ოზურგეთის მუნიციალიტეტის მერიაში, როგორც ვწერდით, 35 თანამშრომელი დაითხოვეს სამსახურიდან. აქედან ზოგი სრულიად ულუკმაპუროდ დარჩა, რადგან ან ოჯახის წევრიც არ ჰყავს, ან შინ, მეუღლე თუ შვილი უმუშევარია.
პროცესს ახლდა ერთი ულმობელი მიდგომაც _ როგორც თავად გათავისუფლებული არაერთი მოხელე ჩვენთან საუბრობს, შეთავაზებაც კი არავის გაუმეტებია მათთვის, თუნდაც უფრო დაბალი რანგის პოზიციაზე ან ნაკლები ანაზღაურების ხელფასით.
„გურია ნიუსთან“, აღნიშნულ ხმაურიან თემაზე, საკუთარი მოსაზრება გამოთქვა, საკრებულოს წევრმა, პარტია „საქართველოსთვის“ წარმომადგენელმა, ალეკო ბურჭულაძემ:
„იმ შემთხვევაში, თუ კომპლექსურად შევხედავთ არსებულ სტრუქტურას, საშტატო განრიგსა და დებულების პროექტს, ასევე არსებულ ინფორმაციას გასაუქმებელი საშტატო ერთეულების ფუნქციურ დატვირთვაზე, გადაჭრით შეგვიძლია ვთქვათ, რომ მიმდინარე რეორგანიზაცია არ ემსახურება მერიის, როგორც ადმინისტრაციული ორგანოს, სტრუქტურულ და ფუნქციურ გაჯანსაღებას.
ამასთან, აღნიშნული პროცესის დასახელებული საფუძველი, კერძოდ – სწრაფი და ეფექტური მომსახურების მიზნის მიღწევა, ვერ უძლებს კრიტიკას. სრულიად საპირისპიროდ, არსებობს დასაბუთებული ვარაუდი, რომ აღნიშნული პროცესის უკან სწორედ კონკრეტული პირების მიმართ დევნისა თუ ანგარიშსწორების მიზანი დგას. საკრებულოს სხდომაზე უკვე გავაჟღერე რამდენიმე პიროვნების სახელი და გვარი და მათი გათავისუფლების რეალური მიზეზები. მსურს კიდევ ერთხელ ხაზი გავუსვა, რომ ადამიანები, ვისაც ე.წ „რეორგანიზაციის” პროცესი ეხება, არიან საკუთარი საქმის პროფესიონალები და გამოირჩევიან მაღალი პასუხისმგებლობით. აქვე დავძენ, რომ მე ვიზიარებ მოსაზრებას მცირე და მოქნილი ადმინისტრაციის შესახებ, თუმცა, ეს უნდა გახორციელდეს სამართლიანად და მიუკერძოებლად, პოლიტიკური მოტივებისაგან სრულიად დაცლილად. გარდა ამისა, პასუხისმგებელ პირებს მართებთ იმ ფაქტის გააზრება, რომ ყოველი თანამშრომლის უკან დგას მისი ოჯახი. ამის ნათელი მაგალითია ერთ-ერთი ქალბატონის ემოციური, მეტიც – სასოწარკვეთილი გამოსვლა საკრებულოს სხდომაზე, რომელიც დეპუტატებს სრულიად საჯაროდ გვთხოვდა, მხარი არ დაგვეჭირა რეორგანიზაციის პროცესისათვის, ვინაიდან მისთვის და მისი შვილებისათვის ეს სავალალო შედეგების მომტანი იქნებოდა. მოხელისათვის საჯარო დაწესებულებაში საქმიანობა თვითრეალიზაციის შესაძლებლობის გარდა, მნიშვნელოვანი სოციალური დატვირთვის მატარებელია. იმ შემთხვევაში, თუ ვიზიარებთ ამ კონცეფციას, უნდა შევძლოთ იმ შედეგების გათვლა, რაც შეიძლება მოყვეს შტატების შემცირების პროცესს. იმისთვის, რომ ეს ღონისძიება ყველასათვის მაქსიმალურად უმტკივნეულო და არასაზიანო იყოს, აუცილებელია შესაბამისი ქმედითი ნაბიჯების გადადგმა,“ _ განაცხადა ბურჭულაძემ.
მან ხაზგასმით თქვა, რომ უსამართლო მიდგომის შედეგი, მუდამ არაკანონიერი იქნება:
_ ხელაღებით ადამიანების სამსახურიდან გათავისუფლება, განსაკუთრებით, როდესაც ამას ღიად დაჰყვება პოლიტიკური ელფერი, ვერც ერთ შემთხვევაში იქნება კანონიერი და სამართლიანი! _თქვა ალეკო ბურჭულაძემ.
ავტორი
