გუშინ, იტალიურ მასმედიასთან „პარმას“ ყოფილმა სპორტულმა დირექტორმა ენრიკო ფედელემ ისაუბრა და განაცხადა, რომ „ნაპოლი“ ხვიჩა კვარაცხელიასა და ვიქტორ ოსიმენის გარეშე ვერაფერს მოიგებდა.
„ეს „ნაპოლი“ იმ „ნაპოლიზე“ ძლიერი არ არის, რომელმაც პირველი-ორი სკუდეტო მოიგო. ფეხბურთი ტექნიკურ დონეზე გაღარიბდა. მარადონას, კარეკას და ჯორდანოს „ნაპოლის“ თუ გავიხსენებთ, დღევანდელი გუნდი უფრო ღარიბია. დღეს ფეხბურთელი ტექნიკურ დონეზე 15 წლისწინანდელ დონეს ჩამოუვარდება.
დღეს ბურთი გაცილებით ნაკლებს იწონის, ბუცები უფრო ეფექტურია და ა.შ. დღევანდელ „ნაპოლის“ მხოლოდ ორი გადამწყვეტი მოთამაშე ჰყავს: ვიქტორ ოსიმენი და ხვიჩა კვარაცხელია. ერთმა ჯერ კიდევ უნდა მოუმატოს და მეორეს 100%-ით თავისი შესაძლებლობები არ უჩვენებია.
სტანისლავ ლობოტკა არ არის გადამწყვეტი მოთამაშე, მაგრამ ის შეუცვლელია. გუნდი ოსიმენის და კვარაცხელიას გარეშე ვერ გაიმარჯვებს“, – განაცხადა ენრიკო ფედელემ.
ხვიჩა კვარაცხელიასა და ვიქტორ ოსიმენის შესახებ ისაუბრა ახლო წარსულში ცნობილმა იტალიელმა ფეხბურთელმა მიკელე პადოვანომაც.
„კვარაცხელიას და ოსიმენს განსაკუთრებული თვისებები აქვთ, ჯერ კიდევ შეუძლიათ გაუმჯობესება. ნიგერიელი ვლაჰოვიჩთან ერთად უახლოეს მომავალში საუკეთესო თავდამსხმელი იქნება. ქართველი მეტოქეს ატყუებს და ამ თვისებას ჩვენს ჩემპიონატში ხშირად ვერ ვხედავთ“, – თქვა მიკელე პადოვანომ.
გუშინ, ხვიჩა კვარაცხელიას თანაკლუბელი ვიქტორ ოსიმენი გამოცემას „Corriere Della Sera“ ესაუბრა და კომენტარი ხვიჩა კვარაცხელიაზეც გააკეთა.
„ჩვენს შორის ემპათია პირველივე წუთიდან არსებობს. ის ძალიან ძლიერი ფეხბურთელია, მაგრამ ასევე ოქროს ბიჭია. ეს ჩემთვის მნიშვნელოვანია“, – აღნიშნა ვიქტორ ოსიმენმა.
გიორგი მამარდაშვილის „ვალენსია“ 5 მარტს, სტუმრად „ბარსელონას“ დაუპირისპირდება. რასაკვირველია „ვალენსიას“ კარს კვლავაც ქართველი კარის დარაჯი მეკარე დაიცავს, რომელიც „კამპ ნოუს“ სტადიონზე უჩვეულო ფერის – შავი ფორმით წარსდგება.
მიზეზი, რის გამოც გიორგი მამარდაშვილს „ბარსელონასთან“ მატჩში შავი ფორმა ეცმევა, ესპანეთის ნაკრებისა და ბილბაოს „ატლეტიკის“ ყოფილი მეკარის, ხოსე ანხელ ირიბარის იუბილეა. ლეგენდარულ ბასკს, რომელიც გასული საუკუნის 60-70-იან წლებში ევროპის ერთ-ერთ საუკეთესო მეკარედ მიიჩნეოდა, პირველ მარტს 80 წელი შეუსრულდა. ამასთან დაკავშირებით, „ატლეტიკმა“ „ლა ლიგისა“ და „ლა ლიგა 2“-ის კლუბებს თხოვნით მიმართა, ირიბარის პატივსაცემად, მეკარეებმა მატჩები შავი ფორმებით ჩაატარონ.
ინიციატივას უკვე შეუერთდა „ვალენსია“, რომელმაც დაადასტურა, რომ მამარდაშვილი სრულებით შავი ფორმით ითამაშებს.
ხოსე ანხელ ირიბარი ბილბაოს „ატლეტიკის“ ღირსებას 18 სეზონის განმავლობაში იცავდა, ესპანეთის ნაკრებში კი, რომლის კაპიტანიც იყო, ევროპის 1964 წლის ჩემპიონი გახდა.
გუშინ ცნობილი გახდა, რომ საქართველოს ნაკრების კალათბურთელი სანდრო მამუკელაშვილი „მილუოკი ბაქსში“ აღარ ითამაშებს. მხარეებმა კონტრაქტი გაწყვიტეს და სანდრო უგუნდოდ დარჩა, „მილუოკი“ ქართველს ახალი გუნდის პოვნაშიც დაეხმარება.
სანდრო მამუკელაშვილი „სეტონ ჰოლის“ უნივერსიტეტის საკალათბურთო გუნდში თამაშობდა, რის შემდეგაც დრაფტიდან „მილუოკი ბაქსის“ რიგებში მოხვდა და იქ ორ სეზონში 65 მატჩი ჩაატარა. „მილუოკიში“ მამუკელაშვილს შეზღუდული დრო ჰქონდა და მისი გათავისუფლების მთავარი მიზეზიც ეს იყო.
ჯერჯერობით უცნობია, სად გააგრძელებს სანდრო მამუკელაშვილი კარიერას.
გუშინ ცნობილი გახდა, რომ არგენტინის ნაკრების კაპიტანმა, ლიონელ მესიმ, 35 ოქროს აიფონი შეუკვეთა ყველა ფეხბურთელისთვის და პერსონალისთვის, ვინც არგენტინის ნაკრებში ირიცხებოდა ყატარში გამარჯვების დროს.
175 ათასი გირვანქის ღირებულების 24-კარატიან მოოქროვილ სმარტფონებზე ამოტვიფრულია მოთამაშეების სახელები, ნომრები და არგენტინის ეროვნული ნაკრების ლოგო. მესის სურდა რაღაც განსაკუთრებული გაეკეთებინა პარტნიორებისა და თანამშრომლებისთვის მსოფლიო ჩემპიონატის მოგების აღსანიშნავად.
ავტორი
