გუშინ ბელგიურ მასმედიაში გაიჟღერა ინფორმაციამ, რომ უახლოეს მომავალში საქართველოს ეროვნული გუნდის მოთამაშე გიორგი ჩაკვეტაძე, ალბათ ამჟამინდელ კლუბს დატოვებს _ წერილი გამოცემამ “Voetbalnieuws” გამოაქვეყნა.
“გენტში” ჯერ კიდევ ბევრს სჯერა ჩაკვეტაძის პოტენციალისა, რომელიც ოთხი წლის წინ ტოპ-ტალანტის სახით მოვიდა და თავიდან ამ მოლოდინს ამართლებდა. როგორც ჩანს, მწვრთნელი მასზე იმედებს აღარ ამყარებს. ვინ იცის, იქნებ ფეხბურთელი, რომელსაც ნაკრებში 13 მატჩი აქვს ჩატარებული, წასვლასაც კი აპირებს, ვინაიდან მისი კონტრაქტი 2023 წელს სრულდება”.
გიორგი ჩაკვეტაძე საქართველოს ნაკრებს ნოემბრის მატჩებში ვერ დაეხმარა. “გენტის” 22 წლის ნახევარმცველმა, რომელიც შვედეთთან ბათუმში გამართულ შეხვედრაში სათადარიგოთა სკამზე იყო, ეროვნული ნაკრების შეკრება მუხლის ტკივილის მიზეზით დატოვა და რამდენიმე დღის შემდეგ უზბეკეთთან გამართული მატჩის განაცხადშიც აღარ ყოფილა.
რამდენიმე დღის წინ გიორგი ვერც თავის კლუბს დაეხმარა. “გენტის” მთავარმა მწვრთნელმა ჰეინ ვანჰეზებრუკმა ის ბელგიის პირველობის ბოლო ტურში 21 ძირითად ფეხბურთელს შორის არ დაასახელა.
ქართველი კარიერა “გენტში” ტრავმებმა ძალიან დააზარალა. გიორგი ჩაკვეტაძემ მიმდინარე სეზონში “გენტის” ღირსება ყველა ტურნირის 14 მატჩში დაიცვა, გაიტანა 1 გოლი და მიითვალა 5 საგოლე პასი.
“მანჩესტერ იუნაიტედის” აწ უკვე ყოფილმა მთავარმა მწვრთნელმა ოლე გუნარ სულშერმა გუნდიდან გაშვების შემდეგ კლუბის ვებ-გვერდს ინტერვიუ მისცა და “იუნაიტედს” ცრემლებით გამოემშვიდობა:
“იცით “მანჩესტერ იუნაიტედი” ჩემთვის რასაც ნიშნავს და რისი მიღწევაც მინდოდა. კლუბისთვის, ფანებისთვის, მოთამაშეებისთვის, პერსონალისთვის. მსურდა შემდეგი ნაბიჯი გადაგვედგა, ჩემპიონობისთვის გვებრძოლა, ტიტულები მოგვეგო. ყველაფერზე ლაპარაკი არ მინდა. ეს კლუბი ჩემთვის ყველაფერს ნიშნავს. სამწუხაროდ, სასურველ შედეგებს ვერ მივაღწიე და დროა, გვერდით გავდგე.
ძალიან ვამაყობ, როცა განვლილ 3 წელს ვუყურებ. ეს ისეთი რამ იყო, რაზეც ცხოვრებაში აუცილებლად ოცნებობ.
მადლობა კლუბის მფლობელებს, რომლებიც მენდნენ და გუნდის წინსვლაში საკუთარი წვლილის შეტანის შესაძლებლობა მომცეს. იმედი მაქვს, გუნდს იმაზე უკეთეს მდგომარეობაში ვტოვებ, ვიდრე ჩემს მოსვლამდე იყო. აქ კარგი მეგობრები შევიძინე, ზოგიერთ ბრწყინვალე ადამიანთან კი ურთიერთობა განვაახლე. წასვლის წინ ფეხბურთელებს ვუთხარი, რომ საკუთარი თავი ირწმუნონ, ისინი იმაზე უკეთესები არიან, ვიდრე შედეგი აქვთ. “ჩემპიონთა ლიგის” მომდევნო რაუნდს ერთი მოგება აშორებთ, მათ მაიკლ კერიკი გაუძღვებათ, მას უდიდეს პატივს ვცემ, ძალიან მიყვარს. გუნდის თამაშებს, როგორც გულშემატკივარი, ისე ვუყურებ ხოლმე…” _ განაცხადა ოლე გუნარ სულშერმა.
ნორვეგიელს მხარდაჭერა კრიშტიანო რონალდუმ გამოუცხადა:
“პირველად, როდესაც “ოლდ ტრაფორდზე” გადმოვედი, ის თავდასხმაში ჩემი პარტნიორი იყო და “მანჩესტერ იუნაიტედში” დაბრუნების შემდეგ, იგი ჩემი მთავარი მწვრთნელია. პირველ რიგში, ოლე გამორჩეული ადამიანია. მას მომავალში ყველაფერს საუკეთესოს ვუსურვებ. წარმატებები ჩემო მეგობარო! შენ ამას ნამდვილად იმსახურებ”.
რამდენიმე დღის წინ ბრიტანულ მასმედიაში გავრცელდა ცნობა რომ უმწვრთნელოდ დარჩენილ “მანჩესტერ იუნაიტედს” ზინედინ ზიდანი ჩაიბარებდა. მაგრამ…
“BBC”-ის ინფორმაციით, ზიდანმა “იუნაიტედის” ჩაბარებაზე უარი განაცხადა და ამის შესახებ კლუბის ხელმძღვანელობას უკვე აცნობა.
როგორც ირკვევა, ზიდანს საერთოდ არ სურს ინგლისში მუშაობა. მანჩესტერში გადასვლის წინააღმდეგია მისი მეუღლეც. ამასთან, აქტიურად ვრცელდება ცნობები იმის შესახებ, რომ ზიდანი შეიძლება “პარი სენ-ჟერმენის” დამრიგებლად დაინიშნოს. საინტერესოა, რომ “იუნაიტედს” “პსჟ”-ს ამჟამინდელი მწვრთნელის, მაურისიო პოჩეტინოს სახელსაც უკავშირებენ.
“მანჩესტერ იუნაიტედის” მთავარ მწვრთნელად შესაძლო დანიშვნაზე კომენტარი გააკეთა ესპანეთის ნაკრების ამჟამინდელმა დამრიგებელმა ლუის ენრიკემაც. ამ უკანასკნელის დანიშვნა კრიშტიანო რონალდოს ინიციატივა იყო. კითხვაზე, დაუკავშირდნენ თუ არა მანჩესტერიდან, 51 წლის ესპანელმა გამოცემა “La Sexta”-ს ასე უპასუხა: “რა ხდება, დღეს? პირველი აპრილია?”
დღეს ევროპის კონტინენტზე ჩემპიონთა ლიგის ჯგუფური სტადიის მორიგი შეხვედრები გაიმართება და კატალონიურ “ბარსელონას” ბეწვის ხიდზე გავლა მოუწევს. რამდენიმე დღის წინ ჩავი ერნანდესის ხელმძღვანელობით “ბარსელონამ” პირველი ოფიციალური შეხვედრა მოიგო და ესპანეთის პირველობაზე თანაქალაქელი “ესპანიოლი” დაამარცხა _ 1:0.
დღეს ჩავის ხელმძღვანელობით “ბარსას” მეორე მატჩი ლისაბონის “ბენფიკასთან” უწევს. ამ შეხვედრაში საქმე ეხება ჩემპიონთა ლიგის მერვედფინალში გასვლა-არგასვლას და ამით ყველაფერი ნათქვამია.
“ბარსელონა” 4 ტურის შემდეგ მეორე ადგილზეა, მაგრამ 6 ქულა კიევის “დინამოსთან” ორი მოგებით (1:0, 1:0) აქვს მოპოვებული, მანამდე კი “ბაერნთან” (0:3) და “ბენფიკასთან” (ასევე 0:3) ძალიან უიმედოდ წააგო.
ჩავის გუნდისთვის პორტუგალიურ გუნდთან მარცხი კატეგორიულად არ შეიძლება, მაგრამ მას შეიძლება ფრეც არ ეყოს, რადგან ბოლო ტურში “ბაიერნს” უნდა ესტუმროს, “ბენფიკა” კი კიევის “დინამოს” უმასპინძლებს.
“ჩემპიონთა ლიგიდან” გამოვარდნა და “ევროპალიგაზე” გადასვლა ფინანსურ კრიზისში მყოფი “ბარსელონასთვის” დიდი დარტყმა იქნება. ამიტომ დღევანდელი შეხვედრა ჩავისთვის გარდამტეხი და გადამწყვეტია.
[sexy_author_bio]
