სოციალურად დაუცველთა დასაქმების პროგრამა უკვე რამდენიმე თვეა, რაც მოქმედებს. დასაქმების პროგრამით სარგებლობენ 18 წლიდან საპენსიო ასაკამდე სოციალური შემწეობის მიმღები შრომისუნარიანი პირები, რომელთაც არ აქვთ მინიჭებული შშმ სტატუსი ან არ აქვთ ჯანმრთელობის მძიმე პრობლემები.
ცნობისთვის, საზოგადოებრივი სამუშაო არ განაპირობებს სოციალური დახმარების შეწყვეტას. მოსარგებლის ოჯახს 4 წლის განმავლობაში შეუნარჩუნდება საარსებო შემწეობა.
როგორც ჯანდაცვის სამინისტროში განმარტავენ, თუ 4 წლის შემდეგ ოჯახის სოციალური მდგომარეობა გაუმჯობესებული არ იქნება, ისინი დახმარებას ისევ მიიღებენ.
ამ პროგრამის ფარგლებში, როგორც “გურია ნიუსს” ჩოხატაურის მუნიციპალიტეტის მერიის პასუხისმგებელმა პირმა სოციალური დასაქმების პროგრამის საკითხებში, ეკატერინე გურჯიშვილმა უთხრა, ამ დროისთვის 720 ბენეფიციარია დასაქმებული:
“დღეის მდგომარეობით, დასაქმებულია 720 ბენეფიციარი. ეს ციფრები ყოველდღიურად იცვლება. არის შემთხვევები, როცა დასაქმებულები უარს ამბობენ მუშაობაზე. გარდა ამისა, არის სოფლები, სადაც იმდენი ადამიანია დასაქმებული, რომ მეტს ვეღარ ვასაქმებთ, რადგან სამუშაო არაა და არის სოფლები, სადაც პირიქითაა”, _ ამბობს გურჯიშვილი.
ჩვენს კითხვაზე თუ რამდენმა ადამიანმა თქვა უარი დასაქმების პროგრამაში მონაწილეობაზე, გურჯიშვილი ამბობს, რომ ასეთი ადამიანების რაოდენობა ბევრი არაა:
“30-32 კაცია, ვინც უარი თქვა. მათ შეავსეს განაცხადი და გადაუგზავნეს სოციალურ სამსახურს. უარის თქმის მიზეზი ზოგჯერ ისიც ხდება, რომ ერთი ოჯახიდან რამდენიმე ადამიანია დასაქმებული და ამბობენ, რომ საშინაო საქმეებს ვეღარ მოასწრებენ, თუმცა, მოფიქრების შემთხვევაში, მომართვა დასაქმების შესახებ კვლავ შეუძლიათ”, _ გვეუბნება გურჯიშვილი.
რაც შეეხება დასაქმების პროგრამაში ჩართულ პირებს, მათ მიერ შესრულებულ სამუშაოზე, როგორც უკვე ცნობილია და ჩვენც ვწერდით, მონიტორინგი მიმდინარეობს. ანაზღაურებასაც, რომელიც ოფიციალურად 300 ლარია, შესრულებული სამუშაოს შესაბამისად იღებენ:
“ხორციელდება მონიტორინგი, ვინ როგორ ასრულებს სამუშაოს, მთელი სიმკაცრით მიდის კონტროლი. აბა, ტყუილად ფულს რატომ დაარიგებენ?
მონიტორინგის დროს ცენტრალური სააგენტოდანაც მოდიან, ასევე, გურიის რეგიონის სააგენტოდანაც. ყოფილა შემთხვევა, ერთ თვეში სოფელში რამდენჯერმე მისულან და გადაუმოწმებიათ. უნდა ითქვას, რომ დასაქმებულები კარგად ასრულებენ მოვალეობას. დასუფთავდა და იერსახე შეიცვალა სოფლებმა. ძირითადად, სასაფლაოს სუფთავდება, წმენდენ არხებს, საბავშვო ბაღებშიც გვყავს ეზოს მომვლელებად დასაქმებული, სკოლებშიც. უმეტესობა სიხარულით დასაქმდა და ასრულებენ მოვალეობას, მიიღებენ ხელფასს და რა თქმა უნდა კარგია, მდგომარეობა გაუმჯობესდება ამ ოჯახების”, _ ამბობს ეკატერინე გურჯიშვილი.
ჩვენ ვცადეთ, მოგვეპოვებინა ინფორმაცია ლანჩხუთიდან და ოზურგეთიდანაც იმის შესახებ, თუ რამდენი ადამიანი დასაქმდა აღნიშნული პროგრამით და რამდენმა თქვა უარი დასაქმებაზე, მაგრამ ინფორმაცია, რომელიც ჩოხატაურში მარტივად მოგვაწოდეს, აღმოჩნდა, რომ ლანჩხუთისა და ოზურგეთის მერიებში არ იძლევიან და დასაქმების სააგენტოდან უნდა გამოვითხოვოთ:
“ჩვენ ერთიანი ბაზა არ გვაქვს. არიან დასაქმებულები სოციალურად მომუშავეები მაგალითად, სკოლებში, ბაღებში. ცალკე სკოლამ უნდა მოგვაწოდოს ინფორმაცია, ცალკე ბაღმა. ჯამური ინფორმაცია, როგორიც თქვენ გაინტერესებთ, მოგცემთ ოზურგეთის სოციალური სააგენტო”, _ გვითხრეს ოზურგეთის მერიის პრესსამსახურში.
ამის შემდეგ თეა ლომჯარიას დავუკავშირდით სოციალურ სააგენტოში, თუმცა მან გვითხრა, რომ ინფორმაციის მისაღებად დასაქმების სააგენტოს უნდა მივმართოთ:
“დასაქმების სააგენტოსთვის არ მიგიმართავთ? მე რამდენად მაქვს უფლება ამ ინფორმაციის მოწოდების არ ვიცი, ჩემი კომპეტენცია არ არის. მე, უბრალოდ, ვეხმარები სოციალური დასაქმების სააგენტოს, მემორანდუმია და რეგისტრაციას ვაკეთებთ ადამიანების, თორემ ეს არის დასაქმების სააგენტოს ფუნქცია, გავარკვევ და დაგიკავშირდებით”, _ გვითხრა ლომჯარიამ.
თუმცა, ცოტა ხანში ოზურგეთის მერიის პრესსამსახურის ხელმძღვანელი ნინო ბახტაძე თავად დაგვიკავშირდა და მოგვაწოდა ინფორმაცია, რომ ოზურგეთში 778 სოციალურად დაუცველი მოქალაქეა დასაქმებული:
“პრემიერ-მინისტრის მიერ ინიცირებული პროექტი, რომელიც გულისხმობს სოციალურად დაუცველი მოსახლეობის დასაქმებას აქტიურად მიმდინარეობს. ოზურგეთში მცხოვრები და რეგისტრირებული 778 სოციალურად დაუცველი მოქალაქეა დასაქმებული სხვადასხვა სამუშაოზე”, _ გვითხრა ბახტაძემ და აღნიშნა, რომ სხვა დამატებითი ინფორმაციის მისაღებად დასაქმების სააგენტოს უნდა მივმართოთ.
ლანჩხუთის მერიის პრესსამსახურშიც, კითხვაზე _ თუ რამდენი ადამიანი არის დასაქმებული სოცდაუცველთა დასაქმების პროგრამის ფარგლებში და რამდენმა თქვა უარი _ დასაქმების სააგენტოში გადაგვამისამართეს.
“დასაქმების სააგენტოს მიმართეთ”, _ გვითხრა მერიის პრესსამსახურმა.
დასაქმების სააგენტოში კი გვითხრეს, რომ უწყებას ინფორმაციის მისაღებად წერილობით უნდა მივმართოთ.
“გურია ნიუსი” აგრძელებს საკითხზე მუშაობას და ინფორმაციას სააგენტოდან მიღებისთანავე შემოგთავაზებთ.
ავტორი
