გუშინ იტალიურმა გამოცემამ „ilmattino.it“ გაავრცელა ინფორმაცია, რომ ხვიჩა კვარაცხელიას არანაირი ტკივილი აღარ აწუხებს და სრული დატვირთვით ვარჯიშობს.
ქართველი კვლავ ჯადოქრობებს აკეთებს და მისთვის ფიზიკური პრობლემები უკანაა მოტოვებული.
„ნაპოლი“ სეზონის განახლებისთვის თურქეთში სერიოზულად ემზადება. დღეს, ადგილობრივ „ანტალიასპორს“ ამხანაგურად გაეჯიბრება, 10 რიცხვში პრემიერლიგის ბინადარ „კრისტალ პალასს“ ეთამაშება, შემდეგ იტალიაში დაბრუნდება და ერთ ამხანაგურსაც ნეაპოლის „მარადონაზე“ ჩაატარებს.
გუშინ, მადრიდის „რეალის“ მთავარი მწვრთნელის, კარლო ანჩელოტის შვილმა და ამავდროულად, ასისტენტმა დავიდე ანჩელოტიმ იტალიურ მედიასთან ხვიჩა კვარაცხელიას შესახებ ისაუბრა.
„კვარაცხელიამ დაამტკიცა, რომ მართლაც საინტერესო ფეხბურთელია, ყველა მასზე ლაპარაკობს. ფეხბურთის გულშემატკივრისთვის სასიამოვნოა მისი თამაშის ყურება, რადგან ის ქმნის დისბალანსს, სწრაფია ერთი–ერთზე თამაშში. აქვს ძლიერი თვისებები და ყველაფერი იმისთვის, რომ დიდი ფეხბურთელი გახდეს“, – განაცხადა უმცრსმა ანჩელოტიმ.
გამოცემა „il Resto del Carlino“–ს ინფორმაციით, საქართველოს ნაკრების კაპიტანი თორნიკე შენგელია იტალიურ „ვირტუს ბოლონიას“ ევროლიგის მომდევნო ტურში ბერძნულ „ოლიმპიაკოსთან“ მატჩში დაუბრუნდება.
ქართველმა თავდამსხმელმა ტრავმა მოიშუშა და საბერძნეთში გუნდთან ერთად იქნება, ისევე, როგორც ამერიკელი ლეგიონერი სემი ოჯელეიე. ამ ორი კალათბურთელის დამატება დიდი დახმარებაა „ვირტუსისთვის“, რომელსაც ევროლიგაში ზედიზედ 3 წაგება აქვს და 18-გუნდიან ლიგაში მე-14 ადგილზე იმყოფება.
ნაციონალურ საკალათბურთო ასოციაციაში ზედიზედ მეორე მატჩი მოიგო „მილუოკი ბაქსმა“, რომელიც „ორლანდო მეჯიქს“ შეხვდა და 109:102 გაიმარჯვა.
აღნიშნულ შეხვედრაში სოლიდური სათამაშო დრო მიეცა სანდრო მამუკელაშვილს. 22 წლის ფორვარდმა პარკეტზე 23 წუთი გაატარა, რა დროშიც 8 ქულა, 6 მოხსნა, 2 შედეგიანი გადაცემა, 1 ჩაჭრდა და 1 დაფარება დააგროვა. ეს მიმდინარე სეზონში სანდროსთვის სარეკორდო დრო იყო.
უელსის რაგბის ნაკრების მთავარი მწვრთნელი უეინ პივაკი კი თანამდებობიდან გაანთავისუფლეს და არც არავის დაუმალავს, რომ ამის ერთ–ერთი მიზეზი ნოემბრის ტესტებზე საქართველოსთან მარცხი გახდა.
„ბორჯღალოსნებისთვის“ ისტორიული და უელსელებისთვის ძალიან მძიმე მატჩი კარდიფში შედგა. ქართველმა მორაგბეებმა ექვსი ერის წარმომადგენელ ნაკრებს სტუმრად პირველად აჯობეს (13:12) და ამ თამაშის ბოლო წუთებზე პივაკის სახეზე უდიდესი იმედგაცრუება იყო ასახული.
„პივაკი თანამდებობას ტოვებს შემოდგომის სერიის შემდეგ, რომლის განმავლობაშიც უელსის ნაკრებმა ერთადერთი ტესტი მოიგო, ყველაზე მტკივნეული კი საქართველოსთან საშინაო მარცხი გახდა“, – დაწერა „BBC“–მ და უელსის რაგბის კავშირის აღმასრულებელი დირექტორის სტივ ფილიპისის კომენტარიც გაავრცელა:
„ასეთი ნაბიჯის გადადგმა ყოველთვის მძიმეა, თუმცა, სხვაგვარად მოქცევის უფლება არ გვქონდა. ჩვენი ნაკრების ინტერესებიდან გამომდინარე, სწრაფად და ეფექტიანად უნდა გვემოქმედა“.
გუშინ, ესპანურმა „მარკამ“ გაავრცელა ცნობა, რომ კრიშტიანო რონალდომ „ალ ნასრისთან“ შეთანხმებას მიაღწია და საუდის არაბეთის კლუბს 1-ელი იანვრიდან შეუერთდებოდა, თუმცა ეს ინფორმაცია სანდო წყაროებმა უარყვეს.
ცნობილმა იტალიელმა ჟურნალისტმა ფაბრიციო რომანომ სოციალურ ქსელში დაწერა, რომ „ალ ნასრის“ მსგავსი შეთავაზება პორტუგალიელისთვის მართლაც გაკეთებული აქვს, თუმცა კრიშტიანო მთლიანად მუნდიალზეა კონცენტრირებული და მას თანხმობა არ განუცხადებია.
აღნიშნული ამბავი უარყო რონალდოსთან დაახლოებულმა ჟურნალისტმა პირს მორგანმაც, რომელმაც აღნიშნა, რომ გავრცელებული ცნობა სიცრუეა და ჯერჯერობით არანაირი შეთანხმება ოფიციალურად არ არსებობს.
გუშინ ცნობილი გახდა რომ საფრანგეთის ნაკრებისა და „მილანის“ მოთამაშე ოლივიე ჟირუ, კატარის მუნდიალის დასრულების შემდეგ ამჟამინდელ გუნდთან ხელშეკრულებას გაახანგრძლივებს.
ფრანგი ფეხბურთელი „მილანის“ ღირსებას 2021 წლიდან იცავს, წელს კი მასთან ერთად იტალიის ჩემპიონი გახდა. ჟირუს „მილანთან“ მოქმედი კონტრაქტი 2023 წლის ზაფხულამდე აკავშირებს.
იტალიური მედიის ცნობით, თანამშრომლობის გახანგრძლივებით ორივე მხარეა დაინტერესებულია. თავდამსხმელი ამჟამად მთლიანად მუნდიალზეა კონცენტრირებული, მაგრამ მისი დასრულებისთანავე კლუბთან კონტრაქტის გახანგრძლივების პროცესით დაკავდება.
ავტორი
