10 ივლისს, გურიაში, კერძოდ, დაბა ნარუჯაში, კენკროვანი კულტურების ფორუმი „გურია 2021“ გაიმართა.
ფორუმს ამერიკის ელჩი საქართველოში, კელი დეგნანი, სოფლის მეურნეობის მინისტრი ლევან დავითაშვილი, პარლამენტის აგრარული კომიტეტის თავმჯდომარე, ნინო წილოსანი, ასევე კენკროვანი კულტურების გაშენებაში ჩართული პირები, ფერმერები, მხარის რწმუნებული და სხვა ხელმძღვანელი პირები ესწრებოდნენ.
სოფლის მეურნეობის მინისტრმა, ლევან დავითაშვილმა განაცხადა, რომ გურია კენკროვანი კულტურების გაშენებით ლიდერობს. მინისტრმა ისაუბრა მიღწევებისა და გამოწვევების შესახებ.
„ბოლო ორი წელია, ხორციელდება ექსპორტი. წელს 4 მილიონ 300 ათასი ტონა იყო ექსპორტი საქართველოდან. 700 ტონას გადააჭარბა ლურჯი მოცვის მოსავალმა. არსებობს უამრავი გამოწვევა. ერთ-ერთი ფერმერებთან კომუნიკაციაა, რასაც უნდა მივაღწიოთ მეტი მუშაობით. სახელმწიფოს მხრიდან უკვე დაფინანსებულია 2500 ჰექტრამდე ახალი, თანამედროვე კენკროვანი კულტურების ბაღების გაშენება, სადაც სახელმწიფოს თანადაფინანსება 45 მილიონ ლარს შეადგენს, ჯამური ინვესტიცია კი, 60 მილიონ ლარს აღემატება”, _თქვა დავითაშვილმა.
შეხვედრის მონაწილეებს ესაუბრა ამერიკის ელჩი, კელი დეგნანი. ელჩის თქმით, კენკროვანი კულტურები საქართველოში ძალზე კარგად ვითარდება.
_მაღალია საექსპორტო ღირებულება. ამიტომ საჭიროა კიდევ უფრო ამაღლდეს ხარისხი და შესაბამისად გაიზარდოს მოსავლიანობა, დასაქმდეს მეტი ადამიანი და გაძლიერდეს ეკონომიკა. ჩემთვის ძალიან საინტერესო და გასახარი იყო ის ფაქტი, რომ ორი წლის წინ 500 ათასი დოლარის ექსპორტი იყო, ახლა კი 4 მილიონ დოლარს გადააჭარბა. ჩვენ გავაგრძელებთ საქართველოს სოფლის მეურნეობისთვის დახმარებას,“ _ განაცხადა ელჩმა.
პარლამენტარმა ნინო წილოსანმა ისაუბრა გურიაში კენკროვანი კულტურების გაშენების ზრდის პროცესზე და თქვა, რომ უხარია ის, რომ გურიაში სოფლის მეურნეობის მხრივ, ხდება მძლავრი ეკონომიკური განვითარება.
სოფლის მეურნეობის განვითარების სააგენტოს დირქტორმა, ილია თამარაშვილმა ისაუბრა, თუ რა წარმატებები აქვს 2013 წლიდან სააგენტოს ამ მიმართულებით მუშაობაში. მან თქვა, რომ ამოქმედებულია „კარდაკარი“ და დადიან მოსახლეობაში.
თამარაშვილმა აღნიშნა, რომ 88 ბენეფიციარმა მიმართა სააგენტოს.
დასასრულს გაიმართა პანელური დისკუსია, ჩაის ბრენდ „გურიელის“ დირექტორის მიხეილ ჭკუასელის მიერ. მან აქტიურად და დაუღალავად ისაუბრა კენკრის სექტორის განვითარებაზე, თუმცა, დარბაზში 20-მდე ადამიანი იმყოფებოდა და აქედან ზოგი სტუმარი, ზოგიც მხარის ადმინისტრაციის წარმომადგენლები იყვნენ.
„დამიფინანსე ჩაიც მოცვის მსგავსად, და არა იმ პროგრამით, რასაც დღევანდელი „ჩაის რეაბილიტაციის პროგრამა“ ჰქვია, … „რეგიონში მოცვი ჩაის ვერ ჩაანაცვლებს“- ასეთია საქმეში ჩახედულ და რეგიონის სპეციფიკის მცოდნე ბევრი გურული ფერმერის აზრი.
ჩატარდა ფორუმი, თუმცა ასეთი ფორმატით როგორ მივა ხალხთან ინფორმაცია, რა სახის კომუნიკაცია გაგრძელდება მხარის მოსახლეობასთან, რომლის ეკონომიკურ ყოფას და სოციალურ ფონს ეკონომიკური სასიკეთო ცვლილება არანაირად არ ეტყობა; რა უხარია პარლამენტარს, რომელიც აცხადებს, რომ გურიაში სოფლის მეურნეობა მძლავრ ეკონომიკურ წინსვლას განიცდის; რას უპასუხებენ ხალხს, რომელიც მიიჩნევს, რომ მოცვის კულტურის გაშენებაც (ასევე სხვა კულტურებისაც) უნდა მოხდეს, თუმცა, ჩაის ანალოგიური დაფინანსება რომ მოხდეს, გაცილებით უკეთესი ეკონომიკური მდგომარეობა ექნება რეგიონს.. _ „გურია ნიუსმა“ ეს კითხვები დასვა ფორუმზე მინისტრთან, , პარლამენტართან , მოცვის გაშენებით დასაქმებულ პირებთან, რაზეც მალე ვრცელ სტატიაში გესაუბრებით.
ინფორმაციისთვის, აღნიშნული ფორუმი რეგიონში პირველად ჩატარდა. როგორც წარდგენაზე თქვეს, „თიბისი ბანკის„ და „იუსაიდის“ ერთობლივი პროექტით მოხდა.
ავტორი: მარინა ჩიხლაძე
