მას შემდეგ, რაც გურიამ მწვანე ზონის სტატუსი დაკარგა, გურულებმა შიშის ნაცვლად, ხუმრობას უმატეს. „საფრთხეს როდის გავურბოდით ჩვენ, ცოტა კი შეგვაქანა, მაგრამ მაგფერიზა გაგვიძლია? მოუოხე არ უნდა მაგას, მალე ვაბრუნებიებთ პირს, გავაცილებთ, ლენგერა ზურგში…“ _ ასე ხუმრობდნენ დღეს ოზურგეთის ქუჩებში ადამიანები, ვისაც „გურია ნიუსი“ გაესაუბრა.
ქუჩებში ჩვეულერივი სიმშვიდეა. მოქალაქეთა ნაწილი პირბადით ღია სივრცეშიც დადის. უფრო პუნქტუალურებს უკეთიათ ხელთათმანებიც, თუმცა, წუხან, რომ ჯერ კიდევ ზაფხულივით ცხელა და ჭირს „შეფუთული“ გადაადგილება.
უმეტესად ადამიანები მაინც ვალუტის გაძვირების შესახებ სვამენ კითხვებს, რადგან პირველ რიგში, ეშინიათ, ყოფითი პრობლემები არ გაუუარესდეთ.
როგორც ე.წ. „ბირჟაზე“ გვითხრეს, დოლარის კურსმა არც ისე ძალიან, მაგრამ მაინც მოიმატა.
_ სამი დღის წინ ას დოლარს თუ იყიდდი 307 ლარად, ახლა 311 ლარი უნდა. არ ვიცით, ხვალ და ზეგ რა იქნება, თუმცა, იმედით ვართ, რომ გაზაფხულზე როგორც გაიქცა კურსი, ახლა ისე არ მოხდება და მალე ყველაფერი თავის ადგილზე დადგება, _ გვითხრეს აქ.
სრული სიმშვიდეა ბანკების წინ. მიუხედავად იმისა, რომ შაბათ დღეს, დილიდან მუშაობენ, კლიენტთა რაოდენობა უმნიშვნელო იყო.
მაღაზია „ლაიქში“, სადაც უამრავი დასახელების სასკოლო ნივთი იყიდება და ასევე, სხვა საქონელიც, მყიდველთა ხალვათობა თვალშისაცმია.
_ ხალხი ეჭვობს, სწავლის დაწყების თარიღი, შესაძლოა, გადაიდოსო და არ დადიან. დღის განმავლობაში ბევრი კლიენტი არ გვყავს. მაგალითად, გასულ წელს, ამ დროს, მყიდველთა მომსახურებას ვერ ავუდიოდით. საქონელს რაც შეეხება, კი ჩამოგვაქვს, თუმცა, ამ ეტაპზე არჩევანი ნაკლებია. მაღაზიაში ვაჭრობის ტემპი არის, მაგრამ შედარებით ნაკლები მყიდველი შემოდის, _ გვითხრეს მაღაზიის მეპატრონეებმა.
_ როგორ იყიდება პრესა? არის თუ არა მკითხველი აქტიური, რომელიც ვირუსის გავრცელების პირველ ეტაპზე, გაზაფხულზე, უცებ მოდუნდა და ქუჩაში ნაკლებად გამოდიოდა?
_ ჩვენს მკითხველებს ამჯერად აქტივობა არ შეუწყვეტიათ. რაც კორონა გურიაში გამოჩნდა, პირიქით, უფრო კითხულობენ. გაზაფხულზე კი ნახევარზე მეტი გაუყიდავი დაგვრჩა, _ გვითხრეს „საქპრესის“ ჯიხურში.
ყველაზე დიდი აქტივობა „ბიბლუსის“ მაღაზიაში იყო. ოზურგეთში, დღის განმავლობაში რიგი მხოლოდ აქ იდგა. პირბადეებით მოსილი ახალგაზრდები ამბობდნენ, რომ სასკოლო ნივთებს, ძირითადად, რვეულებს, საწერ კალმებს და წიგნებს ყიდულობდნენ.
სოფელ ნატანების მკვიდრი, ოთხი ვაჟის დედა, 35 წლის ქალბატონი ნინო ჭიჭინაძე, „ბიბლუსიდან“ გამოვიდა შვილებთან ერთად. ეტყობოდათ, კმაყოფილები იყვნენ:
_ ოთხი ვაჟი მყავს. სამი სასკოლო ასაკისაა. წამოვიყვანე, რომ ნივთები თავად აერჩიათ. ვირუსის მიმართ სიფრთხილეს ზომაზე მეტადაც კი ვიჩენთ, თუმცა, შიშისგან არ ვკანკალებთ. მინდა, შვილებს ლამაზი სასწავლო წელი ჰქონდეთ, _ გვითხრა ქალბატონმა ნინომ.
_ უიი, ისე მეშინია, შეფუთული დავდივარ ღია სივრცეშიც. ახლა უახლოესი ადამიანის პანაშვიდზე მივდივარ. ასეთ დროს კორონა ვერ დამაბრკოლებს, თუმცა, ძალიან ვფრთხილობ. დისტანციასაც ყოველ ფეხის ნაბიჯზე ვიცავ, _ გვითხრა პედაგოგმა ნანა მამინაშვილმა.
ოზურგეთის ბაზარში, შესასვლელ კართან, გამოკრულია „კოვიდ-19“-თან დაკავშირებული რეგულაციები. იქვე ატარებენ თერმოსკრინინგს.
მართალია, დისტანციის დაცვის მიმართ დიდი სიფრთხილე არ იგრძნობა ქუჩებში, თუმცა, თუ სამიოდე თვის წინანდელ კადრებს გადავავლებთ თვალს, ვნახავთ, რომ უფრო აჟიტირებული და დიდი როდენობით ადამიანი იყო ქუჩებში გამოსული, თითქოს, რაღაცის მოსწრებას ცდილობდნენ. შეინიშნება ინდიფერენტული დამოკიდებულებაც.
ლელა მენაბდე, დიასახლისი: ვფიქრობ, ტესტირებამ გამოავლინა ბევრი ადამიანი და მიმაჩნია, რომ საშუალება რომ ყოფილიყო და ეს რომ ჩატარებულიყო გაზაფხულზე, ალბათ, ახლა თუ 158 ადამიანს აღმოაჩნდა, მაშინ 558 იქნებოდა. რა ვიცი, ჩემი აზრი ასეთია. სიფრთხილეს თავი არ სტკივა. ატაროს ყველამ ეს პირბადე, ნამეტანი მძიმეა თუ ყურებს ტკენს ვინმეს?
თეონა ლომჯარია, 38 წლის: შიში ნაკლებად მაქვს. ვიჩენ სიფრთხილეს, რაც სისუფთავესა და პირბადის ტარებაში გამოიხატება. მოსწავლეების დედა ვარ და ერთგვარი მოუსვენრობაც მჭირს _ რა იქნება და როგორ. თუმცა, უნდა გავაკეთოთ მაქსიმუმი, რომ თავადვე შევქმნათ უსაფრთხო გარემო.
გრიგოლ მახარაძე, პენსიონერი: ასაკიანი კაცი ვარ და ბევრი გასაჭირი გამომივლია. მთავარი ის არის, ადამიანები ერთმანეთს დავუდგეთ გვერდით. პანიკამ არ უნდა აგვიტანოს. იმედი ვუთხრათ ერთმანეთს, მეტი ინფორმაცია გავიგოთ და ვინც ვერ ერკვევა, განვუმარტოთ. არაა ეს მოურეველი სენი. პირიქით, „ძალად მაცხონეა“. შემოვარდა საიდანღაც, ადამიანთა დაუდევრობით უფრო და უნდა ავიცილოთ თავიდან მისი შემოტევა. თანადგომით, რეგულაციების გათვალისწინებით, ყველაფრი დაიძლევა. სასტიკი ომები მოიგეს ადამიანებმა, კორონას დამარცხებას რა უნდა, თუ გონებას დავატანთ? _ გვითხრა ასაკოვანმა ადამიანმა, რომელმაც ვირუსის დამმარცხებელ საშუალებად, ვაქცინაზე მეტად, ურთიერთთანადგომა და სიყვარული მიიჩნია.
