გუშინ ცნობილი გახდა რომ ნორვეგიის ნაკრებისა და დორტმუნდის „ბორუსიას“ თავდამსხმელი ერლინგ ჰოლანდი ახალი სეზონიდან კარიერას „მანჩესტერ სიტიში“ გააგრძელებს. გამოცემა „Daily Mail“-ის მტკიცებით, პეპ გვარდიოლას გუნდის წარმომადგენლებმა ნორვეგიელის აგენტებთან შეთანხმებას მიაღწიეს და ტრანსფერს წინ აღარაფერი დაუდგება.
ჰოლანდი დიდი ბრიტანეთის „პრემიერ ლიგის“ ყველაზე მაღალანაზღაურებადი ფეხბურთელი გახდება და კვირაში 500 000 გირვანქა სტერლინგს მიიღებს. „მანჩესტერ სიტი“ ჰოლანდთან 5 წლიან კონტრაქტს გააფორმებს, გერმანულ გუნდს კი მის სანაცვლოდ 63 მილიონ გირვანქა სტერლინგს გადაუხდის.
იტალიური მასმედიის ინფორმაციით, მომავალი სეზონიდან კლუბ „მილანს“ ახალი მფლობელი ეყოლება – ბაჰრეინული კომპანია „Investcorp“.
ბაჰრეინის საელჩომ ოფიციალურად დაადასტურა, რომ ამჟამად მხარეებს შორის მოლაპარაკებები მიმდინაროებს და „მილანი“ სავარაუდოდ 1.1 მილიარდ დოლარად გაიყიდება.
მოსალოდნელია, რომ გარიგება ოფიციალურად მიმდინარე სეზონის დასრულების შემდეგ განხორციელდება. კლუბის გასხვისება „მილანის“ ტექნიკურმა დირექტორმა პაოლო მალდინიმ და მთავარმა მწვრთნელმა სტეფანო პიოლიმაც არ გამორიცხეს.
გუშინ, უკრაინის ფეხბურთის ფედერაციის პრეზიდენტმა, ანდრეი პაველკომ დაადასტურა, რომ კიევის „დინამო“ უკრაინის ეროვნულ ნაკრებში ძირითადი შემადგენლობის ფეხბურთელების გაშვებაზე უარს აღარ იტყვის. პაველკომ განაცხადა, რომ კიეველთა პრეზიდენტი, იგორ სურკისი კომპრომისზე წავიდა.
„კიევის „დინამოს“ პრეზიდენტს დავურეკე და უკრაინის ნაკრების შესახებ ვესაუბრე. იგორ სურკისმა დამარწმუნა, რომ ფეხბურთელები, რომლებსაც ეროვნული გუნდის მთავარი მწვრთნელი ალექსანდრ პეტრაკოვი გამოიძახებს, 3 მაისისთვის მის განკარგულებაში იქნებიან. „დინამოს“ პრეზიდენტს თანადგომისთვის და გაგებისთვის დიდ მადლობას ვუხდით“.
გუშინ, უკრაინის ნაკრებისა და „ვესტ ჰემის“ თავდამსხმელმა, ანდრეი იარმოლენკომ „Youtube“-ზე მასსა და ანატოლი ტიმოშჩუკს შორის განვითარებულ საუბარზე ისაუბრა, რომელიც ომის დაწყებიდან რამდენიმე დღეში შემდგარა.
„მივწერე, ღამე როგორ გძინავსთქო, მან კი მიპასუხა – „ისე ნამდვილად არ მძინავს, როგორც შენ“. ამაზე არაფერი მიპასუხია, უბრალოდ მივწერე: „რატომ ხარ ჩუმად? ჩემთვის სამაგალითო იყავი, ყოველთვის შენ გბაძავდი, მაგრამ ახლა ჩემს ცხოვრებაში აღარ არსებობ“. მაგრამ მან х** გამომიგზავნა, მეც გავუგზავნე. ამით დასრულდა ჩვენი საუბარი.
როდესაც მე და ანატოლი ერთად ვთამაშობდით, ის ჩემთვის პროფესიონალიზმის მაგალითი იყო. ყოველთვის მინდოდა მასთან გათანაბრება. ახლა კი მისი საქციელით უბრალოდ გაოცებული ვარ“, – განაცხადა ანდრეი იარმოლენკომ.
ანატოლი ტიმოშჩუკი ამჟამად სანქტ-პეტერბურგის „ზენიტში“ მთავარი მწვრთნელის ასისტენტად მუშაობს. უკრაინაში საომარი მოქმედებების დაწყების შემდეგ, ტიმოშჩუკს საჯარო განცხადება არ გაუვრცელებია, რის გამოც მას ქვეყანაში ყველა ტიტული და ჯილდო ჩამოერთვა.
გუშინვე, უკრაინის საფეხბურთო ნაკრების ყოფილმა მეკარემ, რუსტამ ხუდამოვმა რუსეთის ცხოვრების დონეზე დამცინავად ისაუბრა და რუსი ჯარისკაცების დედებს შეურაცხყოფა მიაყენა:
„თუ დააკვირდებით, როგორ ცხოვრობენ ადამიანები მოსკოვიდან 200-300 კილომეტრში. ჩემი ძაღლი იქ მყოფებზე უკეთ ცხოვრობს“, – დაწერა რუსტამ ხუდამოვმა.
გარდა ამისა, ყოფილმა მეკარემ რუსი ჯარისკაცების დედებს შეურაცხყოფა მიაყენა: „ისინი ამაყობენ უკრაინაში ჩამოვარდნილი თავიანთი ქვეყნის რაკეტებით. ამას ველოდი, რადგან ისინი ველურები არიან“.
ყოფილი კარის დარაჯი უკრაინა – რუსეთის ომის დაწყებამდე მეკარეების მწვრთნელად ჟიტომირის „პოლესჟეში“ მუშაობდა.
ავტორი
