როგორც საგანგებო სიტუაციის მართვის სამსახურში ამბობენ, შინაგან საქმეთა სამინისტროს გადაუდებელი დახმარების ოპერატიული მართვის ცენტრ 112-ში გორში, მშვიდობის ქუჩაზე საცხოვრებელი კორპუსის პირველ სართულზე ხანძრის შესახებ შევიდა შეტყობინება.
შემთხვევის ადგილზე საგანგებო სიტუაციის მართვის სამსახურის მეხანძრე-მაშველთა ჯგუფები, პოლიციის ეკიპაჟები და სასწრაფო სამედიცინო დახმარების ბრიგადები მივიდნენ.
ძლიერი დაკვამლიანების გამო მეხანძრე-მაშველებმა სახლში შესასვლელად ფანჯრის გისოსები მოხსნეს. სახლში მათ 16 წლის გოგო დახვდათ, რომელიც შენობიდან უვნებლად გამოიყვანეს.
ის სასწრაფო სამედიცინო დახმარების ბრიგადამ პროფილაქტიკის მიზნით საავადმყოფოში გადაიყვანა. მის სიცოცხლეს საფრთხე არ ემუქრება.
მომხდარზე გამოძიება სისხლის სამართლის კოდექსის 188-ე მუხლის მე-2 ნაწილით დაიწყო, რაც გულისხმობს ნივთის დაზიანებას ან განადგურებას ცეცხლთან ან მომატებული საფრთხის წყაროსთან გაუფრთხილებელი მოპყრობით.
