მთავრობის მიერ გამოცხადებულმა შეზღუდვებმა სხვადასხვა სფეროს წარმომადგენლებში გარკვეული უკმაყოფილება წარმოშვა, მათ შორის გამონაკლისი არც სასულიერო პირები აღმოჩნდნენ. სასულიერო პირი, რომელიც სოციალურ ქსელში პეტრე კოლხის სახელითაა რეგისტრირებული, საკუთარ ფეისბუქის გვერდზე დაწესებულ შეზღუდვებთან დაკავშირებით საკუთარ გულისწყრომას აფიქსირებს.
„იმ ადამიანის გასაგონად, ვინც ამ გადამლაშებულ შეზღუდვებს, ჩაკეტვებს და იზოლაციებს აწესებს. იმის შიში რატომ არ გაგაჩნიათ, მასობრივად გონების გადაკეტვა რომ მოხდეს, ფსიქიატრიულებიც არ არის, მარტო გადასხმები და უბრალო მედიკამენტები უშველის?! ან სასულიერო პირებზე ვინ იფიქრებს და იზრუნებს?! მღვდელმა წირვა-ლოცვის გარეშე რა ქნას, ოჯახი რითი არჩინოს! ჯერ საჯარო მოხელეები დაითხოვეთ, კერძო და მცირე ბიზნესები გაანადგურეთ, სასულიერო პირმა დამატებითი სამსახური საიდან მოიტანოს! ნუთუ თქვენც გგონიათ, რომ მღვდლების შვილები ჰაერით და ალილუიათი იკვებებიან?! თუ ვინმე გამოირჩევა მრავალშვილიანობით, მათ რიგებში ღვთისმსახურებიც არიან… თუ ტაძრამდე მისასვლელი საშუალებაც არ ექნა, ან წირვას როგორ ჩაატარებს და სხვა ტიპის რიტუალები როგორ შესრულდება. მით უფრო ახლა, როცა ადამიანები არც ქორწინდებიან და არც ინათლებიან… მაინტერესებს, ამ კუთხით ვინმე დაინტერესდა?! თუ მათ ადამინებად არ თვლით და პასუხისმგებლობას იხსნით!.. უამრავი სასულიერო პირის ოჯახი ვიცი, ვინც პურსაც ვერ ყიდულობს და ამ ჩაკეტილ სივრცეში, სხვაც ვერ აწვდის… გზის ფული არა, საჭმლის ფული არა, კომუნალურების ფული არა, სამსახური არა, ეკლესიაც არაო, სად წავიდეთ, ჯანდაბაში?! ვინც მუშაობდა და ახლა უმუშევარი დარჩა-ორასი კარიო!.. ოღონდ მათ რიგებში ჩვენ, შემოსილები არ შევდივართ… ის მაინც გვითხარით, რომელ რიგს მივეკუთვნებით, იქ მაინც ჩავდგებით და დაველოდებით, იქნებ პური მაინც შეგხვდეს!.. დაფიქრდით, სანამ დროა!..“ _ წერს პეტრე კოლხი.
