გუშინ, „ნაპოლის“ სპორტულმა დირექტორმა მაურო მელუზომ ვიქტორ ოსიმენის შესახებ ისაუბრა.
„ოსიმენი ნეაპოლში უკვე დაბრუნდა. გაივლის სამედიცინო შემოწმებას და შემდეგ გავიგებთ, როდის შეძლებს ვარჯიშს. ამ ტრავმას , როგორც წესი, 5-6 კვირა სჭირდება, ვეცდებით, რაც შეიძლება მალე მზად იყოს. კონტრაქტის განახლება მასთან? ამაზე უკვე რამდენიმე თვეა ვსაუბრობთ და მოლაპარაკებები გაიწელა. ვნახოთ, რა მოხდება“, – თქვა მელუზომ.
ოსიმენის გარეშე მოასპარეზე „ნაპოლიმ“ ჩემპიონთა ლიგის მეოთხე ტურში შინ „უნიონ ბერლინს“ ვერ მოუგო.
რუდი გარსიას გუნდს მიმდინარე სეზონში „სტადიო მარადონაზე“ თამაში ძალიან უჭირს: ჩატარებული 7 მატჩიდან ნეაპოლში მხოლოდ ორი მოიგო.
აღსანიშნავია, რომ სტუმრად „ნაპოლი“ ბევრად უკეთ გამოიყურება, რადგან ჩემპიონთა ლიგაზე ორივე საგარეო თამაში მოიგო, ხოლო „სერია A“-ში გასვლაზე დაუმარცხებელია – 4 მოგება, 2 ფრე.
„ნაპოლის“ მთავარმა მწვრთნელმა რუდი გარსიამ „უნიონ ბერლინთან“ მატჩის შემდეგ კომენტარი გააკეთა.
„საჭირო იყო მეორე გოლით თამაში დაგვეხურა, მაგრამ ძალიან კარგი თამაში დაცვაში დაშვებული შეცდომით დავანგრიეთ. სამწუხაროა, რადგან გუნდი სხვა შედეგს იმსახურებდა. მატჩს ვაკონტროლებდით, თუმცა ბევრი მომენტი ვერ გამოვიყენეთ. შედეგით იმედგაცრუებული ვარ, მაგრამ თამაშის ხარისხით – არა.
ასეთ მატჩებში მომენტები უნდა გამოვიყენოთ, რადგან თუ შედეგი ღია რჩება, რისკის ქვეშ ვდგებით, რაც დღესაც ვნახეთ. ჩვენს კუთხურზე შეცდომა დავუშვით, ჩვეულებრივ 4 ფეხბურთელით ვიცავთ თავს, როცა შეტევაში ვართ და ამჯერად ეს ვერ გავაკეთეთ. ეს არის შეცდომა, რომლისგანაც ვისწავლით.
ახლა ენერგია უნდა აღვიდგინოთ „ემპოლისთან“ მატჩისთვის, რადგან ჩემპიონთა ლიგა ძალიან ბევრ ფიზიკურ და მენტალურ ენერგიას გვართმევს. ხვალიდან მუშაობას განვაახლებთ, რათა შეძლებისდაგვარად მოვემზადოთ მომდევნო მატჩისთვის და საკუთარ მოედანზე მოვიგოთ,“ – განაცხადა რუდი გარსიამ.
„უნიონ ბერლინის“ მცველმა ლეონარდო ბონუჩიმ „ნაპოლისთან“ მატჩის შემდეგ ხვიჩა კვარაცხელიაზე ისაუბრა.
„კვარაცხელიამ შესანიშნავი თამაში ჩაატარა. როდესაც გიმიზნებს, ყოველთვის წნეხის ქვეშ გაქცევს. ზოგიერთ სიტუაციაში უკეთ მოქმედება შეეძლო, მაგრამ ჩვენთვის კარგი გააკეთა. როგორც გუშინ ვთქვი, „ნაპოლის“ შეტევაში წარმოუდგენელი ხარისხი და რესურსი აქვს, 90 წუთის განმავლობაში ზეწოლას ახდენენ,” – განაცხადა ლეონარდო ბონუჩიმ.
მადრიდის „რეალის” მთავარმა მწვრთნელმა, კარლო ანჩელოტიმ, ერთი რეკორდი დაამყარა – მწვრთნელის რანგში ჩემპიონთა ლიგაზე ყველაზე მეტი გამარჯვება მოიპოვა.
ანჩელოტიმ მთავარი მწვრთნელის რანგში 116-ე შეხვედრა მოიგო და სერ ალექს ფერგიუსონის მიღწევა გააუმჯობესა.
ჩემპიონთა ლიგის ჯგუფური ეტაპის მე-4 ტურის მატჩში „რეალმა“ „ბრაგა“ 3:0 დაამარცხა. ოთხი ტურის შემდეგ ანჩელოტის გუნდი C ჯგუფს 12 ქულით ერთპიროვნულად ლიდერობს და „ფლეი ოფის“ საგზური ვადამდე მოიპოვა.
მომდევნო ტურში „რეალი“ „ნაპოლის“ უმასპინძლებს. მატჩი 29 ნოემბერს გაიმართება.
ბრაზილიური მედიიდ ინფორმაციით, ბრაზილიის ნაკრების ფეხბურთელის ნეიმარის შეყვარებულის სახლში, რომელიც სან-პაულუში მდებარეობს, სამი მამაკაცი შეიჭრა.
ნეიმარი და მისი შეყვარებული ბრუნა ბიანკარდი ამ დროს სახლში არ იმყოფებოდნენ, მაგრამ კრიმინალებს იქ გოგონას მშობლები დახვდათ. შეიარაღებულმა პირებმა ბრუნას მშობლები სკამზე დააბეს, რის შემდეგაც სახლის ჩხრეკა დაიწყეს.
ეჭვმიტანილები ნეიმარისა და ბრუნას ახალშობილ შვილს ეძებდნენ, რომელიც ოქტომბერში დაიბადა.
საბედნიეროდ, მეზობლებმა ამის შესახებ დაცვას მალევე შეატყობინებეს და საბოლოო ჯამში, არავინ დაშავებულა. ერთ-ერთი ეჭვმიტანილი 20 წლის ბიჭია, რომელიც მალევე დააკავეს. როგორც აღნიშნავენ, ის ბრუნას მეზობელია და თანამზრახველებს სახლში შესვლაში დაეხმარა. დანარჩენი ორი ეჭვმიტანილი ჯერ არ უპოვნიათ, მაგრამ ერთ-ერთის ვინაობა ცნობილია.
ავტორი
