გუშინ ყველა წამყვანი იტალიური გამოცემის მთავარ გვერდზე ხვიჩა კვარაცხელიას ფოტოებს და მასზე სტატიებს შეხვდებოდით.
Corriere Dello Sport: „სერია A“-ს პირველ ორ თამაშში 3 გოლი. დუბლი „მონცას“ შესაჩერებლად. ჯერ შედევრი ინსინიეს სტილში, მარჯვენა ფეხით შორეულ კუთხეში, შემდეგ საოცარი დრიბლინგი: ვინც ამ საწყის ორ ტურში „ნაპოლის“ თამაში ნახა, მიხვდა, რომ გუნდში ფენომენი მივიდა. ხვიჩა კვარაცხელია 21 წლისაა და ყველა თვისება აქვს იმისთვის, რომ ტოპმოთამაშე გახდეს. სწორედ ის იყო სპალეტის ორი წარმატების წინამძღოლი“.
Gazzetta Dello Sport: „კვარაცხელიას შოუ! ქართველი შთამბეჭდავი იყო სეზონის სადებიუტო საშინაო თამაშშიც. შოუ ყველა გაგებით. ენთუზიაზმით სავსე „მარადონა“, გუნდი, რომელიც ლამაზ ფეხბურთს აჩვენებს და ფეხბურთელები, რომლებიც წარმოუდგენლად თამაშობენ. „მონცამ“ ვერაფერი მოახერხა კვარაცხელია-ოსიმენის დუეტთან. გოლების თანმიმდევრობა იგივე იყო, როგორც ვერონაში და კიდევ უფრო ეფექტური. მეორე ტაიმში ისევ K ფაქტორი ამუშავდა. ქართველმა დუბლი შეასრულა და კიმ მინ-ჯემაც გაიტანა. სათადარიგო სკამზე დარჩნენ ნდომბელე, რასპადორი და სიმეონე – ფეხბურთელები, რომლებსაც უკვე ლამაზი და სანახაობრივი „ნაპოლის“ გაუმჯობესება შეუძლიათ. ქართველის სტარტი კი წარმოუდგენელია – ორ თამაშში სამი გოლი: თავით, მარჯვენა ფეხით და მარცხენა ფეხით. ის მართლაც სრულყოფილი მოთამაშეა”.
Calciomercato: „ამ კვარაცხელიასთან ერთად ოცნება ლეგიტიმურია, ის „სტადიო მარადონას“ ახალი კერპია“.
Tuttosport: „კვარა-ოსი: საშიში დუეტი. „ნაპოლი“ ოცნებობს „მარადონას“ ახალი კერპისა და მატჩის გმირის კვარაცხელიას ჯადოქრობებით. დუბლი და ბრწყინვალე თამაში ქართველი ფეხბურთელისგან, რომელმაც თავისი ტიფოზების წინაშე სადებიუტო მატჩში აჩვენა ძლიერი ხასიათი და განსაკუთრებული ჰარმონია მოედანზე ოსიმენთან, რომელმაც ასევე გაიტანა“.
ქართველის ასპარეზობა „ნაპოლის“ ვებგვერდმა შემდეგნაირად გამოეხმაურა.
„მარადონას სტადიონზე „ნათლობაზე“ ნეაპოლის ცისფერ ცაზე ვარსკვლავი დაიბადა. მას ძნელად წარმოსათქმელი გვარი და უსაზღვრო ნიჭი აქვს. ქართველი თამაშის დაწყებიდან ნახევარ საათში იდუმალებით მოცული მზერით ანათებს სცენას და ბურთის სუფთა აბრეშუმის ალერსით გააქვს გოლი. შემდეგ კუპიდონის ისარივით იჭრება ნეაპოლელთა გულებში. მესამე ისევ კვარამ გაიტანა – ყინულის თვალების მქონე ოქროს ბიჭმა და კრისტალურმა ტალანტმა. უწოდეთ მას ქართველი ან უბრალოდ გამოცხადება. ეს „მარადონაზე“ ხვიჩა კვარაცხელიას დიდების პირველი საღამოა. ისტორია უკვე კალმით იწერება. ცისფერ ცაზე ვარსკვლავი დაიბადა…“
„ნაპოლის“ მწვრთნელმა ლუჩანო სპალეტიმ ხვიჩა კვარაცხელიას თამაში შემდეგნაირად შეაფასა:
„ხვიჩას აქვს ხარისხი, ის შესანიშნავი პროფესიონალი და კარგი ბიჭია. მეტოქესთან ერთი ერთზე თამაშის განსაკუთრებული მანერა აქვს. იცის კარი სად არის, შეუძლია მარჯვენათიც დაარტყას და მარცხენათიც. ჯერ კიდევ გრძნობს ამ ახალ კლუბში უზარმაზარ წნეხს. უნდა განიტვირთოს. პირველ 10 წუთში მოჩანდა, რომ პრობლემები ჰქონდა. იცის, რომ საჭიროა მომთხოვნი პუბლიკის გართობა. „ნაპოლის“ გულშემატკივრები ასეთები არიან. ეს გოლები მღელვარების ნაწილობრივ მოხსნაში დაეხმარება“
ნეაპოლელთა თავდამსხმელმა ვიქტორ ოსიმენმა შემდეგი კომენტარი გააკეთა:
„კვარაცხელიამ ძალიან კარგად ითამაშა, ჩვენ მისი თამაშით შეგვიძლია მხოლოდ ბედნიერები ვიყოთ. მას შეუძლია თამაშების მოგებაში დაგვეხმაროს. კვარა საოცრად ნიჭიერია და ჩვენ დღითიდღე უკეთ ვუგებთ მოედანზე ერთმანეთს. ვფიქრობ, შეგვიძლია მთელ გუნდთან ერთად ძალიან კარგად ვითამაშოთ“.
ხვიჩა კვარაცხელიას წარმატებას რუსეთშიც გამოეხმაურნენ. „სპორტ-ექსპრესის“ კორესპონდენტი მოსკოვის „ლოკომოტივის“ ყოფილ მწვრთნელს იური სიომინს „მონცასთან“ კვარაცხელიას პირველი გატანილი გოლის შემდეგ დაუკავშირდა და ჰკითხა, გაუკვირდა თუ არა მისი წარმატებული დებიუტი, რაზეც უპასუხა, რომ ეს კანონზომიერებაა და მოსკოვური კლუბის ექს-პრეზიდენტი ვასილ კიკნაძე გააკრიტიკა:
„დაურეკეთ კიკნაძეს და ჰკითხეთ, რატომ არ დავიტოვეთ. ეს ხელიდან გაშვებაა? რა ხელიდან გაშვება? ეს დივერსიაა. კვარაცხელიამ საოცარი გოლი გაიტანა. სხვათა შორის, ეს დარტყმა მას დაყენებული აქვს. მარჯვენა ფეხით მუდამ „მოჭრით“ შორეულ კუთხეში აგზავნის ბურთს. ყოველი ვარჯიშის შემდეგ ამაზე მუშაობდა. ყოველთვის გამოსდიოდა. ეს კანონზომიერი გოლია“.
ავტორი
