შინაგან საქმეთა სამინისტროს სასაზღვრო პოლიციის ვერტმფრენის ავარიულად დაშვების შედეგად დაშავებულები თელავის რეფერალურ საავადმყოფოში გადაიყვანეს.
საავადმყოფოს დირექტორის, ხათუნა ჯონიაშვილის ერთ-ერთ მათგანს ოპერაცია უტარდება.
„ერთი პაციენტი უკვე საოპერაციოში შეიყვანეს, რადგან აღენიშნება მუცლის ღრუს დაზიანება და სასწრაფო ქირურგიული ჩარევა ესაჭიროება. მეoრე დაშავებული კი კლინიკაში ამ წუთებში შეიყვანეს და მისი მდგომარეობის გამოკვლევა მიმდინარეობს”, – განაცხადა ჯონიაშვილმა.
შეგახსენებთ, რომ გუშინ შინაგან საქმეთა სამინისტროს სასაზღვრო პოლიციის ვერტმფრენმა – ბორტის ნომერი GBP– 10020, კახეთში, თელავის რაიონის სოფელ ართანასთან, სასაზღვრო პოსტ ,,ანდარაზართან“ ავარიული დაშვება განახორციელა.
სასაზღვრო პოლიციის ვერტმფრენი, რომელშიც შინაგან საქმეთა სამინისტროს სამი მფრინავი, ერთი მესაზღვრე და ერთი საპატრულო პოლიციის თანამშრომელი იმყოფებოდნენ ლაგოდეხის სამმართველოს სასაზღვრო ქვედანაყოფებში გეგმიური როტაციის მიზნით მიფრინავდა.
ავარიული დაშვების შედეგად ვერტმფრენში მყოფი პირები დაშავდნენ. ამ დროისთვის დაშავებულების თელავის რეფერალურ საავადმყოფოში გადაყვანა მიმდინარეობს.
ამ წუთებში სასაზღვრო პოლიციის უფროსი თემურ კეკელიძე დაშავებულების მოსანახულებლად თელავში მიემგზავრება. იგი ადგილზე გაეცნობა მომხდარის დეტალებს.
სასაზღვრო პოლიციის ვერტმფრენის ავარიულად დაშვების ფაქტზე გამოძიება შინაგან საქმეთა სამინისტრომ უკვე დაიწყო, შემთხვევას შეისწავლის გენერალური ინსპექციაც.
