მიუხედავად იმისა, რომ ხელისუფლების მხრიდან საკმაოდ დიდი თანხები იხარჯება ინფრასტრუქტურის კუთხით, ფაქტია, რომ სოფლებში ამ მიმართულებით მაინც საკმაოდ მწვავედ დგას პრობლემები, რაც უპირველესად მიუთითებს გაკეთებული საქმის არაეფექტიანობაზე.
ბევრგან მოსახლეობა ხაზგასმით აღნიშნავს, რომ სოფლებში გზები უვარგისია და არის შემთხვევები, როცა შესაბამისი რეაბილიტაციის გასახორციელებლად თანხები დაიხარჯა, პრობლემა კი მაინც მოუგვარებელი დარჩა.
ამის ერთ-ერთი დასტურია ჩოხატაურის მუნიციპალიტეტის სოფელი შუა ამაღლება. ერთ-ერთი ადგილობრივი ნანა ჟღენტი ფეისბუქის საკუთარ გვერდზე სოფლის გზაზე გადაღებულ ფოტოებს აქვეყნებს, რომელზეც “გურია ნიუსი” ჰყავს მონიშნული. ფოტოზე ნათლად ჩანს, უამინდობისას თუ რა მდგომარეობაშია სოფლის გზის გარკვეული მონაკვეთი.
“რაღაც ახალი მდინარეა; გაუშვით კობრი; პორტი რომ გახსნათ; შავ ზღვას მხარი ეცვალა; გემი თუ მოადგა ახლა უკან, მერე ნახე შენ; ამფერია, კაცი დოუნახავი რომ იქნები”, _ ასეთი მწარე იუმორით ეხმაურებიან სოციალურ ქსელში ნანა ჟღენტის მიერ გამოქვეყნებულ ფოტოს.
აღნიშნული პრობლემა ახალი არ არის _ შუა ამაღლების მცხოვრებლებმა დახმარების თხოვნით “გურია ნიუსს” გასული წლის ზაფხულშიც მომართეს და აქცენტს სწორედ უხარისხოდ შესრულებულ სამუშაოებზე აკეთებდნენ.
“რაც გაკეთდა, ყველაფერი უხარისხოდაა გაკეთებული. გზა გააკეთეს ვითომ, ისიც უხარისხოდ, თან _ სანახევროდ.
წვიმაში მესტუმრეთ და ნახავთ, ჭიშკართან გავლას თუ შეძლებთ. ამას ჯობდა, 200 მეტრი გაეკეთებინათ და ხარისხიანად. ნამდვილად უკეთესი იქნებოდა.
სუფსიდან ამოღებულ ხრეშს გვამადლიან, ერთი-ორი გაწვიმება და წყალს ისევ სუფსაში ჩააქვს, რასაც დაყრიან. ახლა გათხარეს არხები, ჩაყარეს მილები, მაგრამ რა აზრი აქვს _ მილი ზევითაა, არხი _ ქვევით; თან, არხი გზის ცალ მხარეს გაჭრეს”, _ ამბობდნენ მაშინ “გურია ნიუსთან” საუბარში ადგილობრივები.
როგორც ირკვევა მდგომარეობა ახლაც უცვლელია და წვიმაში ჭიშკრებამდე მისვლა ისევ ძნელი საქმეა.
გარდა უგზოობისა, ადგილობრივებს უწყლობაც აწუხებთ. მათი თქმით, წლის ზიდვა ბიდონებით ხან შუა ამაღლების სკოლის ეზოდან და ხანაც სხვადასხვა სოფლებიდან უწევთ. ამბობენ, რომ აღნიშნულის თაობაზე მუნიციპალიტეტის მერიას განცხადებით ჯერ კიდევ 2019 წელს მიმართეს, საიდანაც პასუხად მიიღეს, რომ პრობლემა მაშინ მოგვარდებოდა, როცა მუნიციპალიტეტს ამის საშუალება გამოუჩნდებოდა.
“როცა მუნიციპალიტეტს ექნება საშუალება, მაშინ დაგაკმაყოფილებთ წყლითო, _ გვითხრეს, _ ამობენ შუა ამაღლების აღნიშნული უბნის მცხოვრებლები რომლებიც დღემდე მოლოდინის რეჟიმში არიან.
ადგილობრივთა განმარტებების მიხედვით, სოფელში, სადაც 300 კომლი ცხოვრობს, წყლის რესურსი საკმარისია, თუმცა, პრობლემა თავის დროზე უხარისხოდ შესრულებულმა სამუშაოებმა წარმოშვა: “წყლის რესურსი იმდენია, რომ თითო ოჯახზე ტონა წყალი მაინც მოდის. ეს სოფელს მთლიანად აკმაყოფილებდა, მაგრამ ცენტრს იქეთ წყალი აღარაა. ადრე გვქონდა წყალი, მაგრამ უხარისხო მილებით გაკეთდა და მალევე გაფუჭდა. ქვიშნარაზეა “ბასეინი”. ავიდოდით იქ, გავაკეთებდით, ჩამოვიდოდით, ისევ გაფუჭდებოდა და თავიდან იწყებოდა. ბოლოს სულ გაფუჭდა და წლებია, სოფელს წყალი აღარ მიეწოდება”, _ ამბობს უწყლობით შეწუხებული მოსახლეობა.
“გურია ნიუსი” სოფელ შუა ამაღლების მოსახლეობის მხრიდან გაჟღერებული პრობლემების თაობაზე განმარტებებისთვის სოფლის მაჟორიტარ დეპუტატს ჩოხატაურის საკრებულოში ვლადიმერ სიხარულიძეს დაუკავშირდა.
სიხარულიძის თქმით, გზებთან დაკავშირებით, სოფელ შუა ამაღლებაში, მიმდინარე წელს ორი დიდი პროექტის გახორციელება იგეგმება. რაც შეეხება კონკრეტულ უბანს, რომელზეც წერილის დასაწყისში გვაქვს საუბარი, სიხარულიძე ამბობს, აქაურობა თავად მოსახლის მხრიდან საჭიროებს ელემენტარულ მოწესრიგებას:
“იქ, სადაც წყალი დგება, ჩვენ მეტს ვერაფერს ვიზამთ _ არხებიც გაკეთებულია და ყველაფერი. არხი არის ერთ ადგილას გასაწმენდი თავად ერთი კონკრეტული მოსახლის მხრიდან. არ იტბორება აქაურობა, წყალი მთელ გზაზე არ დგება. როცა წვიმს, მაშინ ხუთი-ათი წუთით დგება წყალი _ არ ატარებს ის არხი წყლის დიდ რაოდენობას. იქ არის 600-იანი მილი, გვერდით 300-იანი მილი, რომელიც გაუწმენდავია, ამიტომ უჭირს წყლის გატარება. მოსახლემ უნდა გაწმინდოს”, _ ამბობს სოფლის წარმომადგენელი ჩოხატაურის საკრებულოში.
რაც შეეხება უწყლობას, ვლადიმერ სიხარულიძე ადასტურებს, რომ შუა ამაღლების მოსახლეობას წლებია, აწუხებს ეს საკითხი. მისი თქმით, მთლიანად ქსელია გამოსაცვლელი, რისთვისაც მილიონ ლარამდე თანხაა საჭირო:
“სოფელში 300 კუბური მეტრი მოცულობის ავზებია, წყალი საკმარისია. ამ დროისთვის სოფლის ნაწილს ტექნიკური წყალი მიეწოდება. დაახლოებით, მილიონი ლარია საჭირო ქსელი რომ მოწესრიგდეს, 23 კმ-ზე მილებია ჩასაყრელი. მუნიციპალურ ფონდთან მიმდინარეობს ამაზე მუშაობა”, _ გვითხრა სიხარულიძემ.
