის ჯერ კიდევ არის.
“ამ ეტაპზე უკეთესი ვითარებაა, მონიშნულია ჩასაქრობი ზონები, მუშაობს 3 ვერტმფრენი, თურქეთიდან გზაშია კიდევ 2 ვერტმფრენი, სამწუხაროდ, დილით ძლიერი ქარის გამო, ვერ ჩამოფრინდნენ, თუმცა, დაახლოებით, ორ საათში ისინიც ჩაერთვებიან და ვფიქრობ, ღამისთვის გაცილებით უკეთესი ვითარება გვექნება. ამ ეტაპზე მუშაობს ცოცხალი ძალა _ მეხანძრე-მაშველები, ადგილობრივი მაშველები მთის კურორტების განვითარების კომპანიიდან და რაც საჭიროა, ყველაფერი კეთდება. ყველაზე მძიმე ვითარება გვაქვს ერთ კერაზე, რომელზეც მიმართულია მთელი ძალა, ხდება ტუმბოებით წყლის ატანა, ეკიპაჟები იმუშავებენ ზედა მხრიდან და ვფიქრობთ, ჩავაქრობთ ხანძარს. ხანძრის გავრცელების საფრთხე, რა თქმა უნდა, არსებობს თუ ქედი არ ჩავაქრეთ, ქედის ჩაქრობის შემდეგ მწვავე ფაზა გადაივლის”, _ განაცხადა კვირიკაშვილმა.
