ფრაქცია “ერთიანი ნაციონალური მოძრაობის” თავმჯდომარემ ლანჩხუთში, კახა ასკურავამ პრეზიდენტის იმპიჩმენტის საკითხის შეფასებისას, “გურია ნიუსთან” საუბარში განაცხადა, რომ “ქართულმა ოცნებამ” ქვეყანა “შაპიტოს ცირკად” გადააქცია.
“ნაციონალური მოძრაობის დამოკიდებულება სალომე ზურაბიშვილთან მიმართებაში საზოგადოებისთვის ცნობილია. რა აზრიც იყო 2018 წელს, იგივე აზრი გვაქვს პარტიაში დღესაც, თუმცა “ქართული ოცნების” მხრიდან პრეზიდენტის ინსტიტუტთან ბრძოლის პირად ანგარიშსწორებასთან დამსგავსება პირველ რიგში ქართულ სახელმწიფოს, ჩვენს ევროპულ ინტერესებს აზიანებს. იმ ფონზე როცა სალომე ზურაბიშვილი ევროპელ ლიდერებს ესაუბრება, ხვდება გერმანიის კანცლერს, ევროსაბჭოს პრეზიდენტს შარლ მიშელს, და ამ დროს მის თბილისში, იმპიჩმენტის პროცედურას იწყებენ, ეს არის პირდაპირ მიზანმიმართული პოლიტიკა. მათ იციან, რომ 100 ხმას ვერ მოუყრიან თავს და პრეზიდენტს იმპიჩმენტს ვერ მოუწყობენ, მაგრამ ამით აზიანებენ სახელმწიფოს ინტერესებს, რომ ვერ მივიღოთ ჯერ პირველ რიგში კანდიდატი წევრის სტატუსი და შემდეგ ვერ გავხდეთ ევროკავშირის წევრი. რაც ხდება სალომე ზურაბიშვილთან მიმართებაში აქვს მხოლოდ ერთი მიზანი, რომ მაქსიმალურად დაგვაშორონ ჩვენს ისტორიულ ადგილს, რომელიც არის ევროპაში და ევროკავშირში. შაპიტოს ცირკი იყო ჩემს ბავშვობაში და ეს ქვეყანა “ქართულ ოცნებას” გადაქცეული აქვს შაპიტოს ცირკად. თვითონ არიან ბედნიერად, კარგს ჭამენ, სვამენ და ხალხი კი გაუბედურებულია. გურიაში წელს ისეთი დაბალი ფასი აქვს თხილს, როგორც ისტორიაში არ ჰქონია. თვითონ “ქართული ოცნების” მომხრეც კი ალბათ დაფიქრებულია, თუ რამხელა დანაშაული ჩაიდინა მათი არჩევით”,_ გვითხრა კახა ასკურავამ.
ინფორმაციისთვის, დღეს “ქართული ოცნების” თავმჯდომარემ ირაკლი კობახიძემ განაცხადა, რომ პრეზიდენტის იმპიჩმენტის პროცედურისთვის საკონსტიტუციო სასამართლოს მიმართავენ. მმართველი გუნდი პრეზიდენტ ზურაბიშვილს კანონმდებლობის დარღვევაში სდებს ბრალს.
ცნობისთვის, პრეზიდენტი საზღვარგარეთ ევროკავშირის ლიდერებთან შეხვედრებს მართავს, თუმცა როგორც პრეზიდენტის გამგზავრების შემდეგ ცნობილი გახდა, მთავრობამ მას გერმანიაში ვიზიტის ნება არ მისცა.
ავტორი
