“განახლებადი ენერგიის ინსტიტუტი”(IEO) იწყებს UNIDO-ს პროექტს “საქართველოს რეგიონებისა და თემების გადასვლა მდგრადი ენერგეტიკული მომავლისკენ” _ ” მზის ფოტოელექტრული (PV) სისტემები საქართველოს ქალაქებისთვის”. ეს არის გაეროს ინდუსტრიული განვითარების ორგანიზაციის პროექტი, რომელიც ხორციელდება საქართველოს მთავრობასთან შეთანხმებით, პოლონეთის რესპუბლიკის საგარეო საქმეთა სამინისტროს მხარდაჭერით.
პროექტის მიზანია საქართველოს ხუთ ქალაქში მზის ენერგიის გამოყენების ხელშეწყობა და მზის ფოტოელექტრული(PV) სისტემების დანერგვა მუნიციპალურ ეკონომიკის დონეზე. პროექტში ჩართულია ჩოხატაურის მუნიციპალიტეტი.
ამ საკითხთან დაკავშირებით 5 სექტემბერს თბილისში ჩატარდა კონფერენცია, 8 სექტემბერს კი, ჩოხატაურს გაეროს ინდუსტრიული ორგანიზაციის წარმომადგენლები ესტუმრნენ.
ისინი ჩოხატაურის მუნიციპალიტეტის მერის პირველ მოადგილეს მაია კუტუბიძეს, საკრებულოს თავმჯდომარის პირველ მოადგილეს ზაალ მამალაძეს, მერიის სხვა თანამშრომლებს შეხვდნენ და მათთან ერთად დაბა ჩოხატაურში მდებარე რამდენიმე შენობა მოინახულეს.
რა არის ამ პროექტის მიზანი და რა უნდა გაკეთდეს ჩოხატაურში _ ამ საკითხების შესახებ მაია კუტუბიძეს ვესაუბრეთ.
“პროექტის მიზანია განახლებად ენერგიაზე გადასვლა. მოგეხსენებათ, რომ ენერგიები დღითიდღე ძვირდება. ამიტომ პროექტის მიზანია, რაც შეიძლება მაქსიმალურად გამოვიყენოთ ადგილობრივი რესურსები ამ კუთხით და ფინანსური რესურსების ხარჯი შევამციროთ, ასევე, ნაკლები ნახშირორჟანგის გამოფრქვევა მოხდეს. ეს არის ძალიან გლობალური თემა. ზოგადად პროექტს ასე ჰქვია “მზის ენერგია საქართველოს ქალაქების მდგრადი განვითარებისთვის”. ეს არის UNIDO-ს პოლონურ-ქართული პროექტი.
ჩვენ სტუმრებს ვაჩვენეთ გარკვეული შენობები, სადაც გვინდა, რომ დამონტაჟდეს მზის პანელები. დაათვალიერეს ჩვენთან ერთად ეს შენობები, ახლა განსაზღვრავენ კრიტერიუმებს და ველოდებით, რომელ შენობას ან შენობებს შეარჩევენ”, _ ამბობს კუტუბიძე.
კითხვაზე, თუ რომელი შენობები დაათვალიერეს მათ და რა კრიტერიუმებით მოხდა გაეროს ინდუსტრიული განვითარების ორგანიზაციის წარმომადგენლებისთვის შენობების შეთავაზება, მერის პირველი მოადგილე განმარტავს:
“ჩვენ შევთავაზეთ ისეთი შენობები, როგორიც მათ მოითხოვეს. ეს არის, ძირითადად, შენობები, რომლებიც ირიცხება მერიის ბალანსზე, მოიხმარენ ბევრ ელექტროენერგიას. რომლის საფასურს იხდის მერია. ჩვენ შევთავაზეთ მერიის შენობა, რადგან აქ ბევრ ენერგიის მოხმარება ხდება, ასევე, პირველი ბაგა-ბაღის შენობა, ხელოვნების სასახლე, სამრევლო სკოლა. მართალია, სამრევლო სკოლის შენობა ჩვენს ბალანსზე არ არის, მაგრამ ისინი დაინტერესებულები არიან იმითაც, რომ შენობაში, სადაც მზის პანელები განთავსდება, იყოს კომუნიკაცია მოსახლეობასთან. მათ მიზანი აქვთ, რომ მოსახლეობამ გააკეთოს ანალიზი, რა ეფექტი აქვს აღნიშნულ სისტემას, დაინტერესდნენ და დაიწყონ განახლებადი ენერგიის სისტემაზე გადასვლა.
გეგმა არის საკმაოდ ამბიციური. ჩვენი ქვეყნის ელექტროსისტემაში 15%-ს არ აღემატება განახლებადი ენერგიები, მომდევნო 7 წლის განმავლობაში კი 27.4%-ს უნდა მიაღწიოს. რაც შეეხება ჩვენს შეთავაზებას, მათ პასუხს ველოდებით დაახლოებით ერთ თვეში. იმედი გვაქვს, რომ 2-3 შენობა მაინც აღიჭურვება განახლებადი ენერგიის მწარმოებელი სისტემით”, _ ამბობს კუტუბიძე.
ჩოხატაურისთვის, ეს არ იქნება განახლებადი ენერგიის მოხმარების პირველი შემთხვევა. ჩოხატაურში უკვე არის 2 ობიექტი, რომლებიც მოიხმარენ მზის ენერგიისგან წარმოებულ ენერგიას.
“მზის პანელები არის დამონტაჟებული პირველ საბავშვო ბაღში, ასევე, ზოტის საბავშვო ბაღში გაკეთებულია ენერგოეფექტური ღუმელები”, _ ამბობს მაია კუტუბიძე.
ავტორი
