გუშინ ცნობილი გახდა, რომ საქართველოს ეროვნული გუნდისა და ესპანური „ვალენსიას“ კარის დარაჯი გიორგი მამარდაშვილი საბოლოოდ გამოჯანმრთელდა. ქართველი გაციებული გახლდათ. ამჟამად თავს კარგად გრძნობს და სათამაშოდ უკვე მზადაა.
გამოცემა „eldesmarque“-ს მტკიცებით, ესპანეთის პირველობის მორიგი ტურის შეხვედრაში მამარდაშვილს მისი გუნდის ძირითად შემადგენლობაში ვიხილავთ, როდესაც „ვალენსია“ კლუბ „ხეტაფეს“ დაუპირისპირდება.
ცნობილი გახდა, რომ გერმანულ „ჰამბურგში“ კორონავირუსი მძვინვარებს. კლუბის ვებგვერდის ინფორმაციით, გუშინ გუნდის რამდენიმე თანამშრომელმა და ფეხბურთელმა თავი შეუძლოდ იგრძნო და მათ კორონავირუსი დაუდასტურდათ. რასაკვირველია ამის შემდეგ „ჰამბურგის“ ვარჯიში აღარ ჩატარებულა.
„ჰამბურგის“ დირექტორთა საბჭოს თავმჯდომარემ, იონას ბოლდტმა, ამის შესახებ უმალ საქმის კურსში ჩააყენა გერმანიის საფეხბურთო ლიგა და 12 მარტს „ერცგებირგესთან“ მატჩის გადადება სთხოვა. „ჰამბურგის“ ღირსებას საქართველოს ნაკრების მოთამაშე გიორგი ჩაკვეტაძე იცავს.
დანიური გამოცემა „EkstraBladet“-ის ცნობით, ყაზანის „რუბინში“ ხვიჩა კვარაცხელიას თანაგუნდელი, ნახევარმცველი ანდერს დრეიერი შეიძლება დანიაში დაბრუნდეს.
დრეიერთან სეზონის ბოლომდე კონტრაქტის გაფორმების სურვილი „კოპენჰაგენმა“ და „მიდტიულანდმა“ გამოთქვეს.
რამდენიმე დღის წინ ფიფა-მ რუსეთში მოასპარეზე ლეგიონერებს სხვა კლუბებთან 30 ივნისამდე ხელშეკრულების გაფორმების უფლება მისცა, რის შემდეგაც თავიანთ გუნდებში უნდა დაბრუნდნენ.
დრეიერი „რუბინს“ ტოვებს. საინტერესოა რას მოიმოქმედებს ხვიჩა კვარაცხელია?
გუშინ ცნობილი გახდა, რომ მიმდინარე წლის ზაფხულში ფრანგული „პარი სენ ჟერმენის“ ხელმძღვანელობა გუნდიდან ბრაზილიელი ნეიმარის გაშვებას შეეცდება.
ესპანური გამოცემა „Sport.es“-ის მტკიცებით, „პსჟ“-ის უფროსობა ნეიმარით ძალიან უკმაყოფილოა. ბრაზილიელის თამაში მათ მოლოდინს ვერ ამართლებს. ამას გარდა, ხელმძღვანელობას არც თავდამსხმელის ცხოვრების წესი მოსწონს, რომელიც ხშირად ესწრება სხვადასხვა წვეულებას. ამასთან უთანხმოება აქვთ ნეიმარის მამასთან, რომელიც ფეხბურთელის ერთ-ერთი აგენტია და მასთან ურთიერთობა ვერ ააწყვეს.
ბრიტანული „Sky Sports“-ის ინფორმაციით, რომან აბრამოვიჩს ყველანაირი სარგებლის მიღების გარეშე „ჩელსის“ გაყიდვისთვის 81 დღე აქვს. წინააღმდეგ შემთხვევაში, მიმდინარე წლის 31 მაისს ოლიგარქს გუნდს ჩამოართმევენ. 10 მარტს ბრიტანეთის მთავრობამ „ჩელსის“ მფლობელ აბრამოვიჩს სანქციები დაუწესა და აქტივები გაუყინა, მათ შორის, საფეხბურთო კლუბიც.
რუსი სამხედროები უკრაინის ქალაქებში სამოქალაქო ობიექტების დაბომბვას აგრძელებენ. ამჯერად, რუსებმა ქალაქ ჩერნიგოვის საფეხბურთო სტადიონზე მიიტანეს იერიში…
„რუსმა ოკუპანტებმა ქალაქის ყველაზე „საშიში“ სამხედრო ინფრასტრუქტურის ობიექტი დაბომბეს – ჩვენი გუნდის სტადიონი. თუმცა, ჩვენ შევძლებთ ყველაფრის თავიდან აშენებას, მხოლოდ გავძლიერდებით და უკეთესები ვიქნებით, თქვენ კი, „მეზობლებო“, მთელი ცხოვრება ასე იცხოვრებთ. გამარჯვება სიმართლისთვის, დიდება უკრაინას!“ – ნათქვამია საფეხბურთო კლუბი ჩერნიგოვის „დესნას“ განცხადებაში.
ანდრეი შევჩენკოს ოჯახის წევრები, დედა და და კიევში იმყოფებიან. გამოცემა „Sky Sports“ ყოფილ ფეხბურთელს დაუკავშირდა და შეეცადა გაერკვია მისი ოჯახის მდგომარეობა, რომელიც ახლა ცხელ წერტილშია.
შევჩენკოს ინფორმაციით, მისმა დამ და დედამ კიევში, საკუთარ სახლში ქალაქ ბუჩადან წამოსული ორი ოჯახი შეიფარეს. ისინი მისი დის მეგობრები არიან, რომლებიც ხუთი დღის განმავლობაში ინტენსიური დაბომბვის გამო სარდაფში, საშინელ პირობებში ცხოვრობდნენ. ანდრეის ოჯახის წევრები კიევის დატოვებას ვერ ახერხებენ, რადგან რუსი ჯარისკაცები ჰუმანიტარულ დერეფნებს თავს ესხმიან და იქ გავლა ძალიან საშიშია.
ავტორი: გიორგი გაჩეჩილაძე
