ოზურგეთის მერიაში არ შეგვიშვეს: „მერს მოქალაქეები ჰყავს მიღებაზე, მოგაწვდით ფოტოებს და ტექსტს“

დღეს, დილით, ოზურგეთის მუნიციპალიტეტის ახლადარჩეული მერი, ავთანდილ თალაკვაძე სამსახურში გამოცხადდა.

მერიის შესასვლელში დაცვის თანამშრომლები დაგვხვდნენ და გვითხრეს, რომ შესვლაზე შეთანხმება იყო საჭირო.

_ჯერ დავრეკავთ და გეტყვით პასუხს. ხომ იცით, პირველი სამუშაო დღეა – თქვეს მათ „გურია ნიუსთან.

მალე შენობიდან პრესსამსახურის წარმომადგენელი, ნინო ბახტაძე   გამოვიდა და მოგვიბოდიშა:

_მე მოგაწვდით ფოტოებს და ტექსტს. მიღება აქვს მერს. მოქალაქეები ჰყავს სტუმრად.

_მით უკეთესი, ასეთ მიღებაზე ჟურნალისტების ყოფნაც სასურველია…

_კი, მაგრამ დახურული შეხვედრაა და ვერ შეგიშვებთ. ბოდიშს გიხდით. მოგაწვდიტ ფოტოებს, მასალას..

_გვაინტერესებს კადრების საკითხიც, კონკრეტულად კი პოლიტიკურ თანამდებობებზე ვინ ინიშნება. გვსურს , ვკითხოთ.

_ყველაფერს მოგაწვდით, ფოტოებსაც, ტექსტსაც, – კვლავ მოგვიბოდიშა ნინო ბახტაძემ.

მალე მერიის წინ პარლამენტის სპიკერი, არჩილ თალაკვაძე გამოჩნდა. მასთან ერთად იყო გურიის ყოფილი გუბერნატორი, მერაბ ჭანუყვაძე, რომელიც არაოფიციალური ინფორმაციით ახლა გურიის სამაშველო სამსახურის უფროსად დაინიშნა.

ბატონი არჩილი მოგვესალმა და გვკითხა, რაში იყო საქმე.
-გვსურს მერის პირველი სამუშაო დღე გავაშუქოთ. თქვენ ხომ არ გააკეთებთ კომენტარს?

_ოზურგეთის მუნიციპალიტეტის მერი არის ავთანდილ თალაკვაძე. მე როგორ გავაკეთებ?

_კი, მაგრამ მასთან არ მიშვებენ, დახურული შეხვედრა აქვსო. ამიტომ გთხოვთ თქვენ…

_მოგაწვდით ავთანდილი ფოტოებს და მასალას, ჩამოვა თავად, _ გვითხრა ბატონმა არჩილმა.

_აქ რატომ უნდა ჩამოვიდეს, მე ავალ მასთან, – ვუთხარით ბატონ არჩილს, თუმცა ამაზე პასუხი არ გაუცია და შევიდა შენობაში.

კომენტარისთვის მივმართეთ ასევე მერაბ ჭანუყვაძეს, რომელიც, როგორც ვთქვით, არაოფიციალური ინფორმაციით, სამაშველო სამსახურის უფროსად არის დანიშნული და გვაინტერესებდა რას იტყოდა, თუმცა კითხვა აქეთ დაგვისვა:

_მე რა შაუაში ვარ?

მალე მერიის შენობიდან მერთან მიღებაზე ნამყოფი მოქალაქეები გამოვიდნენ.

პირველივე ქალბატონს, ლიხაურის მკვიდრს, ნანული ქილიფთარს ვკითხეთ, რა პრობლემაზე ესაუბრა მერს და როგორი პასუხით გამოისტუმრეს:
_ ლიხაურში ვცხოვრობ. გასაჭირს რა დალევს, შვილო, მაგრამ ყველაზე ძალიან მაწუხებს ჩემი ქმრის მდგომარეობა. თვალები ევსება, ისეთ დღეშია. არ ვიცი, ოპერაცია უშველის თუ არა. ძალიან კარგად მიმიღო ახალმა მერმა, გაიხაროს. ყველანაირად დაგეხმარებიო, შემპირდა და მინდა ვირწმუნო, რომ სიტყვას შეასრულებს, _ გვითხრა ქალბატონმა.

კიდევ ერთი ქალბატონი, რომელიც მერთან შესვლას აპირებდა, იყო ნესტან ჭკადუა.

_დღეს სხვადსხვა საქმეზე ვარ აქ მოსული. ანასეულში, იმდაშვილის ქუჩის ამბავი გაგიგიათ? რა საშინელი მდგომარეობაა? რამდენი წელია, გვატყუებენ და არ გაკეთდა…

_როგორ არ გამიგია, ქალბატონო, სამჯერ გააშუქა „გურია ნიუსმა“, მე ვწერდი პირადად…

_არ გეცოდინებათ კარგად, იქ რა მდგომარეობაა. კაციშვილს არ აინტერესებს….

_როგორ არ ვიცი? ასე რომ იზახდით, სწორედ ამიტომ ფეხით ავედი ქალაქის მხრიდან და ანასეულის გავლით ჩამოვედი უკან , რომ საკუთარი თვალით მენახა, რა მდომარეობა იყო.

_ჰოდა, ამ ქუჩის გაკეთებას თავად არჩილ თალკვაძე დამპირდა შარშანწინ, მაგრამ არაფერი შედეგი არ მოჰყოლია. ამიტომ ახლა უნდა ვთხოვო კიდევ.

_ბატონი არჩილი როგორ დაგპირდათ, მერი შარაშენიძე იყო.

_არა, მაშინ ბატონი არჩილი იყრიდა კენჭს საპარლამენტო არჩევნებში, ზუსტად არ მახსოვს, რამდენი წელი გავიდა.    აუცილებლად გაგიკეთებთო, დაგვპირდა. ამიტომ მინდა ახლა ვუთხრა, რომ როგორმე დანაპირები შეგვისრულონ და ამ საშინელ ქუჩაზე ასფალტი დააგონ.

_მოხრეშვა მოხდა, როგორც მერე ვნახე…

-კი, მოხრეშეს, მაგრამ რად გინდა? წვიმების დროს ერთიანად წაიღო ნიაღვარმა და ერთი კიდევ ამოირბინე, არ დაიზარო და ნახავ, რამხელა ხრამებია გზებზე, – გვითხრა ქალბატონმა.

ამავე ქუჩის მცხოვრებმა ანა ტაკიძემ, რომელიც ბებიას ახლდა, ასევე საყვედური გამოთქვა.

_ მე ახალგაზრდა ვარ. პატარაობიდან ამ ორმოებად ქცეულ გზაზე დავდივარ. მანქანა მანდ ვერ დადის და   ამხელა გზაზე მთელი ცხოვრება ფეხით უნდა ვიაროთ? იმედაშვილის ქუჩა ეკუთვნის ქალაქს და სადღაც მიუვალ სოფლებში გააკეთა ოზურგეთის მუნიციპალირტეტის მერიამ გზები. ჩვენ რა დავაშავეთ? ძალიან მინდა, ახლამა მერმა იმედაშვილის ქუჩიდან დაიწყოს გზების მოასფალტება, – გვითხრა გოგონამ.

„გურია ნიუსი“ დღეს, როგორც მერიის პრესსამსახურში შეგვპირდნენ და თავად ბატონმა არჩილ თალაკვაძეც გვითხრა, ელოდება მ მასალას და ფოტოებს პირველი სამუშაო დღის შესახებ, ასევე საკადრო დანიშვნაზეც.

[sexy_author_bio]