გურიაში სამი თვის განმავლობაში 10 ფიზიკური და 22 ფსიქოლოგიური ძალადობაა ოჯახში მომხდარი. ამის შესახებ ნათქვამია შინაგან საქმეთა სამინისტროს სტატისტიკურ მონაცემებში.
გავრცელებული ინფორმაციის მიხედვით, რეგიონში 27 შემაკავებელი ორდერია გამოცემული.
იანვრიდან მარტის ჩათვლით პერიოდში გურიაში, ოჯახში ძალადობის მსხვერპლი 5 მამაკაცი და 20 ქალი გახდა. ძალადობა კი 19-მა მამაკაცმა და 4-მა ქალმა განახორციელა.
ძალადობა ერთ-ერთი მწვავე პრობლემაა, რომელიც დღეს მთელი მსოფლიოს წინაშე დგას. მიუხედავად იმისა, რომ უფრო და უფრო იზრდება მცდელობა მისი აღკვეთისათვის, არ არსებობს ისეთი იარაღები რომლებიც საბოლოოდ გაგვანთავისუფლებს მისგან.
ხშირად, როდესაც ძალადობაზეა საუბარი, პირველ რიგში, ფიზიკური ზემოქმედება გვახსენდება. როგორც აღმოჩნდა, ადამიანთა ურთიერთობებში, უფრო მეტად, ემოციურ ძალადობას აქვს ადგილი, და, სამწუხაროდ, ის მხოლოდ ეტაპია ფიზიკურ ძალადობამდე.
ინფორმაციისთვის, ფსიქოლოგიური ძალადობა არის შეურაცხყოფა, შანტაჟი, დამცირება, მუქარა ან სხვა ისეთი მოქმედება, რომელიც იწვევს ადამიანის პატივის და ღირსების შელახვას.
ფიზიკური ძალადობა – ცემა, წამება, ჯანმრთელობის დაზიანება, თავისუფლების უკანონო აღკვეთა ან სხვა ისეთი მოქმედება, რომელიც იწვევს ფიზიკურ ტკივილს ან ტანჯვას; ჯანმრთელობის მდგომარეობასთან დაკავშირებული მოთხოვნების დაუკმაყოფილებლობა, რაც იწვევს ოჯახის წევრის ჯანმრთელობის დაზიანებას ან სიკვდილს.
