“გურია ნიუსის” წყაროს ინფორმაციით “ნაციონალური მოძრაობის” ოზურგეთის ორგანიზაციაში დაპირისპირებაა _ როგორც გვითხრეს, ამის მიზეზი პარტიის ადგილობრივი ორგანიზაციის თავმჯდომარის თანამდებობაა, რომელიც ამჟამად დავით მჟავანაძეს უკავია, თუმცა, ამ პოსტზე პრეტენზიას ბესო ქათამაძეც აცხადებს.
წყარო ყვება, რომ ქათამაძესა და მჟავანაძეს შორის დიდი ხნის წინ დაწყებული კონკურენცია დაპირისპირებაში საპრეზიდენტო არჩევნების მეორე ტურის შემდეგ გამძაფრდა.
“მათ შორის კონკურენცია ყოველთვის იყო. მჟავანაძემ და ქათამაძემ ორჯერ შეძლეს მაჟორიტარულ თემებში გამარჯვება და პარტიაში პირველობის ამბიცია ორივეს ჰქონდა. ქათამაძეს პარტიის თავმჯდომარეობა ყოველთვის სურდა, თუმცა, მჟავანაძე მყარად ინარჩუნებდა ამ პოსტს, რაც ქათამაძის განაწყენებას იწვევდა.
საპრეზიდენტო არჩევნების პირველ ტურში, ორივე მათგანმა შეძლო საკუთარ მაჟორიტარულ უბნებში ოპოზიციის კანდიდატის გაყვანა. თუმცა, მიხეილ სააკაშვილმა მჟავანაძის შედეგს გაუსვა ხაზი და პირდაპირ ჩართვაში ყველას ამცნო, რომ სოფელი ჭანიეთი, რომლის მაჟორიტარიც დავით მჟავანაძეა, გრიგოლ ვაშაძემ მოიგო. მას ყურადღება არ გაუმახვილებია ქათამაძის მიერ მოგებულ ნასაკირალზე, რამაც ამ უკანასკნელს გული დაწყვიტა. მეორე ტურში სიტუაცია შეიცვალა _ მჟავანაძემ, ქათამაძისგან განსხვავებით, ჭანიეთის მოგება ვერ შეძლო, თუმცა, ამას მისთვის პოზიციები არ შეურყევია”, _ ყვება ჩვენი წყარო და ამტკიცებს, რომ სწორედ ამის შემდეგ დაიწყო ღია დაპირისპირება მჟავანაძეს და ქათამაძეს შორის.
მისივე ინფორმაციით, ქათამაძემ სიტუაციის დალაგება პარტიის ცენტრალურ ოფისშიც სცადა, თუმცა, არ გამოუვიდა _ “ნაციონალური მოძრაობის” ლიდერებმა მჟავანაძის ჩანაცვლებაზე უარი უთხრეს:
“ამ ამბავმა ქათამაძე ძალიან გააბრაზა და დაანონსდა, რომ პარტიას საერთოდ დატოვებდა”, _ აღნიშნა ჩვენმა წყარომ, რომლის თქმით, ქათამაძე ქვეყნის დატოვებასაც გეგმავს.
აღნიშნულ ინფორმაციას სიცრუეს უწოდებს ბესო ქათამაძე და ამბობს, რომ მასსა და მჟავანაძეს შორის დაპირისპირებას ადგილი არ აქვს. თუმცა, ინფორმაციას იმის შესახებ, რომ ქვეყნიდან წასვლა სურს, არ უარყოფს:
_ წასვლას ვგეგმავ, მაგრამ დროებით და ისიც მხოლოდ სწავლის გასაგრძელებლად. არის ვარიანტი, რომ სწავლა გავაგრძელო ბრიუსელში, მაგრამ ჯერ ბოლომდე არ არის გარკვეული. დიდი პროცედურებია საჭირო _ ვიზა, სწავლის თანხა. ვნახოთ, თუ მოვაბი თავი, წავალ სასწავლებლად, _ გვითხრა ქათამაძემ.
_ ბატონო ბესო, ეს იმას ნიშნავს, რომ “თავის მობმის” შემთხვევაში საკრებულოს დატოვებთ?
_ არავითარ შემთხვევაში _ უცხოეთში დარჩენას არ ვაპირებ. ორ თვეში ერთხელ ვიქნები აქ და შევინარჩუნებ მანდატს, რადგან არჩეული დეპუტატი ვარ და ხალხთან ვალდებულებები მაქვს. ცალკე პარტიაც არის.
_ არსებობს ინფორმაცია, რომ “ნაციონალური მოძრაობის” ოზურგეთის ორგანიზაციაში დაპირისპირებაა და თქვენი ეს გადაწყვეტილებაც ამან განაპირობა. ვგულისხმობთ თქვენსა და დავით მჟავანაძეს შორის არსებულ კონკურენციას და ლიდერობის ამბიციას…
_ არასწორი ინფორმაციაა. დათო ჩემი მეგობარია და მსგავსი რამ ბუნებაში არ არსებობს.
_ ჩვენი წყარო ამბობს, რომ “ნაციონალური მოძრაობის” ოზურგეთის ორგანიზაციის თავმჯდომარის პოსტის დაკავება გსურდათ და უარი მიიღეთ…
_ სურვილიც არ მქონია, რადგან თავმჯდომარე ჩემი მეგობარია. ჩვენ ვართ ერთი დიდი ოჯახი და ძალიან კომფორტულად ვგრძნობ თავს.
_ ეს კომფორტი იმაშიც გამოიხატება, რომ საკრებულოში თქვენი ფრაქციის თავმჯდომარე ხშირად იცვლება?
_ ეს შიდა პარტიული გადაწყვეტილებაა.
_ ერთ წელიწადში უკვე სამჯერ შეიცვალა _ თავიდან იყო დავით მჟავანაძე, შემდეგ თორნიკე გოგუაძე, ახლა თქვენ ხართ, თუმცა, გვითხრეს, რომ მალე დატოვებთ ამ პოსტს…
_ ეს ხდება შიდა პარტიული სიტუაციიდან გამომდინარე. ვეცვლებით ერთმანეთს საჭიროებიდან გამომდინარე; პირადულიდან გამომდინარეც ხდება.
_ რას ნიშნავს პირადულიდან გამომდინარე? ფრაქციის თავმჯდომარის თანამდებობაზე ვსაუბრობთ…
_ ჩვენ მხოლოდ პარტია არ ვართ. ვართ მეგობრები, ერთი დიდი ოჯახი.
_ ამას ხელფასის გამო აკეთებთ?
_ არა, ხელფასი რა შუაშია. ჩვენ არ ვართ მაგ ხელფასზე დამოკიდებულები და ფრაქციის ხელფასი, ძირითადად, ხმარდება პარტიულ საქმიანობას. არასდროს ყოფილა პრობლემა, თუ ვინ აიღებდა. არის რაღაც საჭიროებები, რის გამოც ხდება გადანაცვლება. დაბრუნდება მჟავანაძე მალე. რა პრობლემაა ამაში?! _ აღნიშნა ჩვენთან საუბრისას ბესო ქათამაძემ.
ფრაქციის თავმჯდომარის პოსტის მალე დაბრუნების შესახებ არსებულ ინფორმაციას არ უარყოფს დავით მჟავანაძეც:
_ არაფერი განსაკუთრებული ამაში არ არის. როტაციის პრინციპით ვენაცვლებით ერთმანეთს, _ გვითხრა მჟავანაძემ, რომელიც ქათამაძესთან დაპირისპირებას უარყოფს:
_ არანაირი დაპირისპირება ჩემსა და ბესოს შორის არ არსებობს. პირველად თქვენგან გავიგე, რომ რაღაც დაპირისპირება არსებობს და ბესო ამის გამო აპირებს ქვეყნის დატოვებას. მიხეილ სააკაშვილის მიერ ჭანიეთის ხსენება სულაც არ ნიშნავს, რომ კონფლიქტი უნდა იყოს. ალბათ, ვიღაცას ხელს აძლევს ამ ხმების გავრცელება და სურთ გამოაჩინონ, რომ კონფლიქტი არსებობს. მე ვიცი, რომ ბესო რამდენიმე თვით თავის საქმეზე აპირებს წასვლას და ეს იმას არ ნიშნავს, რომ დაპირისპირებულები ვართ, _ გვითხრა მჟავანაძემ.
