21 ნოემბერს დასრულდა საქართველოს ეროვნული ჩემპიონატის რეგიონული ლიგის გათამაშება.
ჩოხატაურის ცენტრალურ სტადიონზე “ბახმარომ” ჩხოროწყუს “ლესიჭინეს” უმასპინძლა და 2:1 დაამარცხა. ანგარიში მეორე ტაიმში სტუმრებმა თერთმეტმეტრიანი დარტყმით გახსნეს (პირველ ტაიმში “ბახმაროს” მეკარემ ერთი თერთმეტმეტრიანი მოიგერია), თუმცა, კვარაცხელიამ მალევე შეძლო გოლის გატანა და წონასწორობის აღდგენა. გამარჯვების გოლი კი ტაიმის მიწურულს გუნდის კაპიტანმა თეიუმურაზ შარაშენიძემ ეფექტური დარტყმით გაიტანა.
“ბახმაროსთვის” სარეკორდო გამოდგა აღნიშნული სეზონი, გათამაშების პირველ წრეში ჩოხატაურელთა გუნდს არც ერთი თამაში არ წაუგია, თანაც ისე, რომ პირველ 9 ტურში გოლი არ ჰქონდა გაშვებული.
“ბახმარომ” 24 თამაშში 78 გოლი გაიტანა (ერთ მატჩში საშუალოდ 3,25 გოლი) და 68 ქულა დააგროვა, თავის უშუალო კონკურენტებს 6 ქულით გაასწრო და დამაჯერებლად დაიკავა პირველი ადგილი.
ჩემპიონატის ბომბარდირი “ბახმაროს” თავდამსხმელი გიგა კვერენჩხილაძე გახდა, რომელმაც 31 გოლის გატანა მოახერხა. ეს შედეგი არამარტო ამ ლიგის, არამედ ეროვნული ჩემპიონატის მასშტაბითაც სარეკორდოა.
ჩემპიონობის აღსანიშნავად ბორის პაიჭაძის სახელობის ჩოხატაურის ცენტრალურ სტადიონზე დაჯილდოების ცერემონიალიც გაიმართა, რომელსაც ჩოხატაურის მუნიციპალიტეტის საკრებულოს თავმჯდომარე ზაალ მამალაძე, მუნიციპალიტეტის მერი ირაკლი კუჭავა, გურიის ფეხბურთის ფედერაციის პრეზიდენტი დავით მუჯირი და აჭარის ფეხბურთის ფედერაციის პრეზიდენტი ირაკლი თორთლაძე დაესწრნენ.
ჩოხატაურის “ბახმაროს” ყველაზე ასაკოვანმა, 89 წლის, გულშემატკივარმა იური უნგიაძემ სპეციალური პრიზი დააწესა და თავადვე გადასცა გუნდის კაპიტანს თეიმურაზ შარაშენიძეს.
“ჩვენ, რა თქმა უნდა, ველოდით გამარჯვებას და მომდევნო ლიგაში გადასვლას, ამისთვის სამწვრთნელო შტაბმაც და ფეხბურთელებმაც თავდაუზოგავად ვიშრომეთ, მაგრამ ციფრები მართლაც მოულოდნელი და შთამბეჭდავია…. მინდა მივულოცო გუნდის ხელმძღვანელობას და თითოეულ ჩოხატაურელს ეს წარმატება… ჩოხატაურის ფეხბურთის ისტორიაში ასეთი რამ პირველად მოხდა და სასიამოვნოა, რომ ჩვენ ეს შევძელით! მადლობა მუნიციპალიტეტის პირველ პირებს _ რომ არა მათი თანადგომა, ეს შედეგი წარმოუდგენელი იქნებოდა. მინდა ხაზი გავუსვა ჩვენი სპონსორის _ ბატონი დავით ჟღენტის განსაკუთრებულ თანადგომას და წვლილს ამ გამარჯვებაში, მხოლოდ ფინანსურ მხარდაჭერას არ ვგულისხმობ _ ის ყოველ თამაშზე, როგორც რიგითი გულშემატკივარი, გვამხნევებდა და გვერდში გვედგა!” _ ამბობს “გურია ნიუსთან” საუბრისას “ბახმაროს” მთავარი მწვრთნელი თეიმურაზ ლორია.
