2019 წლის 14 იანვრიდან პენსიონერებმა 180 ლარის ნაცვლად 200 ლარი აიღეს. 20-ლარიან მატებას ოზურგეთელი პენსიონერები დადებითად აფასებენ.
პენსიის მატებასთან დაკავშირებით, 2018 წლის ივნისში, პრემიერ-მინისტრობის კანდიდატმა მამუკა ბახტაძემ პარლამენტში განცხადება გააკეთა: “მთავრობა გააგრძელებს მიზნობრივ სოციალურ პროგრამებს მოწყვლადი ჯგუფების მატერიალური მდგომარეობის შესამსუბუქებლად. გაფართოვდება შშმ პირთა, ხანდაზმულთა და მზრუნველობამოკლებულ ბავშვთა ფიზიკური და სოციალური მდგომარეობის გაუმჯობესებისკენ მიმართული ღონისძიებები. მათ შორის დაგეგმილია სახელმწიფო პენსიების ზრდა 2019 და 2020 წლებში 20-20 ლარით, რისთვისაც ჩვენ საშუალოვადიან ბიუჯეტში გავითვალისწინეთ დამატებით, დაახლოებით, 400 მილიონი ლარი”, _ განაცხადა მამუკა ბახტაძემ.
“გურია ნიუსი” ოზურგეთში პენსიონერებს ესაუბრა და მათგან გაარკვია, რამდენად კმაყოფილები არიან მთავრობის გადაწყვეტილებით.
ლელა სანიკიძე: “ყველაფერი გაძვირებულია და 20 ლარის მომატება არაფერს ნიშნავს საცოდავი პენსიონერებისთვის . მადლობელი ვარ, მაგრამ, ირგვლივ სიძვირეა და რა უნდა ვქნათ, არ ვიცი. პროდუქტებზე და წამლებზე უზარმაზარი ფასებია”.
ციალა ცქვიტინიძე: “20 ლარი ახლა ნიშნავს 20 თეთრს, მაგრამ ხალხი მაინც კმაყოფილია. არ ვიცი, რა გვეშველება და რა იქნება მომავალში. ხალხს უნდა დასაქმება, სამუშაო ადგილები კი რეგიონში არ არის”.
რუსუდან ცისკარიძე: “კარგია მომატება, მაგრამ უფრო მეტი რომ ყოფილიყო, კარგი იქნებოდა. ობლები მყავს საპატრონო და აბა, ეს მომატებული 20 ლარი რაში მეყოფა?!”
იზოლდა ჯანველიძე: “რაც საშუალება აქვს მთავრობას, ისე გვეხმარება. კმაყოფილი არ ვარ, მაგრამ უნდა ვიმყოფინოთ”.
მარიამ დუმბაძე: “არ ვარ კმაყოფილი, მაგრამ რა ვქნათ?! ეს 200 ლარიც არ აქვს სხვებს”.
ნაილი გოგუაძე: “ეს არის მასხარად აგდება. 20-ლარიანი მატება არაფერს ნიშნავს, როდესაც ყველა პროდუქტის ფასი იმატებს. ეს პენსია კომუნალურ გადასახადებში და წამლის ფულად არ გვყოფნის. ნახეთ, აბა, 20 ლარად 25 კილოგრამ პურის ფქვილს ვერ ყიდულობს ადამიანი”.
გურამ ვასაძე: “პენსია წამლის ყიდვაში მეხარჯება და ძლივს მყოფნის. რა უნდა ვთქვა? განა ხელისუფლებამ არ იცის, რა მდგომარეობაშია მისი ამომრჩეველი?!”
“ერთიანი ნაციონალური მოძრაობის” წევრი და ოზურგეთის მუნიციპალიტეტის საკრებულოს დეპუტატი დავით მჟავანაძე “გურია ნიუსთან” საუბარში ამბობს, რომ რაც დღეს ხდება საქართველოში პენსიის მატებასთან დაკავშირებით, სამარცხვინო ფაქტია:
“ქართველი ჩინოვნიკების ხელფასებს თუ გადავავლებთ თვალს, კარგად მივხვდებით, რომ პენსიაზე 20-ლარიანი მატება არის დაცინვა და მეტი არაფერი. დიდი თანხები იხარჯება ბიუროკრატიაში და ადვილად შესაძლებელია ამის შემცირება, რომ ხალხს უფრო მეტად გაეზარდოს პენსია. პენსიონერების უმეტესობა ამ ფულს ხარჯავს წამალში და კარგად ვიცით, რა ფასებია მედიკამენტებზე. პენსიის მატება კარგია, მაგრამ ეს მატება უნდა შეესაბამებოდეს იმ რეალობას, რომელშიც ვცხოვრობთ. არ შეიძლება ჩინოვნიკებს ემატებოდეს ასობით ლარი და პენსიონერებს კი მხოლოდ 20 ლარი”.
“ქართული ოცნების” წევრი და ოზურგეთის საკრებულოს დეპუტატი ლელა საჯაია ამბობს, რომ ხელისუფლება ყველაფერს გააკეთებს, რომ პენსია კიდევ გაიზარდოს:
_ აბსოლუტურად მესმის მოსახლეობის. მეც იგივე პრობლემები მაწუხებს, რაც მათ და ისიც კარგად ვიცი, ეს მატება მიზერულია. მაგრამ, ამ ეტაპზე, სხვა შესაძლებლობა არ იყო და დარწმუნებული ვარ, უახლოეს პერიოდში კიდევ გაიზრდება პენსია. ყველაფერს აკეთებს საქართველოს მთავრობა, რომ უფრო მეტი სოციალური პაკეტი მიაწოდოს მოსახლეობას.
_ ქალბატონო ლელა, როგორც დავით მჟავანაძემ გვითხრა, ჩინოვნიკები ასობით ლარით იზრდიან ხელფასებს, პენსიონერებს კი მხოლოდ 20 ლარით მოემატა…
_ ძალიან კარგად იცის დავით მჟავანაძემ, რომ უკანონოდ არაფერი ხდება და ხელფასი არ იზრდება _ ყველაფერი კანონის ფარგლებშია მოქცეულია, _ თქვა ლელა საჯაიამ.
დამოუკიდებელი დეპუტატი ოზურგეთის საკრებულოში ლევან მგელაძე “გურია ნიუსთან” საუბრის დროს ამბობს, რომ პენსიის მატება იმ ფონზე, როდესაც ქვეყანაში ეკონომიკური პრობლემებია, მოსახლეობაზე დადებითად აისახება:
“მაგრამ ეს არ ნიშნავს იმას, რომ 20 ლარით მოემატა პენსია პენსიონერს და ამით ხელისუფლებამ მოუგვარა პრობლემა ამომრჩეველს. ეს მატება აუცილებლად უნდა გაგრძელდეს უახლოეს პერიოდში და რაც შეიძლება მეტი სოციალური პაკეტი გაჩნდეს მუნიციპალიტეტებში. ხალხს ძალიან უჭირს და ხელისუფლება უფრო მეტად ახლოს უნდა იყოს მათთან”.
“ქართული ოცნების” წევრი და ოზურგეთის საკრებულოს დეპუტატი მარი ჩხიკვიშვილი “გურია ნიუსთან” პენსიის 20-ლარიან მატებასთან დაკავშირებით ამბობს, რომ ხელისუფლების ზრუნვა მოქალაქეებზე მომავალშიც გაგრძელდება:
“ჩვენი პენსიონერი მოქალაქეების მხარდაჭერა და მატერიალური მდგომარეობის შემსუბუქება საქართველოს მთავრობის ერთ-ერთი მთავარი ამოცანაა. მართალია, 20 ლარით ზრდა იმ გამოწვევებს ბოლომდე ვერ გადაჭრის, რაც საქართველოშია, თუმცა, რეფორმები ამ მიმართულებით გაგრძელდება. ხელისუფლების მთავარი ამოცანა მოსახლეობაზე ზრუნვა და მათი პირობების სასიკეთოდ შეცვლაა. ამ მიმართულებით მნიშვნელოვანი ნაბიჯები გადაიდგა. სოციალურად დაუცველ ბავშვებს 10-ლარიანი დახმარება 50 ლარამდე გაეზარდათ. სოციალურად დაუცველი ოჯახები, რომლებიც მუშაობას დაიწყებენ სოციალური დახმარება არ მოეხსნებათ. ჭარბვალიანობის დასაძლევად მთავრობამ მნიშვნელოვანი პროექტი განახორციელა და მოსახლეობამ ამით დიდი შეღავათი მიიღო. ვფიქრობ, მნიშვნელოვანი ნაბიჯები გადაიდგა ამ მიმართულებით ქვეყანაში და მთავრობა გააგრძელებს მიზნობრივ სოციალურ პროგრამებს მოწყვლადი ჯგუფების მატერიალური მდგომარეობის შესამსუბუქებლად”, _ გვითხრა მარი ჩხიკვიშვილმა.
