ჰელსინკში, ევროპის სახალხო პარტიის (EPP) პოლიტიკურ ასამბლეაზე გაიმართა დებატები საქართველოს შესახებ და მსჯელობის შემდეგ მიღებულ იქნა რეზოლუცია. რეზოლუციაში დაგმობილია პარლამენტში ინიცირებული “რუსული კანონი”, ასევე, საქართველოს მთავრობის ანტიდასავლური კურსი.
დებატების ინიციატორი “ევროპული საქართველო” იყო. ასამბლეას პარტიის პოლიტსაბჭოს თავმჯდომარე, გიგი წერეთელი ესწრებოდა.
რეზოლუციაში დაგმობილია არამხოლოდ რუსული კანონი, არამედ საქართველოს მთავრობის ანტიდასავლური კურსი, რომელიც აჩვენებს აშკარა უკუსვლას დემოკრატიის სფეროში.
რეზოლუციაში აღნიშნულია, რომ “რუსული კანონის” საწინააღმდეგო აქციებზე დაინახეს, რამდენად დიდია ქართველების მისწრაფება უკეთესი მომავლისკენ.
EPP ამბობს, რომ ამ კანონის ყოველგვარი განხილვა უნდა შეწყდეს, დაკავებულები გათავისუფლდნენ. პარტია გმობს დემონსტრანტების მიმართ არაპროპორციული ძალის გამოყენებას.
“ზოგადად, უკანასკნელი ძლების მანძილზე საქართველოს მთავრობის კურსი მიანიშნებს დემოკრატიის აშკარა უკუსვლას. ამასთან ერთად, მთავრობის პოზიცია რუსეთის აგრესიაზე უკრაინის წინააღმდეგ, აბსურდული და ცილისმწამებლური პროპაგანდის კამპანია, თითქოს ევროკავშირი და აშშ წნეხს ავრცელებენ საქართველოზე, რომ სამხედრო მოქმედებები დაიწყოს რუსეთის წინააღმდეგ, რაც ზუსტად იმეორებს რუსული დეზინფორმაციის ნარატივს, განგაშის გამომწვევია. ამ ტიპის ქმედებებით, საქართველოს დღევანდელი მთავრობის აზროვნება აშკარად მიმართულია ევროატლანტიკური მომავლის წინააღმდეგ”, – წერია EPP-ს რეზოლუციაში.
გიგი წერეთელი რეზოლუციასთან დაკავშირებით აღნიშნავს, რომ დღეს ნათელია, რომ ამ ხელისუფლებასთან ერთად წარმოუდგენელია და არარეალურია მოხდეს იმგვარი განვითარება, რომ ვისარგებლოთ ამ ისტორიული მომენტით, მივიდეთ ევროინტეგრაციამდე და გავხდეთ ევროპის სრულუფლებიანი წევრები
“რეზოლუციაში ნათქვამია ძალიან მკაფიოდ, რომ არამარტო ეს კანონი, არამედ მთელი ამ წლების დემოკრატიული უკუსვლა საქართველოში, ის ნარატივები, ის გზავნილები, რომელიც ისმის ანტიდასავლური ხელისუფლების წარმომადგენლებისგან, ის პოზიცია, რომელიც მათ აქვთ რუსეთ-უკრაინის ომთან დაკავშირებით, ასევე ის გამოუთქმელი სურვილები და გადაუდგმელი ნაბიჯები რეფორმების გატარებასთან დაკავშირებით, ჩვენი ქვეყნის ევროინტეგრაციის გზის საწინააღმდეგო ნაბიჯებია. შესაბამისად, ყველასთვის დღეს ნათელია, რომ ამ ხელისუფლებასთან ერთად წარმოუდგენელია და არარეალურია მოხდეს იმგვარი განვითარება, რომ ვისარგებლოთ ამ ისტორიული მომენტით, მივიდეთ ევროინტეგრაციამდე და გავხდეთ ევროპის სრულუფლებიანი წევრები”, – ამბობს წერეთელი.
