ადგილობრივი თვითმმართველობის არჩევნების შემდეგ ლანჩხუთის მუნიციპალიტეტის რიგ სამსახურებში დღის წესრიგში დადგა თანამშრომელთა შემცირების საკითხი. იმის გათვალისწინებით, რომ თავად მუნიციპალიტეტის საბიუჯეტო დეფიციტი თვალშისაცემია და გამგეობის საფინანსო სამსახურის უფროსის, როლანდ ლაშხიას თქმით, დღეის მდგომარეობით, ბიუჯეტის შესრულების მაჩვენებელი, დაახლოებით, 60%-ია, ამ ფონზე სულაც არ არის გასაკვირი, კადრების „წმენდა“ რომ დაიწყოს.
არც ის ფაქტია უცხო, რომ მუნიციპალიტეტის ა(ა)იპ-ებში შტატები მაქსიმალურად გაბერილია, რიგ შემთხვევებში, თანამშრომლებს უფუნქციოდ ყოფნა უწევთ და ხშირად სამსახურში დასაჯდომად სკამიც არ ყოფნით.
ლანჩხუთში შემცირებების პირველი მერცხალი ა(ა)იპ „ტექსერვისი“ აღმოჩნდა, საიდანაც რამდენიმე დღის წინ, დაახლოებით, 30 თანამშრომელი დაითხოვეს. საუბარია ხელშეკრულებით დასაქმებულ ადამიანებზე, რომლებიც „გურია ნიუსთან“ საუბრისას ადასტურებენ გათავისუფლების ფაქტს, თუმცა, ვერ აკონკრეტებენ მიზეზს. გაურკვეველია ასევე, ამ ადამიანებს დროებით, მიმდინარე წლის ბოლომდე შეუწყდათ ხელშეკრულება თუ საერთოდ.
ჩვენი ინფორმაციით, ამ ა(ა)იპ-ის სამაშველო და სოფლების წყლის სისტემების მოვლა-პატრონობის განყოფილებების თანამშრომლებს მოუწიათ სახლში წასვლა.
ინფორმაციის გადამოწმებისა და დეტალების დაზუსტების მიზნით, „გურია ნიუსი“ ორი დღეა ცდილობს, დაუკავშირდეს „ტექსერვისის“ დირექტორს, თუმცა, ირაკლი ჩხაიძე ჩვენს სატელეფონო ზარებს არ პასუხობს.
როგორც მუნიციპალიტეტის გამგეობაში გავარკვიეთ, გარდა „ტექსერვისისა“ ფინანსური პრობლემები ა(ა)იპ „ლანჩუთი-სერვისაც“ აქვს, თუმცა, სამსახურის უფროსის, თენგიზ ჭიჭილეიშვილის თქმით, ამ ეტაპზე იქ ხალხის გაშვება არ იგეგმება.
„შემცირება ჩემს სამსახურში არავის შეხებია. ხელშეკრულებით მეეზოვეები და მძღოლები გვყავს დასაქმებული, რომელთაც ვერანაირად ვერ გავუუქმებთ ხელშეკრულებას“, _ ამბობს ჭიჭილეიშვილი.
