გუშინ ცნობილი გახდა, რომ უახლოეს მომავალში საქართველომ შეიძლება ძიუდოისტთა მსოფლიო პირველობას უმასპინძლოს.
ამ დღეებში ხორვატულ ზაგრებში ძიუდოისტთა საერთაშორისო ტურნირი იმართებოდა. შეჯიბრებას საქართველოს ძიუდოს ფედერაციის პირველი ვიცე-პრეზიდენტი დავით ქევხიშვილიც ესწრებოდა, რომელმაც ასპარეზობის დასრულების შემდეგ საყურადღებო განცხადება გააკეთა.
„კარგი წინსვლა გვაქვს სხვადასხვა პროექტებთან და პროგრამებთან დაკავშირებით, რაც ძიუდოს საერთაშორისო ფედერაციის პრეზიდენტთან განვიხილეთ. მათ გამოთქვეს მზადყოფნა, რომ მომდევნო 4 წლის განმავლობაში ვუმასპინძლოთ გრანდ სლემს, რაც ძიუდოს მომავალი პოპულარიზაციისთვის ძალიან მნიშვნელოვანია. ასევე, დიდი ნაბიჯები გადავდგით მსოფლიოს ჩემპიონატის შესაძლო მასპინძლობასთან დაკავშირებით.
წლეულს, შეხვედრისას ქვეყნის პრემიერ-მინისტრმაც გამოთქვა სურვილი, რომ საქართველომ ეს ტურნირი მიიღოს. თამამად შეგვიძლია ვთქვათ, რომ ამ მიმართულებით პირველი პრაქტიკული ნაბიჯები უკვე გადაიდგა და იმედს ვიტოვებ, პირველად ისტორიაში, უახლოეს პერიოდში, საქართველო შეძლებს ჩაატაროს ეს ძალიან მნიშვნელოვანი ღონისძიება”.
საქართველოს ძიუდოს მსოფლიო პირველობისათვის ჯერ არ უმასპინძლებია. იმედია, ზემოთ მოყვანილი სიტყვები უბრალო დაპირებად არ დარჩება.
გუშინ, „ნეთფლიქსი“ _ ნონა გაფრინდაშვილის დავის შესახებ აზრი გამოთქვა მოსკოვის ჭადრაკის ფედერაციის ვიცე-პრეზიდენტმა სერგეი სმაგინმა, რომელმაც ამ კონფლიქტურ სიტუაციაში ქართველის მხარი დაიჭირა.
„სავარაუდოდ, ნონა გაფრინდაშვილმა კონსულტაციები გაიარა და იურისტებმა უთხრეს, რომ საქმის მოგების კარგი შანსები აქვს. სერიალი პოპულარულია, უამრავი პრემია მიიღო და მის გარშემო დიდი ფული ტრიალებს. ძალიან ძნელია ვიწინასწარმეტყველოთ, თუ როგორ განვითარდება საქმე, მაგრამ, თუ ისეთმა სერიოზულმა ადამიანმა, როგორიც ნონა გაფრინდაშვილია, ასეთი ნაბიჯი გადადგა, ეს ნიშნავს, რომ მას კარგი შანსები აქვს. ჩემი აზრითაც, ასეა. საინტერესო იქნება ამ პროცესისადმი თვალის მიდევნება. ქალბატონ ნონა გაფრინდაშვილს კი ამ საქმეში გამარჯვებას მთელი გულით ვუსურვებ“.
საქართველოს საკალათბურთო ნაკრებისა და კლუბი „ლენოვო ტენერიფეს“ ცენტრალურ თავდამსხმელ გიორგი შერმადინს წელის არეში ტრავმა აქვს და უახლოესი ექვსი კვირა გაუცდება.
დიდი ალბათობით შერმადინი ვერ დაეხმარება საქართველოს ეროვნულ გუნდს მსოფლიოს პირველობის შესარჩევ შეხვედრაში უკრაინის წინააღმდეგ, რომელიც მიმდინარე წლის 26 ნოემბერსაა დანიშნული.
ესპანურმა გამოცემამ „Plazadeportiva“ „ვალენსიას“ ახალწვეულების შესახებ სტატია გამოაქვეყნა. რასაკვირველია, ყურადღების ცენტრში ქართველი მეკარე გიორგი მამარდაშვილიც მოექცა.
„ქართველი კარის დარაჯი გიორგი მამარდაშვილი სეზონის სტარტზე ერთ-ერთი მთავარი სიახლე იყო. იგი „ვალენსიას“ სათადარიგო გუნდის მეკარე უნდა ყოფილიყო, მაგრამ ვითარება შეიცვალა. ახალ კულტურასთან ადაპტაცია, რაც ენობრივმა ბარიერმა უფრო რთული გახადა და ახალგაზრდული ასაკი მამარდაშვილისთვის „ვალენსიას“ ძირითადი მეკარის სტატუსის მორგებისთვის ბრძოლაში პრობლემა არ ყოფილა.
მან სილესენისა და ხაუმე დომენეკის არყოფნით ისარგებლა და კრისტიან რივეროს აჯობა. უმაღლეს დივიზიონში არსებულმა მოთხოვნებმა მას სათადარიგოთა სკამზე გადასვლა აიძულა, თუმცა, ბილბაოს „ატლეტიკთან“ შეხვედრაში ბორდალასმა იგი მეორე მეკარედ გაამწესა და მამარდაშვილს მომატება შეუძლია“.
გუშინ ბრიტანულმა მედიამ გაავრცელა ცნობა, რომ კარიერის დასრულების შემდეგ პორტუგალიის ნაკრებისა და „მანჩესტერ იუნაიტედის“ თავდამსხმელი კრიშტიანო რონალდუ მწვრთნელის პროფესიის ათვისებას შეუდგება. ცნობილი გახდა, რომ კრიშტიანო თავდაპირველად ამჟამინდელი გუნდის ახალგაზრდულ გუნდს ჩაიბარებს.
კატალონიური „ბარსელონა“ კი ფინანსური პრობლემების მოგვარებას ცდილობს. გუშინ ცნობილი გახდა, რომ ერთ-ერთი არაბული კომპანია მზად არის, მთლიანად გამოისყიდოს „ბარსელონას“ ვალი, რომელიც 1.5 მილიარდ ევროს შეადგენს. თუ შეთანხმება შედგება, კატალონიური კლუბის დავალიანება დაუყოვნებლივ დაიფარება, ოღონდ, „ბარსელონას“ ახლა არაბული კომპანიის ვალი ექნება, რომელსაც დაახლოებით 12-წლიან პერიოდში გაისტუმრებს.
გუშინ ფეხბურთში ევროპის ჩემპიონთა ლიგის მეორე ტურის შეხვედრები გაიმართა.
A ჯგუფი: „პარი სენ ჟერმენი“ – „მანჩესტერ სიტი“ 2:0, „ლაიპციგი“ – „ბრიუგე“ 1:2;
B ჯგუფი: „მილანი“ – „ატლეტიკო“ (მადრიდი) 1:2, „პორტო“ – „ლივერპული“ 1:5;
C ჯგუფი: „აიაქსი“ – „ბეშიქთაში“ 2:0, „ბორუსია“ (დორტმუნდი) – „სპორტინგი“ 1:0;
D ჯგუფი: „შახტარი“ – „ინტერი“ 0:0, „რეალი“ (მადრიდი) – „შერიფი“ 1:2.
[sexy_author_bio]
