ლანჩხუთში, სუფსის ადმინისტრაციულ ერთეულში, მართალია სოფლის ამბულატორია წლებია, მოქმედებს და ადგილობრივ მოსახლეობას უბანზე ორი ექიმი და ორი ექთანიც ემსახურება, თუმცა, აქაურებისთვის მთავარი პრობლემა სწორედ ამ სამედიცინო უბნამდე მისვლაა. ამის მიზეზი კი ამბულატორიის ეზოში არსებული მდგომარეობაა, სადაც, ფაქტობრივად, ტერიტორია დაჭაობებულია და ირგვლივ წყლის დიდი გუბეები დგას.
“თვალის ერთი შევლებითაც ცხადია, რა მდგომარეობაა აქ. მშრალ ადგილს ვერსად ნახავ _ ყველგან წყალი და ტალახია. ზამთარში სულ ასეა _ რაც არ უნდა მზიანი ამინდი იყოს, მიწა მაინც ვერ ასწრებს გაშრობას. ექიმთან მისვლას თუ გადაწყვეტ, ყელიანი რეზინის ბოტები უნდა ჩაიცვა ან ნავი უნდა იქირავო, აბა, სხვანაირად გზას ვერ გაიკვლევ ადამიანი. ახალგაზრდები კიდევ რაღაცას ახერხებენ, მაგრამ რა უნდა ქნან მოხუცებმა ან პატარა ბავშვებმა, მათ გუბეზე გადახტომა შეუძლიათ?!” _ კითხვებს სვამს ადგილობრივი მოსახლეობა, რომლებიც იმედს იტოვებენ, რომ ადგილობრივ ხელისუფლებაში ვინმე მაინც დაინტერესდება აქ არსებული პრობლემით.
“სუფსა საკმაოდ დიდი თემია და თავის დროზე აქ 50 პაციენტზე გათვლილი საკმაოდ კეთილმოწყობილი საავადმყოფო მოქმედებდა. ახლა ამას ვინღა ჩივის, ხრეშის დამყრელი არ მოიძებნა კაცი, რომ ქვეყნის სამარცხვინოდ ტალახითა და წყლის უზარმაზარი გუბეებით არ იყოს აქაურობა დაფარული. აქაურობას პატრონი და ყურადღება ჭირდება. სხვა თუ არაფერი, სირცხვილია ასეთი სანახავი იყოს სოფლის ამბულატორიის ეზო”, _ ამბობენ სუფსის მაცხოვრებლები.
სოფლის ამბულატორიის ეზოში შექმნილ მდგომარეობასთან დაკავშირებით “გურია ნიუსი” ლანჩხუთის საკრებულოში სუფსის მაჟორიტარ დეპუტატს ზურაბ კუკულავას დაუკავშირდა, რომელიც დაგვეთანხმა, რომ ამბულატორიის ეზოში მართლაც გაუსაძლისი მდგომარეობაა შექმნილი და სათანადო ინფრასტრუქტურული სამუშაოებია ჩასატარებელი:
“ნამდვილად ცუდი მდგომარეობაა შექმნილი სოფლის ამბულატორიის ეზოში. პირადადაც ვარ საქმის კურსში და ამასთან დაკავშირებით მუნიციპალიტეტის მერიაც მყავს ინფორმირებული. რამდენიმე დღეში ველოდები მერიის მხრიდან პასუხს, ჩვენ საუბარი არ გვაქვს ტერიტორიის მოხრეშვაზე, ბევრად უკეთ გვინდა მოვაწყოთ ეს ტერიტორია”, _ გვითხრა კუკულავამ.
რა ინფრასრუქტურული გეგმები აქვს მუნიციპალიტეტის ხელმძღვანელობას სუფსის ამბულატორიის ეზოსთან დაკავშირებით, ამაში გასარკვევად მერიის პრესასთან ურთიერთობის განყოფილების ხელმძღვანელს მაკა სულაბერიძეს დავუკავშირდით. სულაბერიძის თქმით, სუფსაში არსებულ პრობლემასთან დაკავშირებით ლანჩხუთის მერიაში აქამდე არანაირი მიმართვა არ შესულა, თუმცა, მერიის შესაბამისი სამსახური ადგილზე გაეცნობა პრობლემას.
ცნობისთვის, მსხვილი ინფრასტრუქტურული პროექტი სუფსაში 2015 წლის ოქტომბერში გახორციელდა. მაშინ მუნიციპალიტეტის ხელმძღვანელობამ პრიორიტეტად სოფლის ცენტრის კეთილმოწყობა მიიჩნია და საამისოდ მუნიციპალიტეტმა 212,8 ათასი ლარის ღირებულების ხელშეკრულება შპს “ჯორჯიან სტოუნს” გაუფორმა. აღნიშნული თანხიდან 44,2 ათასი ლარი სოფლის სკვერში დეკორატიული ბეტონის ფილების დაგებას მოხმარდა. თუმცა, საბოლოოდ, აღმოჩნდა, რომ იქ დაგებული ბეტონის ფილები მალევე დაზიანდა და რეალურად, მუნიციპალიტეტმა რამდენიმე ათასი ლარი იმ სამუშაოებში გადაიხადა, რომელიც ისევ გასაკეთებელია.
სტატიაში გამოყენებულია გივი ცინცაძის ფოტო
