არასამთავრობო ორგანიზაცია „ეკოს“ მიერ მოპოვებული ინფორმაციით, ოზურგეთის მუნიციპალიტეტში, გომის ტყეში „პარვუს ჯგუფი“ დაგეგმილი მცირე ჰესების მშენებლობის გეგმას ცვლის და ჯამში ოთხი ჰესის მშენებლობას გეგმავს.
„ეკოს“ დამფუძნებელი ირმა გორდელაძე ამბობს, რომ ოთხივე ჰესის სიმძლავრე 30 მეგავატამდე გაიზრდება.
„პარვუს ჯგუფმა“ 3.06.2024 წელს განცხადებით მიმართა გარემოს დაცვის სამინისტროს “ბასრა1”, “ბასრა2”, “ბასრა3” და “ბასრა 4” ჰესების პროექტების სიმძლავრეების დაკორექტირების შესახებ და სკოპინგის ანგარიში წარუდგინა.
ოთხივე ჰესის სიმძლავრე 30 მეგავატამდე გაიზრდება, არადა, თავიდან 6 მეგავატი იყო განსაზღვრული და სამი მცირე ჰესის მშენებლობაზე იყო საუბარი.
სრული პასუხისმგებლობით ვაცხადებ _ კვლევები, რომელიც წარადგინეს არის აფიორა, გადაწერილი ან შეთითხნილი.
შემოქმედი– გომის მოსახლეობამ რას უნდა გააკეთოს, არის ის, რომ ამ ცვლილებების საჯარო განხილვებზე უარი თქვან და მხარი არ დაუჭირონ ხეობის დაშრობას.
კომპანია რომელიც მალულად, მოსყიდვით ან დაშინებით მოდის სოფელში, არაა სანდო, ასევე მათი კვლევები არ არის კვალიფიციური, სერიოზული, გათვლილი შემარბილებელ ღონისძიებებზე, რეგიონის სარგებელზე, გარემოს დაცვაზე, რაც გამოიწვევს ბუნებრივ კატასტროფებს ხეობაში.
ამ საკითხზე ბევრი ვიბრძოლეთ ადგილობრივი მედიის დახმარებით, მაგრამ ყველა კარი დაგვიკეტეს“, _ ამ ინფორმაციას სოციალურ ქსელში ირმა გორდელაძე ავრცელებს.
ადგილობრივი მედია და არასამთავრობო ორგანიზაცია „ეკო“ თავიდანვე აქტიურად აწვდიდა ინფორმაციას საზოგადოებას „პარვუს ჯგუფის“ მიერ დაგეგმილი ჰესების მშენებლობის შესახებ.
ჰესების მშენებლობასთან დაკავშირებით სრული ინფორმაციის გამოქვეყნებას და „პარვუს ჯგუფთან“ შეხვედრას ითხოვდა ოზურგეთის მუნიციპალიტეტის საკრებულოს წევრი, ოპოზიციონერი გიორგი შილაკაძე _ მან არაერთხელ მიმართა საკრებულოს თავმჯდომარეს, რომ კომპანიის წარმომადგენლები მოეწვია საკრებულოს სხდომაზე და მომხდარიყო ჰესების მშენებლობის დეტალებზე საუბარი, მაგრამ მსგავსი შეხვედრა, ჯერჯერობით, არ მომხდარა.
„გურია ნიუსმა“ ასევე 2024 წლის ბიუჯეტის დამტკიცების დღეს ოზურგეთის მუნიციპალიტეტის მერთან, ავთანდილ თალაკვაძესთან ჩაწერა ინტერვიუ _ თალაკვაძის თქმით, კომპანია ჰესებთან დაკავშირებით ხვდება ხალხს, არასამთავრობო ორგანიზაციის წარმომადგენლებს, თუმცა, ჩვენთვის უცნობია, კონკრეტულად ვის ხვდებოდნენ კომპანიის წარმომადგენლები.
„გურია ნიუსი“ დაუკავშირდა „პარვუს ჯგუფის“ პრესსამსახურს და ჰესების მშენებლობასთან დაკავშირებით ასეთი პასუხი მიიღო:
„გასულ წელს, გურიის რეგიონში, ოზურგეთის მუნიციპალიტეტში, მდინარე ბჟუჟის ხეობაში, ბოლო დასახლებული პუნქტიდან 10კმ-ზე მეტი დაშორებით, კომპანია „პარვუს ბასრა“ მცირე ჰესების მშენებლობისთვის წინასაპროექტო კვლევით სამუშაოებს ატარებდა. მშენებლობის ნებართვის მოპოვების მიზნით ჩატარებული კვლევებისა და დეტალური პროექტირების ეტაპზე გამოიკვეთა საპროექტო არეალში პოტენციალის ეფექტურად ათვისების უკეთესი შესაძლებლობა, თუმცა, ამ დრომდე გადამცემ ქსელთან მიერთება შესაძლებელი იყო მხოლოდ შეზღუდული სიმძლავრით, რაც მდინარის გარკვეული პოტენციალის ათვისებას აფერხებდა.
ვინაიდან საკვლევ რეგიონში უკვე დაიწყო 110 კვ ორჯაჭვა საჰაერო ელექტროგადამცემი ხაზის _ ,,ოზურგეთი-ზოტიჰესის’’ მშენებლობა (გარემოსდაცვითი გადაწყვეტილება #2-1078; 12/11/2019), რეგიონში გაჩნდა ,,ბასრა ჰესების’’ საპროექტო წარმადობის გაზრდის და წარმოებული ენერგიის გაზრდილი რაოდენობის საერთო ქსელში ჩართვის ახალი პერსპექტივა, რომლიც სამომავლოდ ქსელზე მიერთებული მომხმარებლების ელექტრომომარაგების საიმედოობის გაზრდის, ელექტრო ენერგიის ხარისხის გაუმჯობესების და არაგეგმიური წყვეტების შემცირების შესაძლებლობას იძლევა.
,,ბასრა ჰესების’’ სიმძლავრეების დაკორექტირება განსაზღვრულია ასათვისებელი წყლის ობიექტ(ებ)ის ჰიდროლოგიური მახასიათებლების შესაძლებლობიდან გამომდინარე 4 ძალურ კვანძში (არსებული ჰესის შენობებში) მაღალი გამომუშავების/სიმძლავრის ტურბინების მოწყობის გზით. ,,ბასრა ჰესების’’ სიმძლავრეების დაკორექტირების შემდგომ ჯამური სიმძლავრე მიაღწევს დაახლოებით 30 მეგავატს (29.34მგვტ).
რაც მთავარია, დამატებითი ელექტროენერგიის გამომუშავების გეგმა გამორიცხავს გარემოზე დამატებით ზეგავლენას, სიმძლავრის გაზრდა მოხდება მხოლოდ დამატებითი ტურბინების და არსებული ტურბინების მოდიფიკაციის ხარჯზე.
კომპანიის მიერ პროექტის განხორციელება ხდება საქართველოს კანონმდებლობისა და საქართველოს მთავრობასთან გაფორმებული „ელექტროსადგურების მშენებლობის ტექნიკურ-ეკონომიკური გახორციელებადობის საკითხების შესწავლის მშენებლობის, ფლობისა და ოპერირების შესახებ“ ხელშეკრულების საფუძველზე,
ზემოთ აღნიშნული ხელშეკრულების მიხედვით, კომპანიამ ჩაატარა კანონმდებლობით დადგენილი წინასამშენებლო კვლევები, რომელმაც შესაძლებლობა მისცა პროექტს გადასულიყო სამშენებლო ფაზაზე; იტალიურმა საპროექტო კომპანიამ უზრუნველყო ჰიდროელექტროსადგურების ტექნიკური დიზაინის მომზადება; კომპანიამ მოიპოვა პროექტის განხორციელებისათვის საჭირო და პროექტის არეალში მოქცეულ მიწებზე შესაბამისი უფლებები; მუდმივად ტარდება სამშენებლო მასალების ხარისხისა და უსაფრთხოების მონიტორინგი.
მცირე ჰიდროელექტროსადგურის მშენებლობა (პირველი პროექტით) არ ითვალისწინებდა გარემოზე ზემოქმედების შეფასებისთვის აუცილებელი სამუშაოების ჩატარებას. ვინაიდან პროექტის დადგმული სიმძლავრე უკვე ექვემდებარება გარემოს ზემოქმედების კუთხით შესაბამის პროცედურებს, კომპანია ამ ეტაპზე ახორციელებს გარემოზე ზემოქმედების შეფასებით სამუშაოებს, რომლის ფარგლებში ინტენსიურად გვექნება შეხვედრები თემის მოსახლეობასთან, უახლოეს დღეებში წარვუდგენთ ადგილობრივებს პრეზენტაციას ჰესების ტექნიკური მახასიათებლების აღწერით, ალტერნატივების ანალიზით, ელექტროენერგიის გენერაციის გეგმით, რისკების ანალიზით, ტექნიკურ-ეკონომიკური ანალიზით, სოციალური პასუხისმგებლობის ფარგლებში ჩასატარებელი აქტივობების ჩათვლით.
დამატებით. მოგეხსენებათ, ნებისმიერი უფლებამოსილ სახელმწიფო ორგანოს, არასამთავრობო ორგანიზაციებს, მედიას, დაინტერესებულ პირებს აქვთ სრული და თავისუფალი წვდომა ელექტროსადგურის სამშენებლო პროცესის მიმდინარეობაზე დაკვირვების მიზნით“.
„გურია ნიუსი“ ამ საკითხთან დაკავშირებით აგრძელებს მუშაობას და მკითხველებს აუცილებლად შესთავაზებს ახალ ინფორმაციას.
ამავე თემაზე:
“პარვუს ჯგუფის” დამფუძნებელი: “ჩვენ რასაც გავაკეთებთ, ყველაფერი იქნება კანონმდებლობის დაცვით”
ავტორი
