ხატია შელია: „სამოქალაქო პიკნიკებმა“ დაგვანახა, რაოდენ მნიშვნელოვანია ასეთი ფორმატის ღონისძიებების ხშირად გამართვა“

ხატია შელია: „ოზურგეთის მუნიციპალიტეტისთვის მნიშვნელოვანი გამოწვევაა მიუსაფარი ცხოველების მოვლა-პატრონობა, რაც „USAID ადგილობრივი თვითმმართველობის პროგრამის“      კვლევის – „მოქალაქეთა და ბიზნესის დამოკიდებულებები ადგილობრივი მმართველობისა და სერვისების მიმართ” თანახმად, პრობლემათა რეიტინგში პირველ ადგილზეა. ჩვენი გუნდი შეეჭიდა ამ პრობლემის გადაჭრაზე მუშაობას ადგილობრივ მოსახლეობასთან ერთად, სამოქალაქო საზოგადოების აქტიური ჩართულობით.

„USAID-ის ადგილობრივი თვითმმართველობის პროგრამის“ მხარდაჭერით, პროექტის „სათათბირო დემოკრატიის ინსტიტუციონალიზაცია ოზურგეთის მუნიციპალიტეტში“ ფარგლებში, გაიმართება „მოქალაქეთა ასამბლეა“, სადაც მოქალაქეები, ექსპერტების და დაინტერესებული მხარეების დახმარებით, შეიმუშავებენ რეკომენდაციებს ადგილობრივი ხელისუფლებისათვის.

პროექტის პირველ ეტაპზე, ჩვენი მიზანი იყო მოსახლეობის ინფორმირება სამოქალაქო მონაწილეობის მექანიზმების,       განსაკუთრებით      „მოქალაქეთა ასამბლეის“ შესახებ. სწორედ ამ მიზნით გავმართეთ საინფორმაციო შეხვედრები („სამოქალაქო პიკნიკები“) მუნიციპალიტეტის 14-ვე მაჟორიტარული ოლქის მაცხოვრებლებთან. შვიდმა სამოქალაქო პიკნიკმა უმასპინძლა 159 დაინტერესებულ მოქალაქეს. შეხვედრებში მონაწილეობდა ყველა ასაკობრივი ჯგუფის ადამიანი.   საინფორმაციო შეხვედრებზე მოქალაქეებს გავუზიარეთ ინფორმაცია სამოქალაქო ჩართულობის ფორმების, მათ შორის „მოქალაქეთა ასამბლეის“ სარგებლისა და მისი გამართვის პროცედურების შესახებ.

ადგილობრივმა მოსახლეობამ იმსჯელა მიუსაფარი ცხოველების პრობლემაზე და გამოხატა ინტერესი ჩაერთოს ასამბლეის საქმიანობაში. „სამოქალაქო პიკნიკებმა“ გვაჩვენა,  რამდენად     მნიშვნელოვანია მსგავსი ფორმატის ღონისძიებების ხშირად გამართვა იმისათვის, რომ მოქალაქეებს ჰქონდეთ სივრცე, ორგანიზებულად, ერთი პრობლემის ირგვლივ გაერთიანებისათვის, სადაც შესაძლებელი იქნება ერთმანეთისთვის შეხედულებების გაზიარება, სამოქალაქო ექსპერტების და მუნიციპალიტეტის წარმომადგენლების ჩართულობით.

„სამოქალაქო პიკნიკების“ გამოცდილებამ ასევე დაგვანახა, რომ ჯერ ისევ არსებობს გამოწვევები  მუნიციპალიტეტის ცხოვრებაში მოქალაქეთა ჩართვის კუთხით. მოსახლეობას აქვს მწირი ინფორმაცია იმ გზებისა და მექანიზმების შესახებ, რომლის მეშვეობით შეძლებენ გადაწყვეტილებების მიღების პროცესში ჩართვას. ამდენად, საჭიროა უფრო მეტი კომუნიკაცია იმისთვის, რომ ხალხმა უკეთ გაიაზროს სამოქალაქო ჩართულობის სიკეთეები და აუცილებლობა. ვიმედოვნებთ, ჩვენი პროექტი ამ გამოწვევასაც ღირსეულად გაუმკლავდება და მოქალაქეებს გაუჩენს მოტივაციას, თავადაც მიიღონ მონაწილეობა ადგილობრივი პროცესების მართვაში და ერთობლივად გადაწყვიტონ საზოგადო პრობლემები. სწორედ ამ მიზანს ემსახურება „მოქალაქეთა ასამბლეაც“.

„მოქალაქეთა ასამბლეის“ გამართვასთან ერთად, პროექტის ფარგლებში, გავუწევთ ადვოკატირებას როგორც მუნიციპალიტეტის სამოქმედო გეგმის შემუშავებას და დამტკიცებას (რომლის მიხედვითაც მუნიციპალიტეტი შეძლებს თანმიმდევრულად და მიზანმიმართულად მოაგვაროს მიუსაფარი ცხოველების მოვლის საკითხი), ასევე მოქალაქეთა ჩართულობის ინოვაციური მექანიზმის ინსტიტუციონალიზაციას საკანონმდებლო დონეზე. პროექტი მნიშვნელოვანია იმითაც, რომ გარდა კონკრეტული, მეტად მტკივნეული პრობლემის გადაჭრის ოპტიმალური გზების აღმოჩენისა, მისი განხორციელების შედეგად შეიქმნება საზოგადოებრივი დისკუსიის და დიალოგის მდგრადი სივრცე, სადაც განსხვავებული შეხედულებების ადამიანები შეძლებენ კონკრეტული პრობლემის ირგვლივ გაერთიანებას და ერთიანი გადაწყვეტილებების მიღებას.

წინამდებარე პუბლიკაციის მომზადება შესაძლებელი გახდა ამერიკელი ხალხის მხარდაჭერით, აშშ-ს საერთაშორისო განვითარების სააგენტოს (USAID) ადგილობრივი თვითმმართველობის პროგრამის მეშვეობით. მასალა მომზადებულია „თანამონაწილეობისა და ჩართულობის ცენტრი სიპისის“ მიერ და შესაძლებელია არ ასახავდეს USAID-ის ან აშშ-ს მთავრობის შეხედულებებს.