სპეციალისტები ხშირად ამბობენ, რომ ძილი ახალგაზრდობისა და ჯანმრთელობის შენარჩუნების ერთ-ერთი მთავარი გასაღებია და მას ძალიან დიდი მნიშვნელობა აქვს. ჩვენი სხეული ღამით მელატონინს ასინთეზებს, რომელიც ხელს უწყობს სხეულის აღდგენას, ებრძვის თავისუფალ რადიკალებს და ამცირებს სტრესის ჰორმონის გამომუშავებას.
მელატონინი არის ჰორმონი, რომელიც ყველაზე უკეთ 23:00 საათიდან 03:00 საათამდე პერიოდში სინთეზდება. ღამის საათებში მისი დონე 10-ჯერ იზრდება და ძალიან ბევრ ფაქტორზე ახდენს გავლენას. მათ შორის, აფერხებს დაბერების პროცესსაც და ცხოვრების ხარისხს ზრდის.
ცნობილი, რომ ასაკთან ერთად მელატონინის სინთეზი და მისი კონცენტრაცია სისხლში მცირდება. მისი წარმოების მნიშვნელოვანი შემცირება 40 წლის შემდეგ იწყება. ხანდაზმულებში, ღამის მელატონინის პიკი ნაკლებადაა გამოხატული, თუმცა არსებულის შენარჩუნებაც ძალიან მნიშვნელოვანია.
ამ ჰორმონის ანტიოქსიდანტური აქტივობა უფრო მაღალია, ვიდრე C და E ვიტამინების შემთხვევაში. ის ორგანიზმის უჯრედებს თავისუფალი რადიკალებისაგან იცავს.
მელატონინი მხარს უჭერს იმუნური სისტემის გაძლიერებასა და კანის გაჯანსაღებას.
ეს ჰორმონი ამცირებს კორტიზოლის დონეს და შფოთვისაგან გვიცავს. სტრესის მუდმივად მაღალი დონე ჩვენი სხეულის უჯრედებს ანადგურებს და დაბერების პროცესს აჩქარებს.
მელატონინს ასევე აქვს ზოგადი სამკურნალო ეფექტი. არეგულირებს ძვლოვანი ქსოვილის წარმოქმნას, ხელს უწყობს ქოლესტერინის დონის შემცირებას, როდესაც ის იზრდება, იცავს უჯრედის დნმ-ს დაზიანებისგან და ამცირებს კიბოს განვითარების რისკს.
მელატონინის საკმარისი ფორმირებისთვის დღეში მინიმუმ 7 საათი ძილია საჭირო. ძილი უნდა იყოს უწყვეტი და ხარისხიანი.
ღამით, დაძინებამდე წინასწარ უნდა მოემზადოთ. სასურველია, დაძინებამდე, მინიმუმ 1 საათით ადრე მაინც შეწყვიტოთ გაჯეტების გამოყენება, ტელევიზორისა თუ სხვა ეკრანის ყურება. ეკრანის ცისფერი შუქი ნერვული სისტემის აქტივობას ზრდის. ასევე, ღამის საათებში არ დაგეგმოთ აქტიური სპორტული აქტივობები. შეეცადეთ, ბოლო კვება დაძინებამდე 3-4 საათით ადრე იყოს.
