,,გამომდინარე იმ ინსტრუმენტიდან, რაც პროცესებზე დაკვირვებისთვის ევროკავშირს აქვს, ისინი მეტ-ნაკლებად ლოიალურად უყურებენ მიმდინარე პროცესს. ხელისუფლებას აძლევენ გარკვეულ შანსს იმისთვის, რომ პროცესის დეესკალაციის მიმართულებით ნაბიჯები გადაიდგას“, _ ასე გამოეხმაურა, ექსპერტი გია ხუხაშვილი ევროკავშირის წარმომადგენლების და მათ შორის, ჟოზეფ ბორელის განცხადებას ინტერპრესნიუსთან საუბრისას.
„ვფიქრობ, შიგნით საკმაოდ სერიოზული საუბრები მიდის, არა მხოლოდ არჩევნებთან დაკავშირებით, არამედ პოლიტიკურ მართლმსაჯულებაზე და სხვა საარჩევნო პრობლემებზე. გამომდინარე იმ ინსტრუმენტიდან, რაც პროცესებზე დაკვირვებისთვის ევროკავშირს აქვს, ისინი მეტ-ნაკლებად ლოიალურად უყურებენ მიმდინარე პროცესს. ხელისუფლებას აძლევენ გარკვეულ შანსს იმისთვის, რომ პროცესის დეესკალაციის მიმართულებით ნაბიჯები გადაიდგას. ასეთი ავანსი მათი მხრიდან გაცემულია. კონკრეტულად რა ხდება, გამიჭირდება ამის თქმა, ალბათ, ეს დანიელსონის შეთახმების საბოლოო ფორმულაში გამოჩნდება და კულისური დიალოგის შედეგები აისახება“, _ განაცხადა ხუხაშვილმა.
რაც შეეხება ირაკლი ღარიბაშვილის მიერ ბრიუსელში გაკეთებულ განცხადებებს, ხუხაშვილის თქმით, ღარიბაშვილი თბილისში ჩაბუდებულ უკომპრომისო ქორებს ხარკს უხდის
„ღარიბაშვილი გარკვეულწილად ხარკს უხდის ისევ თბილისში ჩაბუდებულ უკომპრომისო ქორებს და მისი განცხადებები გასაგებია. თუმცა უნდა გვესმოდეს, რომ ეს განცხადებები შეიძლება შეიცვალოს, შეიძლება არც შეიცვალოს. ოპოზიციას ჰქონდა უფრო მაჟორული მოლოდინები და ეს არ გამართლდა. ოპოზიციას არ ესმის მარტივი რამ, რომ ბრიუსელი უპირობოდ მხარე ვერ გახდება. რატომღაც ოპოზიციას ჰქონდა მოლოდინი, რომ ბრიუსელი გახდებოდა მხარე, უარყოფდა თავისივე სადამკვირვებლო ინსტიტუტების დასკვნას და ხელისუფლებას ხელების გადაგრეხვით დაუწყებდა ლაპარაკს. არ შეიძლება ეს მომხდარიყო, ეს იყო ილუზია. შექმნეს მოლოდინები, რაც არ გამართლდა. გუშინდელი დღე გაფორმდა ოპოზიციის უფრო დამარცხებად, ვიდრე გამარჯვებად. საღად რომ შევხედოთ, რა უნდა ეთქვა ევროპას, რა უნდა ეთქვა ბორელს. როდესაც მას უდევს ეუთო-ს დასკვნა არჩევნებთან დაკავშირებით და ოპოზიციას კონტრარგუმენტები არ წარმოუდგენია. წარმოადგინეს რამე, გარდა რწმენისა, რომ არჩევნები გაყალბდა? არ იმუშავეს საერთოდ იმაზე, რომ კომპეტენტური საბრალდებო დასკვნა დაედო არჩევნებთან დაკავშირებით. სიტყვაზე ნდობის დონეზე დარჩა ოპოზიცია და ეს დრო ფუჭად დაკარგა. ასე რომ, ყველაფერი კანონზომიერად ხდება, თუმცა ეს იმას არ ნიშნავს, რომ ხელისუფლებას პრობლემები არ აქვს. რა თქმა უნდა, აქვს პრობლემები და თან სერიოზული. დანარჩენს დანიელსონის საბოლოო შეთავაზებაში ვიხილავთ, რა ხდებოდა რეალურად კულისებს მიღმა“, _ განაცხადა გია ხუხაშვილმა.
შეგახსენებთ, რომ საგარეო პოლიტიკისა და უსაფრთხოების საკითხებში ევროკავშირის უმაღლესი კომისარის ჟოზეფ ბორელის განცხადებით, მასზე არაა დამოკიდებული იმის გადაწყვეტა, უნდა იყოს თუ არა საქართველოში ახალი არჩევნები.
