გორში 18 წლის წინ მოკლული ბავშვის ცხედარი აღმოაჩინეს. 11 წლის ზაქრო ბერძნიშვილის ცხედარს გორში, ე.წ. კომბინატის დასახლებაში, მდინარის პირად მიაკვლიეს.
ოჯახი მთელი ამ დროის განმავლობაში ბავშვის ცხედარს ქალაქის სხვადასხვა ტერიტორიაზე ეძებდა.
„ჩემი შვილი ვიპოვეთ“, – განაცხადა მოზარდის დედამ. სხვა დეტალებზე გაუჩინარებული ბიჭის დედა არაფერს ამბობს და მხოლოდ იმას აცხადებს, რომ ოჯახი ემოციურად რთულ მდგომარეობაშია და დამატებით კომენტარს, ჯერჯერობით, ვერ გააკეთებს.
რაც შეეხება საქმეზე მსჯავრდებულ იაგო ნებიერიძეს, ბრალდებულის დედამ ნუნუ გრიგალაშვილმა განაცხადა, რომ ზაქრო ბერძნიშვილის ცხედრის ადგილსამყოფელის შესახებ ბავშვის ოჯახს ინფორმაცია სწორედ ნებიერიძემ მიაწოდა.
„ბერძენიშვილების ოჯახს ჩემმა შვილმა ციხიდან მიაწოდა ინფორმაცია, სადაც ბავშვის ცხედარი იყო, მაგრამ აღნიშნული ბავშვის გაუჩინარებასა და მკვლელობაში მას ბრალი არ მიუძღვის, უბრალოდ, დაინახა და ინფორმაცია ჰქონდა“, – განაცხადა ნუნუ გრიგალაშვილმა.
შსს-ს განცხადებით, ნაპოვნია ერთი პირის ცხედარი და მიმდინარეობს საგამოძიებო მოქმედებები.
11 წლის ზაქრო ბერძნიშვილი 2004 წლის ნოემბერში გორიდან საკუთარი საცხოვრებელი სახლის მიმდებარე ტერიტორიიდან გაურკვეველ ვითარებაში გაუჩინარდა. ბავშვის ადგილსამყოფელის დასადგენად საგამოძიებო მოქმედებები მიმდინარეობდა, თუმცა, ცხედრის კვალს ვერ მიაგნეს. არსებობდა ვერსია, რომ 11 წლის ბიჭი ფულის გამოძალვის მიზნით გაიტაცეს. მოგვიანებით, სწორედ ფულის გამოძალვის ბრალდებით როგორც საქმის ერთ-ერთი ფიგურანტი, იაგო ნებიერიძე დააკავეს. თუმცა, ნებიერიძეს იმჟამად ბავშვის გატაცებაზე ან მკვლელობაზე ბრალი არ დაუმტკიცდა. მან სასჯელი მხოლოდ ფულის გამოძალვის ბრალდებით მოიხადა.
ზაქრო ბერძნიშვილის საქმის გარდა იაგო ნებიერიძე მთავარი ფიგურანტია 2018 წელს, გორში 9 წლის ნანიკო ბერიაშვილის მკვლელობის საქმეში. გოგონას მკვლელობასა და მის მიმართ სექსუალური ხასიათის ძალადობაში სწორედ იაგო ნებიერიძეს დაუმტკიცდა ბრალი, რომელიც ამჟამად მსჯავრდებულია და უვადო პატიმრობა აქვს მისჯილი.
იაგო ნებიერიძემ 2018 წელს სამართალდამცავებთან განაცხადა, რომ წლების წინ გაუჩინარებული ზაქრო ბერძნიშვილის ცხედერის ადგილსამყოფელი იცოდა და აღნიშნულ ტერიტორიად გორის კულტურისა და დასვენების პარკი მიუთითა. რამდენიმე კვირის განმავლობაში პარკის ტერიტორიაზე სხვადასხვა ხელსაწყოებისა და ცოცხალი ძალის გამოყენებით სამძებრო სამუშაოები მიმდინარეობდა, თუმცა, სამართალდამცავებმა ცხედარს ვერ მიაკვლიეს.
წყარო: ინტერპრესნიუსი
