უკვე მეორე დღეა, ტერორისტული ქვეყანა აგრძელებს მასიურ თავდასხმას უკრაინის ენერგეტიკულ ინფრასტრუქტურაზე. – ამის შესახებ უკრაინის პრემიერ–მინისტრმა დენის შმიჰალმა ტელეგრამის არხზე განაცხადა.
მისი თქმით, რუსეთის ფედერაციამ დღეს უკრაინის ენერგეტიკული ინფრასტრუქტურა 33-ჯერ დაბომბა.
„რუსეთი არ ჩერდება ჩვენი ენერგეტიკული ინფრასტრუქტურის განადგურების მცდელობებში. საგანგებო სიტუაციების სამსახურის ინფორმაციით, ამ დღეს უკვე დაფიქსირდა 33 სროლა. მტერი აგრძელებს ათობით რაკეტის ხარჯვას ასობით მილიონი დოლარის ღირებულებით. რათა უკრაინელები ერთი–ორი დღე ელექტროენერგიის გარეშე დარჩნენ, მაგრამ ჩვენ ერთი ვართ და გავძლებთ“, – წერს პრემიერი.
მან ასევე დასძინა, რომ გუშინდელი დაბომბვის დროს 3900 დასახლებული პუნქტი გაითიშა და ახლა ენერგეტიკოსებმა და მაშველებმა შეძლეს ელექტროენერგიის აღდგენა უმეტეს რეგიონებში.
„სინათლე დაუბრუნდა 3800 დასახლებას. დასავლეთის რაიონებში ელექტროენერგიის მიწოდება დასტაბილურდა, ხარკოვი და ხარკოვის რეგიონში მდებარე დასახლებებში თითქმის მთლიანად აღდგენილია. მიმდინარეობს აღდგენითი სამუშაოები ცენტრალური რეგიონებისა და კიევის ელექტრომომარაგების უზრუნველსაყოფად. მათი დასრულება იგეგმება რამდენიმე დღეში“, – წერს დენის შმიჰალი.
შმიჰალმა კვლავ მოუწოდა უკრაინელებს, შეზღუდონ ელექტროენერგიის მოხმარება პიკის საათებში.
„საღამოს 17:00-დან საღამოს 23:00 საათამდე, გთხოვთ, არ ჩართოთ ენერგო ინტენსიური ტექნიკა: ელექტრო ღუმელები, ელექტრო ქვაბები, ელექტრო ხელსაწყოები, გამათბობლები და კონდიციონერები, ღუმელები და უთოები, მიკროტალღური ღუმელები, ყავის აპარატები, სარეცხი მანქანები და ჭურჭლის სარეცხი მანქანები. ეს ძალიან მნიშვნელოვანია ჩვენი ენერგეტიკული სისტემის სტაბილური მუშაობისთვის. გუშინ უკრაინელებმა მთელი ქვეყნის მასშტაბით, მოწოდებაზე, ნებაყოფლობით შეამცირეს ელექტროენერგიის მოხმარება საშუალოდ 10%-ით. მადლობა ყველას, ვინც წვლილი შეიტანა ჩვენს ენერგეტიკულ სტაბილურობაში,“ – წერს უკრაინის პრემიერი.
პრემიერმა, ასევე დასძინა, რომ ზოგიერთ რეგიონში დაზიანებული კრიტიკული ინფრასტრუქტურის აღდგენის აუცილებლობის გამო, გამოიყენება ელექტროენერგიის გათიშვის გრაფიკი.
„მნიშვნელოვანია გვესმოდეს, რომ მოხმარების მსგავსი შეზღუდვები დაკავშირებულია არა ენერგოსისტემაში ელექტროენერგიის დეფიციტთან, არამედ მხოლოდ აღდგენითი სამუშაოების ჩატარების აუცილებლობასთან. ახლა არ არის საჭირო ელექტროენერგიის სასწრაფო დახმარება ევროპის ქვეყნებიდან და არც იმპორტი,“ – აღნიშნა შმიჰალმა.
ავტორი
