ოზურგეთის მუნიციპალიტეტის საკრებულოს ბიუროს სხდომაზე საკრებულოს თავმჯდომარის მოადგილემ, გიორგი ღურჯუმელიძემ საკრებულოს წევრებისთვის, აღმასრულებელი ორგანოს მხრიდან ინფორმაციის არ მიწოდების შესახებ განცხადება გააკეთა.
“აღმასრულებელი ორგანო ვალდებულია, თითოეულ დეპუტატს მიაწოდოს ამომწურავი ინფორმაცია, მათივე უფლებამოსილების სრულყოფილად გასახორციელებლად.
მერიას არა ერთი წერილი გაეგზავნა მერიისა და მუნიციპალიტეტის მიერ დაფუძნებული ა(ა)იპ-ების და შპს-ების საშტატო ნუსხის მიწოდების შესახებ, რომელიც დღემდე უპასუხოდაა დარჩენილი.
ბიუროს აბსოლუტური უმრავლესობა მიიჩნევს, რომ აღნიშნული საკითხი აუცილებლად უნდა დარეგულირდეს, რათა საკრებულოს წევრებს არ შეეშალოთ ხელი უფლებამოსილების გახორციელებაში.
ცნობისთვის _ საკრებულოს წევრი უფლებამოსილია ” საქართველოს კანონმდებლობით დადგენილი წესით ისარგებლოს ნებისმიერი ინფორმაციით, რომელიც აუცილებელია მისი უფლებამოსილების გასახორციელებლად”, _ თქვა გიორგი ღურჯუმელიძემ.
ბოლო დროს, საზოგადოებაში ხშირად ისმის, რომ ა(ა)იპ-ებში დასაქმებულთა რიცხვმა მოიმატა და იქ თანამშრომლები პოლიტიკური ნიშნით ინიშნებიან.
გიორგი ღურჯუმელიძე ამბობს, რომ მას ამის შესახებ დეტალური ინფორმაცია არ აქვს:
“ბიუჯეტის ხარჯვის კონტროლს ახორციელებს საკრებულო და ასევე მერია. მერიის მიერ დაფუძნებული ა(ა)იპ-ები და შპს-ები ანგარიშვალდებულნი არიან საკრებულოს წინაშე. შესაბამისად, სრულიად ლეგიტიმურად მოხდა ინფორმაციის მოთხოვნა, იმ მიზნით, რომ საკრებულოს ჰქონდეს სრული ინფორმაცია მათი მუშაობის შესახებ”, _ თქვა გიორგი ღურჯუმელიძემ.
ოზურგეთის მუნიციპალიტეტის მერიის სამართლებრივი უზრუნველყოფის და ზედამხედველობის სამსახურის უფროსი ლაშა თავაძე ამბობს, რომ საჯარო ინფორმაციის გაცემაზე არანაირი პრობლემა არ არსებობს:
_ საჯარო ინფორმაციაზე გამცემი პირი არის მზია გაგუა და მე არ ვიცი, რა მოხდა. ბიუროს სხდომას მე არ ვესწრებოდი და აქედან გამომდინარე, ვერაფერს გეტყვით _ ჩემთან არანაირი დოკუმენტი არ არის.
სამართლებრივად, საჯარო ინფორმაცია აუცილებლად უნდა გაიცეს. მუნიციპალიტეტი ერთი იურიდიული პირია და შესაბამისად, საკრებულოსა და მერიას შორის ინფორმაციის მიწოდება და გადაცემა არანაირი პრობლემა არ არის. საჯარო ინფორმაცია ნებისმიერ პირს შეუძლია, მიიღოს, _ ამბობს თავაძე.
_ მაშინ რატომ ვერ მიიღო საკრებულომ მერიისგან საჯარო ინფორმაცია?
_ ამ კონკრეტულ შემთხვევაზე ვერაფერს გეტყვით, მაგრამ ვიცი, რომ საჯარო ინფორმაციის მოთხოვნას აუცილებლად უნდა გაეცეს პასუხი, შესაბამისად, დადგენილ ვადებში. აქ შეიძლება რამე გაურკვევლობა იყოს და ზუსტად ვერ გეტყვით.
ოზურგეთის მუნიციპალიტეტის საკრებულოს წევრი და “ევროპული საქართველოს” ოზურგეთის რაიონული ოფისის ხელმძღვანელი მიხეილ გოგოტიშვილი ამბობს, ეს ფაქტი კარგად მიანიშნებს, რომ მერიას და საკრებულოს შორის არაჯანსაღი დამოკიდებულებაა და ამის შესახებ არა ერთი კომენტარი გაკეთებულა:
“როგორ შეიძლება საჯარო ინფორმაცია არ მიაწოდოს მერიამ საკრებულოს ან პირიქით?! ეს არის მზა ინფორმაცია, რომელიც დაუყოვნებლივ უნდა გაიცეს. რაც შეეხება გიორგი ღურჯუმელიძის განცხადებას, ამის შესახებ არაფერი ვიცი, რადგან ბიუროს სხდომაზე არ ვყოფილვარ”, _ აღნიშნა ჩვენთან საუბრისას გოგოტიშვილმა.
ჩვენს კითხვაზე ინფორმაციის არგაცემის უკან იმალება თუ არა ის, რომ ა(ა)იპ-ებში ბოლო პერიოდში ხელშეკრულებით პირების აყვანა ხდება, გოგოტიშვილი გვპასუხობს:
“ნეპოტიზმი და გაბერილი შტატები ყბადაღებული თემაა. ამის შესახებ არა ერთხელ გვისაუბრია მედიასთან. აქედან გამომდინარე, საინტერესოა, რამდენად შეესაბამება ეს ინფორმაცია სიმართლეს.
ჩემი აზრით, ეს ყველაფერი შემოდგომაზე გამოჩნდება ნათლად, როდესაც მერია ა(ა)იპ-ებისთვის მოითხოვს თანხის დამატებას ბიუჯეტში _ ამაში დარწუნებული ვარ”, _ ამბობს გოგოტიშვილი.
