სად განახლდა და სად არა სააღმზრდელო პროცესი – ვითარება გურიის საბავშვო ბაღებში

საბავშვო ბაღებში საწავლო- სააღმზრდელო პროცესი განახლდა, თუმცა გურიაში რჩება საბავშვო ბაღები, სადაც პროცესის დაწყება ვერ მოხერხდა. ლანჩხუთში კი სააღმზრდელო პროცესი საერთოდ არ დაწყებულა.

დღეს სააღმზრდელო პროცესი განახლდა ჩოხატაურის საბავშვო ბაღებში.

როგორც “გურია ნიუსს”  ა(ა)იპ ჩოხატაურის მუნიციპალიტეტის სკოლამდელი საგანმანათლებლო-სააღმზრდელო დაწესებულება  ,,მომავალი“-ს ხელმძღვანელმა ნინო ბარამიძემ განუცხადა, პირველ დღეს საბავშვო ბაღში 425 აღსაზრდელი მივიდა.

რაც შეეხება ლანჩხუთის მუნიციპალიტეტს, იქ სააღმზრდელო პროცესი საბავშვო ბაღებში დღეს არ განახლებულა.

როგორც “გურია ნიუსს” ა(ა)იპ ლანჩხუთის მუნიციპალიტეტის სკოლამდელი საგანმანათლებლო
სააღმზრდელო ცენტრის დირექტორმა ნატა კობალავამ განუცხადა, ჯერჯერობით ზუსტი თარიღი, თუ როდის მივლენ აღსაზრდელები საბავშვო ბაღში უცნობია.

“სააღმზრდელო პროცესი ჯერ არ დაგვიწყია. ვაპირებთ რომ დავიწყოთ თვის ბოლოს, თუმცა ზუსტი თარიღი არ არის გადაწყვეტილი. სტიქიის შედეგად ბაღის შენობები არ დაზიანებულა, არ დატბორილა.  არის ბაღები, სადაც წყლის სათავე ნაგებობებია დაზიანებული მეწყერის ჩამოწოლის გამო და მიმდინარეობს გაწმენდითი სამუშაოები. თუმცა, სტიქიამდეც გადაწყვეტილი გვქონდა, რომ სააღმზრდელო პროცესი თვის ბოლოს დაგვეწყო, იმიტომ რომ საბავშვო ბაღების უმეტესობაში სარემონტო სამუშაოებია. ასევე გვაქვს საბავშვო ბაღის 2 ახალი შენობა, სადაც ვაპირებთ გადასვლას”_ გვითხრა კობალავამ.

რაც შეეხება ოზურგეთის მუნიციპალიტეტში მდებარე საბავშვო ბაღებს, როგორც სკოლამდელი სააღმზრდელო ცენტრის დირექტორი, მაკა ჭყონია ამბობს, სასწავლო-სააღმზრდელო  პროცესის განახლება რამდენიმე საბავშვო ბაღში ვერ მოხერხდა.

“სასწავლო-სააღმზრდელო პროცესი არ განახლებულა რამდენიმე საბავშვო ბაღში. ეს ბაღებია ქალაქის მესამე ბაღი და ნატანების საბავშვო ბაღი, სადაც შენობების სრული რეაბილიტაციის პროცესი ტარდება. ამ ბაღებში რეგისტრირებული აღსაზრდელები, რომელთა მშობლებმაც მოგვმართეს, გადავანაწილეთ მაქსიმალურად ახლომდებარე ბაღებში. ასევე სასწავლო-სააღმზრდელო პროცესი არ განახლებულა შრომა 1-ის და შრომა 2-ის საბავშვო ბაღებში. შრომა 2-ის საბავშვო ბაღი გადადის ახალ შენობაში და ოქტომბრისთვის მოვემზადებით მაქსიმალურად, რომ გაიხსნას ეს საბავშვო ბაღი, რაც შეეხება შრომა 1-ს და სოფელ თხინვალის საბავშვო ბაღებს, აქ სტიქიის შედეგად იყო პრობლემები და ვაგვარებთ ამ პრობლემებს. ოქტომბრის დასაწყისისთვის აქაც განახლდება სასწავლო სააღმზრდელო პროცესი”,_ გვითხრა მაკა ჭყონიამ.

ჭყონიას ინფორმაციითვე, ოზურგეთის საბავშვო ბაღებში  პირველ დღეს 1351 ბავშვი მივიდა.