დღეს, ოზურგეთში ერთი კილოგრამი თხილის ფასი 3,30 („გულშიშველა“) და 3, 80 ლარია („ბერძნულა“).
წინა თვესთან შედარებით, საგრძნობლად დაწეული ფასის წინსვლას ამაოდ ელოდებიან, სოფლებიდან თხილის ტომრებით ჩამოსული ადამიანები.
წყალს გაჰყვა ცოტა ხნის წინანდელი დაპირებაც, თითქოს, „გულშიშველასა“ და ბერძნულას“ შორის, ფასის სხვაობა იქნებოდა ზუსტად ერთი ლარი. დღეისთვის ამ ორ სახეობას შორის, მინიმალური სხვაობაა, 40-50 თეთრი.
თხილის მიმღებ პუნქტებშიც სხვადასხვა, „თვითგამოცხადებული წესები“ მოქმედებს. ჩაბარების დროს , ზოგან ტეხენ თხილს და საღი გულის მიხედვით, ცალში 50 თეთრს იხდიან. ზოგან ამ მეთოდს არ იყენებენ და გარეგნული დათვალიერებით ამოწმებენ თხილის ხარისხს.
ფასით უკმაყოფილო მოქალაქეები გამუდმებით სვამენ კითხვას_ აიწევს თუ არა თხილის ფასი თუ კვლავ 15-20 წლის წინანდელ ნიშნულზე დარჩება?
_ ყველაფერი როგორ გაძვირდა, ვხედავთ. ბოსტნეულის და ხილის ფასი გაორმაგდა, სულ ცოტა. ამ თხილის ფასს კი ყოველდღე უკან მიაქანებენ. ამ საქმეს დღეს საერთოდ არ ექცევა ყურადღება. საარჩევნო რეკლამისთვის გაახმოვანებენ ერთხელ და მორჩა, _ ამბობენ თხილის ჩასაბარებლად რიგში მდგომი მოქალაქეები.
კითხვაზე _ რამდენ დღეში, როდის შეიძლება ფასის მატება მოხდეს, თხილის მიმღები ოპერატორები ზოგადი პასუხით შემოიფარგლებიან: „ცოტა დაიცადეთ, ასე, 25 სექტემბრამდე მაინც. თვის ბოლოს ნამდვილად მოიმატებს, _ ამბობენ ისინი.
_ მანამდე გაჭირვებული კაცი კი ჩააბარებს თავის თხილს და მაგ საოცნებო ფასს, ალბათ, თვითონ ელოდებიან. მოაგროვებენ ახლა და მერე იხეირებენ. მოსახლეობაში მცირე ნაწილი თუ ინახავს თხილს შემოდგომის ბოლომდე. ეს სისტემა ვიღაცას კარგად აქვს შექმნილი. იციან, ხალხს უჭირს, უმეტესობა აბარებს. აბა, თუ თხილს ხარისხის გამო აქვს დაბალი ფასი, ელემენტარული ლოგიკაა, დაბალ ფასად ჩაბარებული, ორი თვის ან ცოტა მეტი დროის გასვლის შემდეგ, რატომ ღირს ორმაგი და ზოგჯერ უფრო მეტიც? თავად ხომ, ძირითადად, მერე აბარებენ ეს შემსყიდველებიც. არაფერი არ გვეშველება, თხილის მაფიას ვერავინ ალაგმავს, _ გვითხრეს, როგორც ადგილობრივმა, ისე ჩოხატაურიდან თხილის ჩასაბარებლად ჩამოსულმა მოქალაქეებმა: ნაირა დოლიძემ, მაყვალ სალუქვაძემ და ნორა გოგოლაძემ.
ცნობისთვის: ბოლო ერთი კვირაა, ოზურგეთში თხილის ფასი არ შეცვლილა. როგორც ვთქვით, „გულშიშველა“ 3,30 ლარი ღირს და „ბერძნულა“ _ 3, 80 ლარი.
[sexy_author_bio]
