“გურია ნიუსის“ ინფორმაციით, წინასაახალწლო დღეებში ოზურგეთის მუნიციპალიტეტის მერის წარმომადგენლებმა და მათმა თანაშემწეებმა სოფლებში ე.წ. “მეცამეტე ხელფასი“ მიიღეს.
ოზურგეთის მუნიციპალიტეტის მერის წარმომადგენელი დაბა ნასაკირალში ოთარ ადაძე ჩვენთან საუბარში ამბობს, რომ თანხის ჩარიცხვა მოხდა, მაგრამ ზუსტად არ იცის, რა ოდენობის.
_ ბატონო ოთარ, ჩვენი ინფორმაციით, ჩაგერიცხათ ე.წ. “მეცამეტე ხელფასი“. გვაინტერესებს, რის საფუძველზე მიიღეთ ეს თანხა?
_ ამ კითხვით მიმართეთ მერიას.
_ ბატონო ოთარ, მიიღეთ თუ არა მერიისგან დანამატის სახით თანხა, ამის დაზუსტება გვინდა….
_ ზუსტად არ ვიცი; ბევრი მქონდა თანხა ანგარიშზე და არ გადამიმოწმებია.
_ ანუ მიიღეთ თუ არა ე.წ. “მეცამეტე ხელფასი“ არ იცით?
_ კი, მივიღე, მაგრამ, ზუსტად რამდენი მივიღე არ ვიცი, – გვითხრა ოთარ ადაძემ.
ოზურგეთის მუნიციპალიტეტის მერის წარმომადგენელი სოფელ თხინვალში არსენ კვაჭანტირაძე ისე “იყო დაკავებული“, რომ კითხვის _ მიიღო თუ არა მეცამეტე ხელფასი, მოსმენის შემდეგ, “კის“ ან “არას“ თქმას ეს პასუხი არჩია: _ უკაცრავად, დაკავებული ვარ და არ მცალია ერთ წუთას, – და ტელეფონი გაგვითიშა.
მერის წარმომადგენელი სოფელ ნაგომარში მიხეილ ცქვიტიშვილი “გურია ნიუსთან“ ადასტურებს თანხის ჩარიცხვას და დამატებითი თანხის მიღებას ასე ხსნის:
_ ალბათ, შრომის და დამსახურების მიხედვით მომიწია.
_ შეგიძლიათ კონკრეტულად გვითხრათ, 2019 წელს განსაკუთრებულად რა გააკეთეთ?
_ ინფრასტრუქტურული პროექტები გახორციელდა სოფელში, ბეტონების დაგება, ხალხთან კონსულტაციები….
_ ანუ თქვენ ფიქრობთ, რომ დამსახურებლად მიიღეთ დამატებითი თანხა…
_ სავარაუდოდ, კი.
_ ბეტონის დაგებაში და ინფრასტრუქტურული პროექტების განხორციელებაში თავად იყავით ჩართული?
_ კი, ბატონო. შეგიძლიათ იკითხოთ სოფელში, – აღნიშნა ჩვენთან სატელეფონო საუბრისას ბატონმა მიხეილმა.
ოზურგეთის მუნიციპალიტეტის მერიის საფინანსო-საბიუჯეტო სამსახურის უფროსის გია მამაკაშვილის ინფორმაციით, მერის წარმომადგენლებს და მის თანაშემწეებს ჩაერიცხათ თანხა ჯილდოს სახით. მისივე თქმით, ე.წ. “მეცამეტე ხელფასი“ კანონმდებლობით აღარ არსებობს.
_ ოზურგეთის მუნიციპალიტეტის მერიაში, წელიწადში ორჯერ ხდება საჯარო მოხელეების შეფასებები. ამ შეფასებების საფუძველზე გაიცემა დანამატი ან ჯილდო. საბოლოო ჯამში, მერის ბრძანებით ხდება დანამატის ან ჯილდოს გაცემა. ოზურგეთის მუნიციპალიტეტის ყველა სოფლის წარმომადგენელს ჩაერიცხა, მაგრამ სხვადასხვა თანხა ჩაირიცხა ჯილდოს სახით. ყველას ჩაერიცხა მისი გაკეთებული საქმეებით და დამსახურებით,“ – გვითხრა მამაკაიშვილმა.
როგორც ჩვენთვის არის ცნობილი, დარიცხულმა თანხამ 40 000 ლარს გადააჭარბა; კონკრეტულ მონაცემს საჯარო ინფორმაციის საფუძველზე გავაცნობთ მკითხველს.
“ერთიანი ნაციონალური მოძრაობის“ წევრი და ოზურგეთის მუნიციპალიტეტის საკრებულოს წევრი ბესო ქათამაძე ამბობს, რომ მნიშვნელობა არ აქვს პრემიას დანამატს დაარქმევ და მეცამეტე ხელფასს – ჯილდოს.
“აქ მთავარი არის ის, რომ კონკრეტულად ვის ეძლევა ჯილდო ან დანამატი სახელი და გვარით არ გაცემენ ინფორმაციას. ოზურგეთის მუნიციპალიტეტის მცხოვრებლებმა ნამდვილად უნდა იცოდნენ იმ ადამიანების სახელი და გვარი, რომლებმაც მიიღეს დამატებითი თანხა მუნიციპალიტეტის ბიუჯეტიდან. ეს არის კანონმდებლობის ხარვეზი და აუცილებლად უნდა გამოსწორდეს, მაგრამ ამისთვის ხელისუფლებას და პარტიას სად სცალია.
მთელი ზაფხული ვამბობდი, რომ ჯილდო ეკუთვნოდათ მეეზოვეებს; ადამიანებს, რომლებიც 200 ლარად გვისუფთავებენ ქუჩებს, ქალაქს სადაც ჩვენ ვცხოვრობთ, სასაცილო ხელფასები აქვთ! სამაგიეროდ, პარტიის “მუქთახორებს“, რომლებიც ა(ა)იპ-ებში ყავთ დასაქმებული და სამსახურშიც კი არ დადიან, აქვთ ხელფასი და დანამატი, ჯილდო… ახლა გავიგეთ, რომ 80 ლარი ჩაურიცხეს მეეზოვეებს და ვფიქრობ, ეს ძალიან უხერხული გადაწყვეტილებაა.
ჯობს, საჯარო მოხელეებზე გაცემული დანამატები და ჯილდოები ისეთ საქმეებში გამოიყენონ, რითაც ხალხს დაეხმარებიან ამ ახალი წლის დღეებში,“.
ა(ა)იპ “ოზურგეთის მუნიციპალური მომსახურების სერვისცენტრის“ დირექტორი თენგიზ ქუტიძე ამბობს, რომ დანამატი ააიპ-ის ადმინისტრაციის თანამშრომლებზე არ გაცემულა:
_ გაიცა იმ პირებზე, ვინც გარეთ მუშაობს დღისით და ღამით, ავდარში თუ დარში… თითოეულ მათგანს ჩაერიცხა 80 ლარი დანამატის სახით. მეტის საშუალება ნამდვილად არ გვქონდა… რის საშუალებაც იყო ამ საახალწლო დღეებში, გავაკეთეთ,“ – ამბობს თენგიზ ქუტიძე.
