ოზურგეთში კოვიდინფიცირების 251 ახალი შემთხვევა დაფიქსირდა. ამის შესახებ “გურია ნიუსს” ოზურგეთის საზოგადოებრივი ჯანდაცვის ცენტრში განუცხადეს.
ოზურგეთის საზოგადოებრივი ჯანდაცვის ცენტრის ეპიდემიოლოგი ელზა სიმონიშვილი ამბობს, რომ მდგომარეობა საყურადღებოა.
“მაქსიმალური ინფიცირების შემთხვევები როდესაც გვქონდა, ის პიკი გადავლახეთ, მაგრამ მდგომარეობა საყურადღებოა, გამომდინარე იქიდან, რომ ვაქცინაციის ტემპი შენელებულია. ზოგადად ქვეყანაში 42%-ზე მეტი არ არის ვაქცინირებული. ასევე საფრთხეს წარმოადგენს ომიკრონის მეორე ქვეშტამი, რომელიც დაავადებათა კონტროლის ცენტრის ინფორმაციით, ცირკულირებს ქვეყანაში. ეს შტამი შედარებით უფრო საყურადღებოა, რადგან ზემო სასუნთქი გზებიდან ახასიათებს ფილტვებში გადასვლა. რისკის ჯგუფს მიეკუთვნება მცირე ასაკის ბავშვები, ხანდაზმული ადამიანები და ასევე ქრონიკული დაავადების მქონე პირები. რისკის ჯგუფს მიეკუთვნებიან ორსულებიც. ამიტომ განსაკუთრებით საყურადღებოა ამ კატეგორიის მოსახლეობაში რომ იყოს ვაქცინაციის მოცვის პროცენტი მაღალი და ასევე საყურდღებოა პირადი დაცვის საშუალებების და კოვიდრეგულაციების შესრულება, რომ შევძლოთ ვირუსის მართვა და ეპიდსიტუაციის დასტაბილურება. დღესდღეობით, ეპიდემიოლოგიური სიტუაცია კონტროლს ექვემდებარება, მაგრამ სიტუაცია გვაქვს საყურადღებო, რადგან ვაქცინაციის მოცვა დაბალია და მოსახლეობაც არ ასრულებს ზედმიწევნით კოვიდრეგულაციის წესებს, მოდუნების უფლება არ გვაქვს”,_ ამბობს სიმონიშვილი.
სულ ოზურგეთში დაფიქსირებულია კოვიდინფიცირების 19174 შემთხვევა, გამოჯანმრთელებულია 17439 პაციენტი, გარდაცვლილია 96.
ამ დროისთვის აქტიურია კოვიდინფიცირების 1639 შემთხვევა.
[sexy_author_bio]
