“# მიეხმარესაქართველოს!” _ პირველმა ჯგუფმა მუშაობა დაასრულა

 ჩოხატაურში, “ივლიტას ბიბლიოთეკაში” უკვე დაასრულა მუშაობა  ტრენინგების ციკლის მონაწილე პირველმა ჯგუფმა. ჯგუფის მონაწილე ოცი ახალგაზრდა გაეცნო დამოუკიდებელი საქართველოს ისტორიაში პირველი არჩევნების ისტორიას, მაშინდელი პოლიტიკური პარტიების, მედიის მუშაობას და დამფუძნებელი კრების არჩევის საინტერესო დეტალებს. ასევე, ახალგაზრდები გაეცნენ დამფუძნებელი კრების ქალი დეპუტატების ბიოგრაფიებს, რუსული საბჭოთა ოკუპაციის ტრაგიკულ ისტორიებს.

_ ოთხი დღის მანძილზე, გავეცანით და პრაქტიკულ ინტერაქტიულ იმიტაციებში ავსახეთ დღევანდელი საქართველოს სახელისუფლებო შტოების ფორმირების, არჩევის წესი, მათი ურთიერთდამოკიდებულების საკითხები; მონაწილეთა ინტერესი გამოიწვია მოქალაქეთა ჩართულობის ფორმალიზებულმა და არაფორმალიზებულმა მეთოდებმა, მონიტორინგის, ადვოკატირების მექანიზმებმა. ყველასთვის სახალისო და საინტერესო აღმოჩნდა მონაწილეების როლური “გარდასახვა” ჟურნალისტებად, პოლიტიკოსებად, საარჩევნო ადმინისტრაციის მოხელეებად, _ ამბობს “Post ალიონის” ტრენერი საარჩევნო საკითხებში, სერთიფიცირებული საარჩევნო მოხელე, ადგილობრივი საჯარო პოლიტიკის მაგისტრი მამუკა მამალაძე.

_ ნებისმიერ მსურველს შეუძლია 6 აგვისტომდე ჩაეწეროს ჯგუფში და გაიაროს სასწავლო კურსი. სასწავლო პროცესი ჯანმრთელობის უსაფრთხოების დაცვის რეკომენდაციების შესაბამისად წარიმართება. ჩვენი პროექტის სახელწოდება და იდეური შინაარსი ჩვენს ჰეშთეგშია ასახული _ “#მიე, ხმა, რა, საქართველოს!” და მიგვაჩნია, რომ ინფორმირებული, მოუსყიდველი და ღირსეული ამომრჩეველი საზოგადოებას უკეთესობისკენ შეცვლის. ვფიქრობ, ეს ოთხი დღე მათთვისაც დასამახსოვრებელი იყო _ ბევრი საინტერესო და მნიშვნელოვანი საკითხი შეისწავლეს ან გაიხსენეს ახალგაზრდებმა, ხოლო სასწავლო პროცესში პრაქტიკული სამუშაოების პროცესში, ბევრი რამ დავგეგმეთ და დანარჩენ ორ ჯგუფთან ერთად, შევეცდებით, ამ გეგმების და იდეების რეალიზება მოვახდინოთ სამომავლოდ, _ ამბობს ია მამალაძე, Post ალიონის” ხელმძღვანელი და ტრენინგების ორგანიზატორი.

საარჩევნო სისტემების განვითარების, რეფორმებისა და სწავლების ცენტრის მიერ მხარდაჭერილი ეს პროგრამა კიდევ ორი ჯგუფის მუშაობას ითვალისწინებს, რომელთაგან ერთი უკვე შეუდგა მუშაობას, ხოლო მესამე _  6-9 აგვისტოს იმუშავებს.  ამ პროექტის მიზანი გურიაში ახალგაზრდა ამომრჩევლის სამოქალაქო კულტურის განვითარების ხელშეწყობაა.