მარტიდან სოციალურად დაუცველი შრომისუნარიანი მოქალაქეების დასაქმების მასშტაბური პროგრამა დაიწყო.
პრემიერ-მინისტრ ირაკლი ღარიბაშვილის განმარტებით, საზოგადოებრივი სამუშაოები სპეციალურად დაუცველი ჯგუფებისთვის შეიქმნა და ისეთ სამუშაოს გულისხმობს, რომლის შესრულებაც ნებისმიერი კვალიფიკაციის მქონე პირს შეუძლია.
დასაქმების პროგრამით ისარგებლებენ 18 წლიდან საპენსიო ასაკამდე სოციალური შემწეობის მიმღები შრომისუნარიანი პირები, რომელთაც არ აქვთ მინიჭებული შშმ სტატუსი ან არ აქვთ ჯანმრთელობის მძიმე პრობლემები.
როგორ მიმდინარეობს აღნიშნული პროგრამა ჩოხატაურის მუნიციპალიტეტში, რამდენი ადამიანია ამ დროისთვის დასაქმებული _ ამ და სხვა მნიშვნელოვან საკითხებზე ჩოხატაურის მუნიციპალიტეტის მერის მოადგილეს, მინდია ჟღერიას ვესაუბრეთ.
ჟღერიას თქმით, ამ დროისთვის ჩოხატაურის მასშტაბით უკვე 180 ხელშეკრულება არის გაფორმებული, გარკვეულ სოფლებში კი სამუშაოები უკვე დაიწყო.
“ჩოხატაურის მასშტაბით, ყველა ადმინისტრაციულ ერთეულში, 180-ამდე ხელშეკრულება უკვე გაფორმების პროცესშია. გარკვეულ სოფლებში უკვე დაწყებულია სამუშაოები”, _ ამბობს მინდია ჟღერია და აღნიშნავს, რომ სამუშაოების აქტიურ რეჟიმში წარმართვისთვის საჭირო ინვენტარს ელოდებიან:
“ჩვენ ველოდებით საზოგადოებრივი საქმიანობისთვის საჭირო ინვენტარს, რომელსაც შემდეგ გადავცემთ ადმინისტრაციულ ერთეულებს და გამოიყენებენ დასაქმებული ადამიანები. ეს იქნება დამხმარე მასალები, ნიჩაბი, ბარი და ა. შ. რაც ჭირდება დასუფთავებას”, _ ამბობს მერის მოადგილე.
_ თუ არის შესაძლებელი ოჯახიდან რამდენიმე ადამიანის დასაქმება?
_ რა თქმა უნდა, შესაძლებელია. უბრალოდ, ვაკანსიის გამოცხადება ხდება, საჭიროებიდან გამომდინარე. არის სოფლები, სადაც ბევრი სოციალურად დაუცველი ცხოვრობს, მაგრამ რამდენი სურვილიცაა, საზოგადოებრივი საქმიანობისთვის ამდენი ადამიანი არ არის საჭირო. ისინი რეგისტრირდებიან და ვაკანსიის გამოჩენის შემთხვევაში, აუცილებლად დასაქმდებიან.
_ ერთი ოჯახის რამდენიმე წევრის დასაქმების შემთხვევაში, ხომ არ ემუქრება ოჯახს სოციალური დახმარების დაკარგვის საფრთხე?
_ ვინც ამ პროგრამაში ჩაერთვება, ოჯახიდან ერთი წევრი იქნება დასაქმებული თუ სხვაც, შეგვიძლია იმის თქმა, რომ ოთხი წლის განმავლობაში ოჯახის სარეიტინგო ქულა არ გადამოწმდება. ოთხი წლის გასვლის შემდეგ მოხდება გადამოწმება, თუმცა, წინასწარ იმის თქმა, დასაქმება რამდენად იმოქმედებს სარეიტინგო ქულაზე, რაც დაკავშირებულია საარსებო მინიმუმთან და ფორმულით ხდება მისი გამოთვლა, შეუძლებელია, _ ამბობს მინდია ჟღერია.
ინფორმაციისთვის, საზოგადოებრივ სამუშაოებში ჩართული ბენეფიციარები, სოციალურ დახმარებასთან ერთად, დამატებით ფინანსურ სარგებელსაც მიიღებენ, რომელიც ნამუშევარი საათების მიხედვით ანგარიშდება და 300 ლარს შეადგენს. საზოგადოებრივი სამუშაოს შესრულებისთვის გაცემული თანხა წარმოადგენს სოციალურ გასაცემელს, რომელიც არ იბეგრება.
თუ სოციალურად დაუცველ პირს დასაქმება არ სურს, მისი სოციალურ-ეკონომიკური მდგომარეობის სტატუსის განსაზღვრა ყოველწლიური გადამოწმების შედეგების საფუძველზე მოხდება. თუმცა, მიღებული გადაწყვეტილების შეცვლა ნებისმიერ დროს შეეძლება.
ავტორი
