დღეს, ოზურგეთში, მიუხედავად მზიანი ამინდისა, თხილის მიმღებ პუნქტებში, მხოლოდ ადგილზე მომუშავეებს თუ ნახავთ. თხილის ჩასაბარებლად მოსულ მოქალაქეებს კი აქ-იქ მოჰკრავთ თვალს.
კვლავ ძალაშია გატეხვის მეთოდით თხილის მიღება. ათი ცალიდან, ათივეს თუ საღი გული ექნება, ჯიშის განურჩევლად, ერთ კილოგრამში შვიდ ლარს იხდიან.
თუმცა, რეალურად არ არსებობს ამ ფასის გადახდა, რადგან ათი ცალი თხილის გული რომ საღი იყოს, ასეთ პრეცედენტს ადგილი იშვიათად აქვს.
_ ყოველ შემთხვევაში, ამ სეზონზე მსგავსი არაფერი მომხდარა. ამიტომ, საშუალოდ, ერთ კილოგრამში ხუთი ლარი მაქსიმალური ფასია. ოღონდ თხილი ხმელი, მშრალი და კარგი ფერის უნდა იყოს. ახლა, ნაწვიმარზე შეგროვებული თხილი კი არა, _ გვეუბნებიან ოზურგეთში, ნინო რამიშვილის ქუჩაზე და სასტუმრო „გურიას“ მიმდებარედ არსებულ ჯიხურებში.
_ თხილს კიარა, ათიდან ხუთ ადამიანს არ უვარგა გული, თქვენი და ამ მთავრობის შემხედვარე, _ უბრაზდება პუნქტებში მყოფთ თხილის ჩასაბარებლად მოსული ივანე დოლიძე, _ გადავყევი ამ თხილის შეწამვლას და მოვლას. ნახევარზე მეტი ფასი დამიჯდა მოკრეფა და გარჩევა. აქ მოხვალ და არის „აპეკუნობა“, ეს გატეხე, ის გაარჩიე… დენის ფული მაქვს გადასახდელი, თორემ ღორს ვაჭმევდი ამათთან ჩაბარებას…
სხვადასხვა ფასების თაობაზე, ორჭოფულ პასუხებს იძლევიან მიმღებ პუნქტებში:
_ სადაა თხილი? ნაწვიმარზე შენაგროვები , თითქმის დამპალი მოაქვთ და ფასი ყველას მაღალი სურს. კარგად გამხმარი და გამომშრალი თხილი, მშვენიერი ფასი ღირს. „ნაგერას“ ორ ლარში არ მიიღებს ბევრი, ისეთი მოაქვთ, გამოღმა გვედავებიან, _ თავადაც ბრაზდებიან ოპერატორები და ამბობენ, რომ აწი, დაზამთრებამდე თხილის ფასი არ გაიზრდება, რადგან ვისაც ხარისხიან თხილი აქვს და ეკონომიკურად ძალიან არ უჭირთ, გადაინახეს. გაჭირვებულს კი შემოელია კარგი თხილი და მოაქვს ნაწვიმარზე შეგროვებული „ნაგერა“.
[sexy_author_bio]
