შვედურ-ბრიტანული კომპანიის მიერ წარმოებული COVID19-ის საწინააღმდეგო ვაქცინის “ასტრაზენეკას” პირველი პარტიის 43 200 დოზა საქართველოში 13 მარტს, დილით ჩამოვიდა. აქედან ვაქცინის 300 დოზა ლანჩხუთის მუნიციპალიტეტს ერგო, რომელიც საზოგადოებრივი ჯანდაცვის ცენტრის მაცივრებში იმავე დღეს მოთავსდა. თუმცა, “გურია ნიუსს” წყარომ მიაწოდა ინფორმაცია, რომ ლანჩხუთის ჯანდაცვის ცენტრში მოთავსებული ვაქცინის ნაწილი, შემოტანიდან რამდენიმე დღეში, გაფუჭდა.
ვაქცინის შემოტანამდე ლანჩხუთის მუნიციპალიტეტის მერი, ალექსანდრე სარიშვილი საზოგადოებრივი ჯანდაცვის ცენტრს პირადად სტუმრობდა, იქაურ თანამშრომლებს შეხვდა და მაშინ მათთან ერთად covid 19-ის შემთხვევების მატებასთან დაკავშირებით სხვადასხვა საკითხი განიხილა. მერმა მაშინდელი სტუმრობისას საზოგადოებრივი ჯანდაცვის ცენტრში ის მაცივრებიც მოინახულა, სადაც კოვიდვაქცინა უნდა შენახულიყო.
“ამასთან დაკავშირებით ლანჩხუთში შესაბამისი სამსახური სრულ მზადყოფნაშია და ყველაფერი კეთდება იმისათვის, რომ “ცივი ჯაჭვის” პრინციპი შენარჩუნებული იყოს”, _ ვკითხულობთ მერიის ოფიციალურ გვერდზე გამოქვეყნებულ მაშინდელ ინფორმაციაში.
საგულისხმოა, რომ 17 მარტიდან, ლანჩხუთში ვაქცინაციის პროცესი, ჯანდაცვის სამინისტროს მიერ შერჩეულ “მედალფას” კლინიკაში დაიწყო. ეროვნული გეგმის შესაბამისად, ვაქცინა ლანჩხუთშიც სამედიცინო პერსონალს გაუკეთდა და ამ პროცესმა სულ ორ დღეს გასტანა. ახალციხეში მომხდარი შემთხვევის შემდეგ კი, როცა კორონავირუსის საწინააღმდეგო აცრიდან, დაახლოებით, 30 წუთში ექთანი კომაში ჩავარდა და ექიმებმა მისი გადარჩენა ვერ შეძლეს, ვაქცინაციის პროცესში შევიდა გარკვეული ცვლილებები _ აცრების გაკეთება მხოლოდ იმ კლინიკებში დაიწყო, რომლებიც გარკვეულ კრიტერიუმებს აკმაყოფილებდნენ. ასეთად კი, გურიის მასშტაბით, ოზურგეთის სამედიცინო დაწესებულება შეირჩა.
როგორც “გურია ნიუსს” წყარო ეუბნება, სწორედ იმ დროში, სანამ ვაქცინაციის პროცესი ლანჩხუთიდან ოზურგეთში გადაინაცვლებდა, ვაქცინის ნაწილი, რომელიც ლანჩხუთის საზოგადოებრივი ჯანდაცვის ცენტრის მაცივრებში იყო მოთავსებული “ცივი ჯაჭვის” პრინციპის შესანარჩუნებლად, უბრალოდ, გაფუჭდა. წყაროსვე მტკიცებით, “ასტრაზენეკას” იმ 300 დოზიდან, რომელიც ზემოთ ნახსენები უწყების მაცივრებში მოთავსდა, 150 ცალი ვაქცინა შუქის გამორთვის გამო გამოსაყენებლად უვარგისი გახდა.
ინფორმაციის გადამოწმებისა და ფაქტთან დაკავშირებით განმარტებებისთვის “გურია ნიუსი” საზოგადოებრივი ჯანდაცვის ცენტრის ხელმძღვანელს, ნატო მენაღარიშვილს დაუკავშირდა. იგი ამ ფაქტს არ ადასტურებს და ამბობს, რომ მსგავსს შემთხვევას ლანჩხუთში ადგილი არ ჰქონია:
“ვაქცინები ჩვენთან არ გაფუჭებულა. ვაქცინაციის პროცესის დაწყებისთანავე, საჭირო რაოდენობის ვაქცინა გადაიტანეს “მედალფას” კლინიკაში. ორი დღე მიმდინარეობდა ეს პროცესი ლანჩხუთში და სულ 20 პირს გაუკეთდა აცრა. შემდეგ, შექმნილი მდგომარეობის გამო, რაიონული ცენტრებიდან ეს ვაქცინები ამოიღეს და რეგიონულ ცენტრებში გადაიტანეს. მანამდე ეს ვაქცინები ჩვენს ცენტრში ინახებოდა და ნამდვილად არ ვადასტურებ, რომ ვაქცინა გაფუჭდა”, _ განმარტავს ნატო მენაღარიშვილი.
ვაქცინის თემასთან დაკავშირებით “გურია ნიუსი” შეეცადა განმარტებები მუნიციპალიტეტის პირველი პირისგანაც მოესმინა, რომელიც, როგორც ამბობენ, მომხდართან დაკავშირებით საქმის კურსშია და მცდელობას არ აკლებს, რომ ფაქტი არ გახმაურდეს. თუმცა, ალექსანდრე სარიშვილს ბოლო პერიოდში, რატომღაც, ტრადიციად ექცა, რომ ჩვენი სატელეფონო ზარები უპასუხოდ დატოვოს.
იმის გასარკვევად, თუ როდის და რა რაოდენობის კოვიდვაქცინა გადაიტანეს ლანჩხუთის საზოგადოებრივი ჯანდაცვის ცენტრიდან რეგიონულ ცენტრში, ამისთვის გურიის მთავარ ეპიდემიოლოგს არჩილ მჟავიას მივმართეთ.
მჟავია ამბობს, რომ გურიაში, ამ ეტაპისთვის, ვაქცინაციის პროცესი მხოლოდ ოზურგეთის “მედალფას” კლინიკაში მიმდინარეობს. რაც შეეხება ვაქცინის იმ დოზას, რომელიც ლანჩხუთისთვის იყო განკუთვნილი, მჟავიას თქმით, მათი გადმოტანა რეგიონულ საზოგადოებრივ ჯანდაცვის ცენტრში არ მომხდარა _ “ეს დოზები ცენტრალურმა დონემ წაიღო”, _ გვითხრა მჟავიამ.
ჩვენ ამ საკითხზე გურიის გუბერნატორს გიორგი სახოკიას დავუკავშირდით:
“მსგავსი ინფორმაცია ჩემამდე არ მოსულა”, _ გვითხრა გიორგი სახოკიამ.
