გაზრდილი ხარჯების დაფინანსება დამატებითი ღირებულების გადასახადის ზრდის ხარჯზე

ლანჩხუთის საკრებულოს წევრებს მერის წინადადების საფუძველზე  რიგგარეშედ მოუწიათ სხდომის გამართვა, რომელსაც საკრებულოს თავმჯდომარე ბესიკ ტაბიძე უძღვებოდა.

რიგგარეშე სხდომის დღის წესრიგი ერთი საკითხისგან შედგებოდა და ის  2021 წლის ბიუჯეტის დამტკიცების დადგენილებაში ცვლილების შეტანის თაობაზე ადმინისტრაციული წარმოების დაწყებას  ეხებოდა.

მერიის საფინანსო-საბიუჯეტო სამსახურის მიერ მომზადებული მოხსენებითი ბარათით საკრებულოს წევრების წინაშე სამსახურის უფროსი როლანდ ლაშხია წარსდგა და დეტალურად განმარტა ბიუჯეტში დაგეგმილ ცვლილებებთან დაკავშირებით.

ლაშხიას თქმით, მთავრობის განკარგულებით ლანჩხუთის მუნიციპალიტეტს დამატებით გამოეყო 460 ათასი ლარი, რაც მოქალაქეების დაზიანებული სახლებისთვის პროფნასტილის მასალის შესაძენადაა განკუთვნილი.

ამავე მოხსენებითვე, რიგი სამსახურების მომართვების საფუძველზე გადაწყდა, რომ საფეხბურთო სკოლის საქონლისა და მომსახურების მუხლი 40 ათასი ლარით გაიზარდოს. სპეცტექნიკის შესაძენად 80 ათასი ლარით იზრდება  მუნიციპალიტეტის გარე განათების არაფინანსური აქტივების მუხლი. ხოლო ორი ათასი ლარით ჯანდაცვის ობიექტების ღონისძიებების არაფინანსური აქტივების მუხლი.

საფინანსო სამსახურის განმარტებითი ბარათის მიხედვით, ირკვევა, რომ საქართველოს მიმდინარე წლის ბიუჯეტში ცვლილების განსახორციელებლად პარლამენტშია წარდგენილი და დამატებითი ღირებულების გადასახადის ზრდასა და ქონების გადასახადიდან მისაღები შემოსავალის შემცირებას ისახავს მიზნად.

კანონპროექტის საფუძველზე გადამუშავებული ფისკალური პროგნოზების შესაბამისად ლანჩხუთის მუნიციპალიტეტის გადასახადებიდან მისაღები შემოსავლების საპროგნოზო მაჩვენებელი 9211,1 ათასი ლარითაა განსაზღვრული. მათ შორის, დამატებითი ღირებულების გადასახადი  8211,1 ათასი ლარი, ანუ  690,8 ათასი ლარიანი ზრდაა ამ კუთხით. ქონების გადასახადიდან მისაღები შემოსავალი კი 1000,0 ათასი ლარით განისაზღვრებაა, ანუ 300,0 ათასი ლარით მცირდება.

მერიის განმარტებით, გაზრდილი ხარჯების დაფინანსება უზრუნველყოფილი იქნება დამატებითი ღირებულების გადასახადის ზრდის ხარჯზე.