აღდგომის დღესასწაული ახლოვდება. სწორად ამ მიზეზით, ჩოხატაურში ყოველკვირეული ბაზარი, დღეს, პარასკევს გაიმართა. უჩვეულო ხალხმრავლობაა მაღაზიებშიც, სადაც კვერცხზე და პასკაზე სააქციო ფასი მოქმედებს.
„გურია ნიუსის“ გადამღები ჯგუფი დღეს დილიდან ჩოხატაურის მუნიციპალიტეტის აგრარულ ბაზარს სტუმრობდა.
მომხმარებლები პროდუქციის სიძვირეს, გამყიდველები კი ამბობენ, რომ გლეხის ნაშრომი არ ფასდება.
„როგორც მაქვს საშუალება ისე ვემზადები. რაც მომრჩა სახლში წამოვიღე გასაყიდად. კვერცხს ვყიდი, ცალს 50 თეთრად. კვერცხის გაყიდვით აღებული ფულით ვაპირებ ვიყიდო ის, რაც სახლში არ მაქვს. წინა წელთან შედარებით, ფასები კატასტროფულად გაზრდილია ყველაფერზე. ყველაზე პატარა პასკა 3.50- 4.50 ღირს. ყიდვას სახლში გამოცხობა ვარჩიე, მიუხედავად იმისა, რომ შაქარი და კარაქი ძალიან ძვირია“,_ ამბობს მარინა.
ერთ-ერთი გამყიდველის თქმით კი, სიმინდის ფქვილი 3 ლარზე მეტად არ იყიდება. მიუხედავად იმისა, რომ მოყვანა ძვირი ჯდება.
„4-იც დავაფასე სიმინდის ფქვილი, 3.50-იც, მაგრამ 3-ზე მეტად არ იყიდება. გლეხის ნაშრომს ფასი არ აქვს. რა ვქნა, თუ არ გავყიდე რა წავიღო სახლში?“,_ ამბობს ის.
ერთ-ერთი მომხმარებლის თქმით, პროდუქციის ფასები მიფრნავს ყოველდღე.
„პროდუქციის ფასები მიფრინავს ყოველდღე. ხელფასებს და პენსიებს არ უმატებენ. 1 ლიტრა ზეთი 10 ლარია, რა რით უნდა იყიდო?“,_ გვეუბნება ბაზარზე მყოფი ქალბატონი.
ჩოხატაურის აგრარული ბაზრის დირექტორი, თამაზ დევიძე კი ამბობს, რომ გასულ კვირასთან შედარებით ფასები ყველაფერზე მომატებულია, მაგრამ ამ ფასების ზრდას საწვავის ღირებულების ზრდა განაპირობებს.
„ფასები მომატებულია. მაგრამ გასულ კვირასთან შედარება რომ გავაკეთოთ 10-15 თეთრია მომატებული ყველაფერზე. გაზრდილია ყველის ფასიც. წინა კვირას რომ ღირდა 10 ლარი, ახლა 12 ლარია. ყველაფერზე მომატებული ფასია. ამ ფასების ზრდას განაპირობებს პროდუქციის არ არსებობს საკუთარი წამოების. საწვავი იმატებს და მატულობს ყველაფერზე ფასი. ხომ უნდა ჩამოტანა პროდუქციას გასაყიდად. ისეთი საგრძნობი მატება ფასების როგორიცაა ვთქვათ, ბათუმში არ შეინიშნება. ყველი თბილისში 10-17 ლარია, საქონლის ხორცი 20-25 ლარი ღირს თბილისში, აქ 17-18 ლარია. სინამდვილეში, ფასების მატება არის, მაგრამ სხვა ბაზრებთან შედარებით იაფია“,_ ამბობს დევიძე.
