ცოტა ხნის წინ გავრცელდა ცნობა რომ რუს ოლიგარქ რომან აბრამოვიჩს თურქული „გიოზთეპეს“ შეძენა სურდა. მოგვიანებით ეს გარიგება ვერ განხორციელდა და ლონდონის „ჩელსის“ ყოფილმა მფლობელმა მზერა ესპანეთს მიაპყრო.
გუშინ გამოცემამ „მირორი“ გაავრცელა ცნობა რომ აბრამოვიჩი გიორგი მამარდაშვილის „ვალენსიას“ ყიდვით დაინტერესდა.
გამოცემის მტკიცებით, ესპანური გუნდის ამჟამინდელი მფლობელი პიტერ ლიმი კლუბის გაყიდვის პროცესს იწყებს. „ვალენსიას“ შეძენის კიდევ ერთი კანდიდატი ამავე კლუბის ყოფილი ვიცე-პრეზიდენტი მიგელ სორიოა, რომელმაც გავრცელებული ინფორმაცია დაადასტურა: „პიტერ ლიმი ცდილობდა, „ვალენსია“ ლონდონში 250 მილიონ ევროდ გაეყიდა, მაგრამ ვერ მოახერხა. მან პრესას აუწყა, რომ ორი წინადადება მიიღო – ჩემგან და რომან აბრამოვიჩისგან.“
გუშინ ესპანური გამოცემა „Sport.es“ გიორგი მამარდაშვილის თემას შეეხო:
„თუ მამარდაშვილი ასე თამაშს გააგრძელებს, ის კიდევ უფრო მიუახლოვდება „სამეფო თასის“ ფინალში თამაშს. იასპერ სილესენისთვის სიტუაცია რთულია, რადგან მას რამდენიმე კვირაა არ უთამაშია.“
გუშინ ცნობილმა იტალიურმა გაზეთმა „Gazzetta dello Sport“ „ნაპოლიზე“ დაწერა და საინტერესო ინფორმაციაც გაავრცელა. საუბარი ხვიჩა კვარაცხელიას ეხება და იტალიურ გამოცემას თუ დავუჯერებთ, ლორენცო ინსინიეს გარდა, გუნდს კიდევ ერთი წამყვანი ფეხბურთელი ტოვებს.
„შანსი, რომ პირველ ივლისს, ნაპოლიმ 21 წლის ქართველი ფეხბურთელი, ხვიჩა კვარაცხელია დაარეგისტრიროს მაღალია. ჩვენ მასზე დადებითად ვსაუბრობთ და არაა გამორიცხული, რომ მან ლოზანო ჩაანაცვლოს. მექსიკელს ახალი გამოცდილების მიღება სურს და შესაძლოა, მიმდინარე სეზონის დასრულების შემდეგ, კლუბს დაემშვიდობოს“.
ინგლისში კი ცნობილი ფეხბურთელი კრიშტიანუ რონალდო სერიოზულ სკანდალში აღმოჩნდა. „ევერტონი“ – „მანჩესტერ იუნაიტედის“ შეხვედრის შემდეგ რონალდუ დიდი კრიტიკის ობიექტად იქცა. ამის მიზეზი პორტუგალიელი ფეხბურთელის ქმედებებია. გასახდელისკენ მიმავალმა რონალდუმ „ევერტონის“ქომაგს, არასრულწლოვან ჯეიკობ ჰარდინგს ტელეფონი დაუმსხვრია.
მომხდარს ახალგაზრდა გულშემატკივრის დედა, სარა კელი გამოეხმაურა.
„ეს პირველი საფეხბურთო მატჩი იყო, რომელსაც ერთად დავესწარით. ჯეიკობი „ევერტონით“ შეპყრობილია და ფეხბურთი მისი მთავარი გატაცებაა. ის თამაშისგან და გამარჯვებისგან მიღებული ემოციების ქვეშ იყო, მაგრამ ვფიქრობ, იმ ხუთმა წამმა მისი დღე გაანადგურა.
გამომდინარე იქიდან, რომ ჯეიკობი შშმ პირია, მას საკუთარი აზრის დაფიქსირება უჭირს და შესაძლოა, დიდი დრო დასჭირდეს, რათა ბოლომდე გაიგოს, რა მოხდა. აუტიზმის გამო, მას ინფორმაციისა და მიმდინარე მოვლენების აღქმა უძნელდება. მომხდარი მან თავისებურად აღიქვა და ასეთი რამ მითხრა: „არ მჯერა, რომ რონალდუმ ეს გააკეთა. იგი მე ძალიან მომწონდა“. მართალია, ჯეიკობი „იუნაიტედის“ ქომაგი არაა, მაგრამ რონალდუ ცნობილი ფეხბურთელი და ნამდვილი ვარსკვლავია. მის ისტორიას თვალს აქტიურად ვადევნებდით და შოკია ის, რაც მოხდა. შაბათს არც ერთს არ გვეძინა.
პარკში სასეირნოდ წასვლას ვგეგმავდით, მაგრამ ჯეიკობმა მითხრა: „დე, დღეს არაფრის გაკეთება არ მინდა“. მოგვიანებით, ჩემს შვილს ვკითხე: „მანჩესტერის თამაშზე ხომ არ წახვიდოდი? რონალდუმ თქვა, რომ ამის გაკეთება შეგვიძლია“. მან ასე მიპასუხა: „არა, დედა. მისი დანახვა აღარ მინდა“. ეს ორმაგად სამწუხაროა, რადგან კრიშტიანუ ერთ-ერთი მიზეზი იყო, რომლის გამოც ჯეიკობს „მანჩესტერ იუნაიტედის“თამაშზე წასვლა უნდოდა“.
მომხდართან დაკავშირებით, რონალდუმ ბოდიში მოიხადა და „ინსტაგრამის“ საკუთარ გვერდზე შემდეგი განცხადება გამოაქვეყნა: – „ემოციებთან გამკლავება ისეთ რთულ მომენტებში, როგორიც ახლაა, ყოველთვის რთულია. თუმცა, ყოველთვის უნდა ვიყოთ პატივისცემით, მოთმინებით და მაგალითი მივცეთ ახალგაზრდებს, რომლებსაც ჩვენი ლამაზი თამაში უყვართ. მინდა ბოდიში მოვუხადო ჩემი გამოხტომისთვის და, თუ შესაძლებელია, კეთილსინდისიერებისა და სპორტული პრინციპების ნიშნად, ეს გულშემატკივარი „ოლდ ტრაფორდზე“ მატჩზე დავპატიჟო“. რონალდომ ბოდიში კი მოიხადა, მაგრამ ნორჩი ჯეიკობის სასახელოდ, მან კრიშტიანოს დაპატიჟებაზე უარი განაცხადა.
ავტორი
